الموضوع: أسرع وسيلة للسفر

المشاركة الأصلية كتبت بواسطة أحمد كمال

ايه اللي جاب القلعة جنب البحر؟ انا باقول عمان و حضرتك بتقول اقامتك على دبي و الشركة في دبي و البحرين و قطر .......

ايوا فاهم وقريت كلامك انا اقصد ليه ازنق نفسى فى عمان اصلا وهى دوله اقتصاديا مش قويه زى باقى الدول ده شعب فقير زى شعب البحرين

الموضوع مطروح للسفر بصفه عامه وانا وضحت ان فى دول مفتوحه للسفر والاستثمار بطريقه معينه

المشاركة الأصلية كتبت بواسطة أحمد كمال

لو معاك 5 مليون سيولة مش بعيد تكون عايز تعيش في مكان انضف


مش كل اللي بيهاجر بيهاجر عشان الفلوس ....... فيه ناس سابت وظايف في مصر بالعبيط و فلوس بالهبل و سافرت عشان تشتغل برة بملاليم بس مرتاحين في العيشة النضيفة

هى ديه دايما وجهة نظرى بس محدش بيقتتنع

المشاركة الأصلية كتبت بواسطة أحمد كمال

تعالى جنبي ......... انا برضه ما بالاقيش حد يفهم ........ كله بيحسبها بالكالكوليتور

طيب اما تجدد الرخصة و تدفع المخالفات و انت في بيتكم بالبيجامة ....... ليها تمن

طيب اما تمشي في شوارع نضيفة ما تغرزش ..... ليها تمن

طيب اما الاسعاف يلحقك في 6 دقايق و انت ساكن في منطقة زحمة و يشيلك يوديك العناية المركزة و تقضي ليلة كاملة هناك و فحوصات و تحاليل و تخرج ما تدفعش مليم (و لا حتى تامينك الصحي يدفع) ....... ليها تمن


طيب اما تعمل حادثة و تخلص كل حاجة بالادب مع الشرطة و التامين و كل واحد يسلم عالتاني و يمشي ..... ليها تمن


الى اخر القائمة التي لا تنتهي

يا سلام عليك يا استاذ احمد و فعلا قلت ما يدور في خلد الكثيرين منا و انا اولهم و الله و لولا بعض الضغوط الاسرية العنيفة لنقلت اموري فورا لرأس الخيمة و فعلا في حاجات اهم بكتير من الفلوس يا جماعة و كفاية الاحترام و الاخلاق في التعامل و العيش دون ضغط عصبي. اصدقاء كثيرين في شركات مقاولات و كمبيوتر صفوا شركاتهم في مصر و راحوا دبي و راس الخيمة و طلعوا اقامة مستثمر في اسبوعين و كانت الاول ٣ ايام بس استحدثوا موضوع الموافقة الامنية بعد ٢٠١١ و الربيع العربي للسيطرة على الداخلين للبلد.

المشاركة الأصلية كتبت بواسطة أحمد كمال

لو معاك 5 مليون سيولة مش بعيد تكون عايز تعيش في مكان انضف


مش كل اللي بيهاجر بيهاجر عشان الفلوس ....... فيه ناس سابت وظايف في مصر بالعبيط و فلوس بالهبل و سافرت عشان تشتغل برة بملاليم بس مرتاحين في العيشة النضيفة

بصراحة انا مش مع الرأى ده و عن تجربة شخصية

الاندماج مع مجتمع مختلف تماما فى الفكر و الثفاقة و اللغة و كل حاجة صعب جدا ...

يعنى بعيدا عن الدول العربية فالدول الاوروبية و امريكا و كندا و استراليا ثقافة مختلفة تماما عننا ..

و الموضوع مش بالنسبة لى موضوع فلوس خالص .. بس الفكرة فى المعيشة نفسها فيها صعوبات كتير و ابسطها بالنسبة ليا لو عايز استقر برة لازم هدخل ولادى فى مدارس البلد الجديدة و فى الاغلب لازم هيبقوا زى ولاد البلد لأنهم مولودين هناك و بصراحة ابقى بظلمهم لما اخليهم يعيشوا بفكر و ثفافة بلد تانية مختلفة تماما عن اللى هما عايشين و مولودين فيها ..

هو فى الاخر محدش بياخد كل حاجة و كل مكان ليه عيوبه

بس اللى مرتاح ماديا فى مصر و احنا هنا بنتكلم على حد مثلا ثروته لا تقل عن 10 مليون اظن انه ممكن يعيش حياة الى حد ما كويسة فى مصر ، طبعا فيه عيوب بس برة برضه مش جنة و كفاية انك عايش فى مجتمع غير مجتمعك و بلد غير بلدك ..

كلامى بعيدا عن الامارات عشان انا مرحتهاش زيارة حتى فمقدرش احكم هل العيشة هناك تستحق الغربة ولا لا

اسهل طريقه للسفر دول اوروبا للاسف هو جواز من اجنبيه وتسافر ببيها بلدها ويتعملك اقامه على حسها
ودى عن تجارب صحابى كتير عايشيت فى ايطاليا وسويسرا والمانيا لحد دلوقتى