مين اسهل في تطليع الرخصة

**sep0508** · 08-10-2008 11:07 AM

انا من محافظة الجيزة ـ ايه رأيكم ـ لو اتعلمت فى مدرسة مرور بين السرايات ولا في مدرسة خاصة ـ مين اسهل في تطليع الرخصة بعد كده؟
و شكرا لكم
Ali

**Scent7104** · 08-10-2008 01:27 PM

السلام عليكم

بص أنا لما قررت أتعلم السواقة بجد - يعني مش بأجرب بس- قررت إني أتعلم في درسة المرور مش علشان حاجة أو سهولة في تطليع الرخصة لأ لكن علشان أتعلم على أسس صح و أعرف أشياء عامة عن العربية و أعرف قوانين المرور زي ما بيقول الكتاب.

و الحمد لله بأحس ان ده جاب نتيجة معايا - لأني كنت واخداها على انها مدرسة مرور بجد (يعني باذاكر و بامتحن النظري بتاعهم في مواعيده و كل حاجة)

أنا كل أصحابي اتعلموا السواقة في مدارس خاصة - بس كان عندهم شوية حاجات ناقصة ( يعني المارشدير - الركنة - القوانين و علامات المرور) و بعد كده بيتعودوا من المشي كتير - بس في الأول بتخلي حد يركن لها أو بيتزنق في شارع و مش بيعرف يرجع يعني كلام من ده.

هي المدرسة بتاخد حوالي شهر تقريبا و بعدين امتحان السواقة في المرور التابع لها و على نفس العربية اللي انت اتعلمت عليها في المدرسة. ( يعني تقريبا كله واحد) - بس في المدرسة انت عارف مواعيدك بالضبط (تنظيمي مش أكتر)

بالنسبة للسهولة فمفيش امتحان سهل و امتحان صعب كله واحد . هو ممكن يكون مرور بين السرايات أسهل شوية في الامتحانات بتاعته ( يعني بس بتطلع من الحارة و بعدين تدخل فيها تاني مرشدير لحد لما تركن العربية و طبعا بتعدي بين الأقماع و انت رايح أو راجع).

آه نسيت أقول لك كمان ان في مدرسة المرور انت بتسوق على عربية عادية مش معدلة إنما في المدارس الخاصة فالعربية بتكون معدلة يعني بيكون في فرامل عندك و فرامل عند اللي حنبك ( علشان بيخافوا على نفسهم و على العربيات) و ده يمكن من أسوأ الحاجات عشان كده تقريبا كل اللي بيدخل مدرسة خاصة بيضطر يجيب سواق بعد كده يتعلم معاه في طرق بلدنا.

فنصيحة مني روح مدرسة المرور أحسن و في أثناء التدريب العملي اطلب من السواق اللي بيعلمك انك تنزل شوارع وسط البلد و المحور و كده يعني.

و ربنا يوفقك إن شاء الله

**blazer** · 08-10-2008 01:37 PM

انا طلعت الرخصه تيع مدرسه المرور لانها اسهل فى تطليع الرخصه :)
ومحضرتش اى محاضره من الماحضرات العملى لانك مش هتستفيد استفداه حقيقه و عشان ييلمك لام تدفعله ال 5 او ال 10 جنيه قبل كل مره تركب معاه العربيه
نصيحه اتعلم على عربيه بتاعتك ولما تعرف تسوق روح قدم فى مدرسه المرور و روح على الامتحان علطول (انا علمت كدا )
بس المهم انك تكون مخلص الورق كله و تروح على المدرسه فى يوم الامتحان الصبح بدرى تعرف مين السواق اللى المفروض كنت تتعلم معاه و قوله انك عاوز تمتحن و فهمه انك هتزبطه بفلوس لما تمتحن و تنجح باذن الله

**MIS** · 08-10-2008 04:16 PM

روح بين السرايات احسن لك هاتدفع 150 ج ( يكون معاك شهادتين طبية 1بطن و التانية عين و4 صور تقريبا وشهادة تثبت انك واخد ثانوية )
بعد كدا هتبدا اول الشهر والنظري هايخد حوالي اسبوعان بعد كدا هتاخد جدول فية امتي هتبدا العملي وده ممكن يطول لشهرين او 3 او 4 حتي علشان تخش العملي

وبعد كدا 7 حصص عملي وفي واحدة منهم هاتكون يوم الامتحان يعني 6 حصص
مش هاتتعلم غير انك ازاي تطلع بالعربية وتعدي الاقماع وترجع لورا وبس وتجيب الرخصة وبس

بعد كدا روح مدرسة خاصة بعد ما تطلع الرخصة

**أشرف العدوي** · 08-10-2008 04:39 PM

أنا اعرف واحد ممكن يعلمك على عربيته انا اتعلمت عنده هو بصراحة ممتاز و جرئ اول مرة اشوفه قالي بتعرف تسوق قولتله عندي فكرة عن النقل و الدواسات قالي اركب و اطلع الدائري و ميدان لبنان و شارع السودان
بصراحة
لولاه ما كنتش خدت الجرأة
و تاني مرة من فيصل لسوق سيارات مدينة نصر رايح جاي
هو الساعة عندة بـ 30 جنيه على عربية 131
و ممكن يساعدك لو عايز تجيب حاجة مستعملة