الموضوع: تغيير المشط الالكترونى

المشاركة الأصلية كتبت بواسطة adhmmaamon

بقالى فتره العربيه مش مظبوطه .. والبوجيهات مهما ظبطت خليط هوا وبنزين برضه مهببه .. الادهى من كده انها ابتدت تنتش بدون مبرر (حاله الموتور معقوله ومفيش زيت على البوجيهات الحمدلله ) .

النتشه دى كانت بتيجى وتروح ..يعنى مش على طول ..كمان الاربى ام لما ادور العربيه بيبقى ثابت ولما ادوس بنزين ولو حتى دوسه خفيفه يطلع عادى جدا ولكن مش بينزل عند الرقم اللى انا ظابطه عليه (8) ..بينزل لتحت ممكن خمسه وممكن اقل كمان وبعدين يبتدى يطلع تانى لمكانه لكن ببطء .

كلمت عم صبحى الراجل المحترم ( شهاده حق ) وقالى ان دى بدايه بوظان المشط وكمان شرحلى ازاى اركبه . كتر الف خيره ..

المهم نزلت علشان اشترى لقيت 3 انواع .
- مشط صينى ب90 جنيه (مش موجود علشان ناس كتير اشتكو منه )
-مشط تركى 125 جنيه (بعد الفصال ممكن يوصل ل110)
- مشط اصلى 260 جنيه من عند النبيل فى التوفيقيه وب225 من عند الصياد فى الدقى .. من غير فصال علشان مكنتش مصدق .
على فكره لا هنا ولا هنا فيه اى دليل يبين انه المشط الاصلى .. لكن الاتنين واحد هنا وهنا .

تم فك المشط القديم ب بيبه 8 وكانت حالته تصعب على الكافر .. وتم تركيب الجديد .
سلك اصفر وسلك اسود من الموبينه واتنين سلك من الاسبراتير فيهم كلبسين واحد كبير والتانى صغير والموضوع شارح نفسه جدا جدا ..

الحمد لله اداء العربيه اتغير تماما للافضل طبعا .. الموتور هدى كتير .. بقى فيه استجابه سريعه للسحب بتاع العربيه ..

بعد الفك والتركيب ترس المارش (فوت ) وجارى العمل على فكه وتغييره .. كمان طرمبه البنزين (ميكانيكيه ) ابتدت تهيس لما بتسخن .. برضه جارى تغييرها .. والتفكير فى طرمبه كهربا ..

ادعولى .. وسامحونى ان مفيش صور رغم انى مصور كل حاجه بس يبدو ان فيه مشكله فى موقع رفع الصور .. اتمنى ان يتم حلها سريعا .

حبيبى ياستاذ ادهم ربنا يبارك ليك وما وصفتنى به اقل بكثير ما توصف انت به (فانى اشهد الله والملائكة والنبيين والناس اجمعين انى احبكم فى الله)

طيب الار بى ام اتظبط ولا لسة مهيس لأنى نسيت اسالك على الموضوع دا وبرضو حضرتك مذكرتش المعلومة دى فى موضوعك***

وعلى فكرة موضوع الهباب اللى على البوجيهات والتنتيش دى حلها بك الهواء اللى فى جسم الكربرتير اسفل الاكسرنير حتلاقى عبارة عن راس مسمار بمفك عادى اربط عليه شوية الهباب حيختفى لأن حصلت معايا بالظبط**

لاحظت بعد شد فيفورتى جربت مشيط مافيش اى هباب على البوجيهات حتى اننى ركبت بوجيها مهببة ومشيت بيها ورجعت فكتها لقيتها بتلمع زى ميكون جديدة

طبعا انا ديما ايدى بتاكلنى ومريحتش نفسى قلت اعمل حشوة لبك الهواء وفكيتة فعلا وبفتله رفيعة خمس لفات كدا على راس البك وركبت بعد اسبوع وانا مااشى لاحظت مدافع من الشكمان ودخان اسود كثيف على طول رحت فاكك البوجيه لاقيته مهبب هباااااااااااااااااااااب روحت البيت وكنت حزين ايه اللى حصل فكرت اه اخر حاجة كان اللعب فى بك الهواء فكيته شيلت الفتلة الجديدة وسبت الفتلة القديمة اللى موجودة من زمااان ربط علية وربط ومازلت اربط والموتور شغال حتى وصل الموتور الى اقصى درجة الثبات وعدم العطس الخفيف ومشيت بالبوجيهات بهبابها ورجعت فكيت البوجية الحمد الله اختفى الهباب وعاد الى حالتة الطبيعية**

فامشكلتك هى ربط بك الهواء ولو مش عارف مكانة اتصل بيا وانا تحت امرك وتحت امر اى زميل هنا***

فين الصور يادهم انتا رافعها هدن ولا ايه ؟؟؟؟؟؟؟؟؟؟؟

مبروك المشط الجديد ولو انى اعتقد ذبذبة المؤشر هيبقى سببها الاسبراتير وعلى العموم تابع معانا بعد فترة وقول لنا الاخبار ايه