الموضوع: الفرق بين الصناعة الالماني والصيني

المشاركة الأصلية كتبت بواسطة bayantt

موضوع رائع
انا هتكلم عن تجربتي الشخصية، انا كان معايا اوبترا ثم سوزوكى sx4 ثم كورسا الجديدة هاي لاين ومعاها فى نفس الوقت اسبيرانزا a516 وبعد كده بعت الكورسا والاسبيرانزا وجبت مرسيدس c180 موديل 2000
الفرق الملاحظ بالنسبة لي بين الصناعة الصينى والالماني هو الاعتمادية, بمعنى انك بتركب عربية مش متوقع مفاجآت تحصلك غير الصينى اللي ممكن اي حاجة تحصل في اى وقت.
لو السؤال علي القدرة، فاكيد الصين عندهم القدرة انهم يعملوا عربيات بالجودة الالمانية والدليل ان شركة SAIC اللي بتعمل الMG بتقفل الاوكتافيا والباسات، لكن من وجهة نظري الموضوع هو عدم وجود رغبة لدى المصنع الصينى حالياَ علي الاقل في انتاج سيارات بجودة عالية زى الالمانى يمكن لان ال TARGET MARKET بالنسبة له فالفترة دى هو المستخدم ذو ميزانية محدودة.
الحاجة التانية اللي لازم نفتكرها ان الصين بتعتمد في كثير من منتجتها علي ال reverse engineering والمانيا بتعتمد علي ال innovation وبكده حتي مع تطور المنتج الصينى اللي بيعتمد فالمقام الاول علي economies of scale هتبقي هناك مسافة بينه وبين المنتج الألماني، ممكن المسافة تقل بس هتفضل موجودة.

الكلام بتاع حضرتك مظبوط جدا.. بس أنا أختلف مع حضرتك في نقطة صغيرة

مسألة الابتكار innovation حاليا مش موجودة بوضوح في المنتجات الصينية بشكل عام.. بس أتوقع إننا حنسمع على منتجات صينية مبتكرة في وقت قريب..

على فكرة.. مسألة اعتماد الصينيين على الهندسة العكسية reverse engineering هدفه الأساسي هو اختصار الوقت والنزول في السوق بمنتجات منافسة على مستوى مقبول لفئات معينة من المستهلكين.. ومع الوقت هما بيتعلموا ويحسنوا جودة منتجهم.

التطور الطبيعي لأي إنسان عايز يكون على القمة إنه:

1- يقلد
2- يغلط
3- يتعلم من خطؤه
4- يعمل حاجة تخليه ما يغلطش تاني ( يعمل نظام وقوانين )
5- يفكر في حاجة جديدة (يبتكر) تخليه متميز عن غيره.


انا شايف إن معظم الصناعات الصينية الجيدة دلوقتي خلصوا مرحلة 3.. وبعضهم خلص مرحلة 4

على فكرة.. أنا اتعاملت مع صينيين سنة 1999.. وكان صاحب المصنع اللي باشتغل فيه جايب كل ماكيناته من الصين..

الراجل ده قاللي حاجة مش ناسيها لحد دلوقتي.. قاللي إن الصين مش بتسمح للشركات العالمية تفتح مصانع هناك إلا لما يوافقوا على شرطين أساسيين..

1- الشركات اللي تفتح في الصين منتجاتها تنزل بأسماء صينية
2- الشركات دي ملزمة بنقل التكنولوجيا والمعرفة know-how للعاملين الصينيين

الشرط الأولاني ده أعتقد إن فيه بعض استثناءات.. إنما الشرط الثاني ده هو فعلا اللي هيخلي الصين تتقدم وتبقى القوة العظمى قريب جدا.

ما ننساش إن الصناعات الصينية مش عربيات بس... فيه شركات صينية في الإلكترونيات بقت رائدة وبتعمل منتجات محدش بيعمل زيها .. زي هواوي Huawei مثلا.



...