بص ياغالى انا هحكيلك موقف حصل معايا .. نفس السؤال اللى انا سالته هجاوبك عليه

دخلت على كمين عادى مافيش اى مشاكل شاف الرخص وكله تمام
كان معايا صحابى واحد بصلى وقالى خليك انت << " تقريبا دا مخبر من اللى بيقفو " ونزل صحابى يفتشهم

قولت ماشى ماعلينا
وقالى اركن على جنب .. ركنت وفتش صحابى وفتش العربية
فى الظابط كان واقف على جنب قالى انزل تعالى
نزلتله قال للمخبر فتشه

فتشنى ومافيش حاجة طبعا فى العربية ولا مع حد فينا
بعد ما فتشنى وانا واقف مستنى يدينى الرخص بيقولى مالك واقف معووج كدة

قولتله انت فتشتنى وفتشت العربية ومافيش حاجة معانا
وبعدين مانا واقف اهو عدل

قالى اتكلم حلو انت واقف فى كمين والكلام دة
ولاقيت المخبرين اللى جنبه جايين عليا واللى يشدنى من هدومى ويقولى اتكلم حلو
والحاجات دى .. زغدنى فى صدرى .. ماعرفش الناس هتفهم يعنى ايه زغده ولا لا بس مالهاش اسم غير كدة :d

المهم سيبتهم يعملو اللى عاوزينه وبعدين ادانى الرخص وانا رايح اركب العربية
مخبر بيقولى لو كنت واقف حلو ماكنش حصل كل دة .. قولتله انتو مالقيتوش معانا حاجة يبقى مالهوش لازمه كل دة

راح جاى جرى الظابط تانى عليا واخد الرخص وقال للمخبر اركب معاه خده اعمله محضر :)

" اول مرة ادخل قسم "
قولت ماشى هنشوف اخرتها ايه .
روحت القسم قالو انى هتعرض على المامور قولت اكيد لما ادخل للمامور ويعرف اللى حصل هيوقف معايا
دخلت للمامور بيقولى ايه جابك

قولتله الظابط مش عاجبه كلامى !

قالى وانت مين اصلا علشان يعجبه كلامك ؟
انا ممكن ابيتك فى الحبس وتطلع بكرة ونقولك معلش سوء تفاهم

قولتله اللى انت شايفه ..

المهم ادانى الرخص وقالى روح

ونسيت اقولكم
وهما بيفتشو العربية المخبر مكانش عارف يفتح الشنطة
مش عارف عمل ايه خلاها مابتقفلش .. روحت لسمكرى بعد ماخلصت عدلها تانى

دى قصة حصل معايا .. وبتلخص البلد دى ماشية ازاى

معاك واسطة .. تعمل اللى انت عاوزه
مواطن عادى .. يتعمل فيك اللى هما عاوزينه