جالى النهارده واحد مستجد قى كار الداتشا نوفا قى تصليحه بسيطه جرنى الى حوار كبير طلبه منى :
طلب قى الاول تغيير الاربع طعميات بتوع المساعد الخلفى قولت عينى عشر دقايق ... وشويه وغيرت له العلاقتين بتوع علبة الشكمان وقد كان وتميت المهمه والحمد لله ... قالى معلش بصلى على الماتور والحوض لاحسن انا مش فاهم فى العربيه دى ولسه شاريها فلاقيت الباشا اللى بايعها له مسقط ماتور الرينو ال 9 بفتيسه وكوبلنه ولكن الغريب انه مش مركب اى قاعده واحده توحد ربنا للماتور(!!!) وبيقولى حاسس ان العربيه بترزع اثناء الحركه طب ماهو طبيعى طالما حديد على حديد.
المهم لاقيت فيه شرخ بسيط بالقنطره نتيجة تجميع الماتور على القنطره بدون قواعد فقولت له لابد من رفع الماتور من الحوض ولحامه بالمبه( لحام الاكسى استيلين) وتركيب القواعد الناقصه وظبط الماتور فى الحوض وترييحه واتفقنا على الجمعه الجايه ان شاء الله عشان ظروف شغله نعمل الحوار ده.
ولاقيت اثناء القحص ان العربيه سلك الدبرياج فيها مهوى على الاخر لدرجة انى خلعته بسهوله بدون مجهود يذكر والرجلاش كان على الاخر فدبرت له صاموله مشقوقه وعديتها من السلك وركبتها بعد القورش وبقى الراجل ميسوط جدا لما لاقى ان غياراته هاديه .
الفكره والهدف من الكلام ده ان ليه اهمال الاشياء البسيطه فى عربيتك على الرغم من سهوله تفادى المخاطر الناتجه عنها بتكلفه بسيطه وبمجهود لايذكر ؟ هل هو صاحب العربيه اللى مش فاهم ام الصنايعى اللى يبقى عارف العيب بس بيستعبط وعلى قدر فلوس الزبون؟؟
يا ريت الناس تراعى ربنا شويه عشان ربنا يبارك لهم فى اللى بيقبضوه من الناس اللى يمكن يكون قاطع من لحمه الحى ومن بق عياله عشان يصلح العربيه المتواضعه اللى يمكن تكون بيقضى بيها مصالحه واكل عيشه وبيستر بيها اهله من دهس وحشر وبهدله المواصلات العامه قى ظل زمن فيه الناس فقدو الاخلاق والعيب.
ربنا يهدى.