السلام عليكم ورحمة الله وبركاته

كل سنة وانتوا طيبين ولو انها متأخرة
في العيد زي ما بعضكوا شاف الصور الي حطتها لعربيتي وانا راشش السقف وجزء من الكبوت أسود والعربية اصلا لونها أبيض ..
بعد العيد استخسرت ارجعها تاني .. (مش مسألة فلوس) .. الموضوع ان أنا شايف أنه من حقي أخلى لون عربيتي زي ما أنا عايز .. (يمكن لأنها عربيتي)
وطبعاااا زي ما كلنا عارفين أن المرور في الجمهورية بلا استثناء متعاون لأبعد الحدود
ففكرت أني أرخص العربية كده (لونين يعني) ولما سألت ناس مرخصة بالفعل لونين بس لونين آخدين العربية من النص بالكامل بالسقف والكبوت قالولي عادي جدا من حقك .. مع العلم اني مش عايز ارشها من النص زي ما الناس الي رخصت رخصت .. لأني عايز السقف بس وجزء من الكبوت ..
فقررت .. الآتي
إني أتفرغ ولو أسبوع للموضوع ده واجاهد فيه لحد ما أشوف ايه الي ممكن يوقفني ..
مع العلم ان دي أول مرة اروح المرور برجليا من غير ما أكون مضطر ..
وفعلا رحت يوم الأحد الي فات .. وخبيت العربية بعيد وسالت المهندس بتاع الفحص .. قالي وترش ليه سبها لون واحد أحلى :D تصوروا الموضوع طالما شايفها كده حلوة متغيرش لونها وقالي تعالى لما يكون الظابط موجود
وبعدها بشوية رجعت لقيت الظابط وكان الحوار
أنا : صباح الخير يا باشا
هو: بصة
أنا : انا كنت جيت لحضرتك عشان عايز ارخص لونين
هو: نعممممممممممم بتقول ايه
أنا : قلت كلامي السابق بالحرف وبثقة ويمكن ده الي ضايقه
هو : يعني ايه لونين ؟
أنا : لونين يا باشا الي هما بيبقى لون ولون تاني كده يعني :D طبعا انا عامل أهبل
وكلامي بمنتهى منتهى البرود .
هو: قالي آآآآآآه طيب لونين ايه بقه
أنا : أسود وابيض
هو : لأ مينفعش
أنا : قلتله هي الجالينا مش سقفها اسود بردو
هو : هي نازلة كده
أنا : الهوندا الاحمر في دهبي والبولو الاسود في احمر نازلين كده بردو ؟؟
هو : بس دي هتبقى تاكسي :cute: مرح لأبعد الحدود (بيغير الموضوع)
أنا : بابتسامه تدل على فكاكته .. لا يا باشا التاكسي عندنا أبيض وازرق :biggrinjester:
هو: طيب بص بقه انت تجبلي عينة
أنا : عينة !!!
هو: آه عينة من اللون
أنا : قلتله بكل برود عنيا الاتنين يا باشا الصح ميختلفش عليه اتنين
المهم رحت اشتريت غطاء تانك من بنك الاسكان ورحت رشيته اللونين ورجعتله بعدها بساعه بس :D

أنا : اتفضل يا باشا ادي العينة
هو: عينة ايه
أنا : معرفش انت الي طلبتها
هو : طيب بص يا بني عشان متغلبنيش انت تقدم طلب ولما تبقى تمضيه من رئيس إدارة التراخيص ابقى تعالى
طبعا ده عملا بمبدأ (أبقى قابلني لو جبت طلب ممضي بكلامك ده)
أنا : بكل برود .. عنيا يا باشا

دخلت صالة التراخيص
أنا : السلام عليكم
الظابط : وعليكم السلام
أنا : لو سمحت عايز اقدم طلب عشان ارخص لونين
الظابط : قدم حد ماسكك
أنا : اكتب فيه ايه الصيغة يعني
الظابط : اكتب الي انت عايزه
أنا : اوك شكرا

وكتبت
السيد / رئيس قسم التراخيص
برجاء التكرم بالموافقة على ترخيص سيارتي رقم .. الخ
لونين (أسود / أبيض) .. ولسيادتكم جزيل الشكر
بورسعيد تاريخ ....
ومضاه بصراحه انا استغربت ..
بصلي وقالي بدون رسومات أو أشكال أو الوان صدفية
قلتله طبعاااااا عز الطلب
شكرا يا باشا

ورجعت لصاحبنا تاني بعدها بــ 10 دقايق بالعدد :cute:
هو : ايه ده
أنا : الطلب الي انت طلبته
هو: ماشي ماشي
أنا : ابتسامه رخمةةةةة :D
هو : قام قالي ترش الكبوت بالكامل احنا مش هنعمل مهرجانات
أنا : تحت امرك يا باشا وسحبت الورق بتاعي ومشيت ع البوهيجي رشيت الكبوت ورجعت

أنا : تمام كده ؟؟
هو: انت مش بتزهق يا بني ؟؟
أنا : لأ :D
هو : دور العربية
أنا : دورتها
هو : دوس بنزين .. لأ لأ لأ لأ العلبة دي تتغير مينفعش دي
مخالفة بتطلع صوت عالي اوى ..
أنا : سحبت الورق تاني من ايده وقلتله كالعاده عنيا يا باشا :D
روحت الحرفيين غيرتها بالعلبة الاصلية بتاعتي الي كانت في شنطة العربية وسبتها عند الراجل قلتله راجعلك تاني اركبها ..

انا : غيرت العلبة يا باشا
هو: بقولك ايه .. اطلع بالعربية من الساحة خالص مش عايز اشوف عربيتك دي
أنا : والورق ؟؟
هو : طلع العربية وتعالى
أنا : تحت أمرك يا باشا :D هع هع
ورجعت تاني لقيته كتلي
اللون ابيض / اسود (كبوت وسقف)
وكتلي في ظهر ورقة الفحص يرجى الافادة عما اذا كانت البصمة الخاصة بالشاسيه صحيحة او لا .. حته غتاته يعني ..
هو : اتفضل ولو فيه اي حاجه تاني مش هعملها
أنا : شكرا يا باشا :cute:
هو: فين الطفاية ؟؟
أنا : كنت اساسا فحصت الطفاية قبل ما اروحله تحسبا للغلاسة ومعايا ورقة الفحص
هو : يلا يا كابتن اتفضل عندنا شغل وهو بيزعق
متعرفوش مضايق ليه ؟؟؟؟

والحمد لله ربنا قدرني ورخصت (ابيض/اسود) :smile:

أجمل حاجه حصلتلي النهارده :

المصروفات في المرور

10.50 نموذج فحص
10 رسوم استخراج رخصة
2 الفني الي رفع البصمة
المجموع 22.5 جنيه المفروض تدفعلهم في بلد محترمة وترخص

المصاريف النثرية
25 جنيه فك وتركيب الشكمان مع الاكرامية
50 رش كبوت وازالة اللون بعد الفحص
30 إكراميات في المرور
المجموع 105 جنيه
وطبعا بعد ما فحصت رجعت الكبوت زي ما انا عايز ..
اسف اني طولت بس فرحتي الي حاسسها فرحة واحد بيفرح لانتصار اي حد على المرور وحبيت اشارك معاكوا فرحتي دي.. وفي نفس الوقت تعرفوا انه ينفع بس مع الصبر ع الغتاته .. واسف لو كنت صدعتكوا