اليوم ذهبت لترخيص العربيه و اخد بها اكتر من لفه فى الزحمه لازالة هيبة الزيرو و اخد على ابعدها و دى الانطباعات الاوليه :
1- اعجاز الاوربيين فى العفشه . العفشه تورشن بيم بس مش مصدق نعومتها و تماسكها و ما فيش دب و ده فعلا الغريب مع كوتشات بريدجستون تورينزا فعلا حققوا المعادله الصعبه ما بين التورشن بيم سهلة الصيانه و قوة التحمل و مابين الراحه و النعومه و الثبات على رأى المهندس هانى العفشه التورشن بيم تختلف من اليابانى للكورى للاوروبى دى حقيقه
2- الفتيس مذههههههل مع الموتور 115 حصان و ده بالنسبه للعربيات اللى جربتها كان اسوأهم فتيس الكروز و بعدين الجيتا . ما فيش احساس نهائي بالنقلات مع سحب ناعم فى الزحمه و يا عينى لما بتفتح و اول مره الاقى فتيس اوتوماتيك ينقذك فى مواقف . طبعا بتكونوا عارفين لما بيكون حد سايق زيرو جديده و غاليه بيتعمل فيه ايه فى الشارع . الفتيس اعجاز اليابانيين بصراحه ملوك الاوتوماتيك و النعومه .
3- العربيه ال handling بتاعها رائع من تحكم فى الدركسيون مع احساسه بالطريق مع تجميعه السريع فى اليوتيرنات بيلم العربيه معاك على طول .
4- الفرامل حدث وﻻ حرج . كلبشه يعنى كلبشه
5- الجلوس فى الصالون ده مش هاقدر اوضحه لازم يتجرب شخصيا . يكفى اقول رفاهية الفرنساويين و جربوا انتم الباقى
6- كنت دايما مقتنع انه فاتحة السقف ما لهاش لزمه لغاية ما مراتى ضغطت عليه اشتريها بفتحة سقف . بصراحه تستاهل الفلوس الزياده . احساس تانى خالص و انت فاتحها بانوراما او نص فاتحه
7- الكاسيت ده حكايه تانيه خالص . اوبشن العربيه كوم و كوليتى الكاسيت كوم تانى arkamys الفرنسيه مبدعه
كل الل اقدر اقوله لغاية دلوقتى شكرا رينو فى الموديل ده حققت الصعب و دمجت بنجاح و ذكاء مابين نعومة المحركات اليابانيه و اعتماديتها و ما بين التكنولوجيا و الثبات و الامان الاوروبى و رفاهية الفرنسيين و ربنا يبارك لكل واحد فيما امتلك و يكفيه شرها و يعطيه خيرها