اول تقرير كامل ومصور لسيات ابيزا 2014 بعد الاستلام حصري للمنتدي
بشكر المنتدي بشكل كبير جدا عشان كميه المعلومات الرهيبه عن العربيات اللي موجوده فيه وعشان تقاعل الاعضاء معايا بشكل ايجابي وعشان عرفوني يعني ايه سيات
بصراحه من شهرين بالظبط مكنتش اعرف الماركه من اساسه..
الاختيار
العربيه اخترتها بعد بحث طوييل جدا وسهر ليالي طويله علي المنتدي عشان افصص كل عربيه
وبعد م دورت رسيت علي العربيات الاتيه
كيا ريو هاتشباك سياره اثبتت نفسها في السوق ومحترمه جدا بس مش عارف احبها
فولكس بولو غير متواجده بالاسواق دا اللي اكتشفته
فورد فييستا سعرها عالي اوي وقطع غيارها نار
بيجو 208غير متواجده بالاسواق ولسه هينزل دفعه جديده والكل خوفني من تعقيج الفرنساوي
كيا بيكانتو عارف التعليق بس كنت استسلمت ساعتها وكنت ناوي اجيبها بجد بس الكل هاجمني وكان عندهم حق
اول مرحت معرض اوتو ميشو عشان اشوف البولو شفت السيات كان اول مره اشوفها واركبها بس مفكرتش فيها تماما عشان معرفش عنها حاجه لحد م دخلت القسم وعرفت يعني ايه سيات
العربيه طبعا اسباني بس الاجزاء الداخليه الماني
واللي مستغربه و اول مره اعرفه ان الموتور مصنوع في المانيا في شركه فولكس فاجن
كنت فاكر ان كله في اسبانيا
الشراء
لفيت علي معارض كتير جدا معظمهم مش بيتعاملوا معاهم لحد معرفت ان من حوالين اسبوعين كدا التوكيل فتح معرض رسمي في العبور بعد مكان المصريه اوتو موتيف ليها معرض واحد لاودي وفلوكس وسيات بقوا تلات معارض منفصلين جمب بعض
استقريت علي اللون الاحمر كان عاجبني وبيختلف علي حسب الذوق روحت شوفتها وعاينتها وحجزت ب خمس الاف وسافرت شغلي ورجعت كلمتهم قلتلهم انا جاهز ف قاللي ادينا يوم
لغسيل السياره والكشف عليها وتفعيل الكومبيوتر والكشف علي الزيوت و الخ
دي قبل م تتغسل
تاني يوم روحتلهم لاقتهم مظبطينها وحطينها في المعرض
الموضوع بعد كده مخدش اكتر من تلت ساعه بالظبط بس طول شويه عشان كان في مشكله في عد الفلوس
اكتشفوا ان في زياده خمسين جنيه ( ناس امينه ) :dirol:
العربيه سعرها من التوكيل 142000 جنيه
استلمت جميع اوراق السياره معدا الافراج وخطاب المرور لسه مستنيهم ان شاء الله
العربيه بييجي معاها
- 4 سره للجنوط حولى 16 غطا حليه للمسامير بتاعه العجل
- استبن
- عده ( كوريك + مفتاح عجله + مفتاح اصفر للمسامير الحليه)
- 2 كتالوج للعربيه عربى وانجليزى
- عدد 2 مفتاح واحد بريموت للسنتر وواحد عادى
- ايريال كاسيت
- طفايه سجاير
دي مواصفات العربيه ( منقوله من موضوع الاستاذ SYD)
المحرك وناقل الحركة
سعة المحرك 1.6 cc
اقصي قوة 105 حصان عند 5600 دورة في الدقيقة
أقصي عزم 153 نيوتن متر عند 3800 دورة في الدقيقة
ناقل الحركة DSG 7 Speeds
الأداء والأستهلاك
السرعة القصوي 188 كم/ساعة
التسارع 0-100 كم/ساعة في 10.1 ثانية
متوسط الأستهلاك 5.8 لتر لكل 100 كم
الأمان
وسادة هوائية لكل من السائق والراكب الأمامي
فرامل مانعة للأنغلاق ABS مع تشغيل أضواء التحذير تلقائياً
أماكن تثبيت مقاعد الأطفال ISOFIX
عجلة أحتياطية بقياس 14 بوصة
مصابيح ضباب بخاصية الأركان Cornering Function
التجهيزات الداخلية والتشغيلية
مكيف هواء اوتوماتيكي
عجلة قيادة متعددة الوظائف
نظام سيات الصوتي مزود بمدخل AUX و4 سماعات
امكانية تعديل ارتفاع كرسي السائق
زجاج كهربائي في الأمام والخلف
الكراسي الخلفية قابلة للطي
مسند يد أمامي مزود بدرج تخزين
سنترال لوك بريموت كونترول (عدد 1 ريموت كونترول قابل للطي)
كمبيوتر رحلات
شماسات للسائق والراكب الأمامي مزودة بمرآة وحافظة كروت
التجهيزات الخارجية
جنوط ألومنيوم قياس 15 بوصة
مصابيح أمامية هالوجين
مرايات كهربائية مزودة بسخان
مصابيح خلفية LED
الأبعاد والوزن
طول 4061 سم
عرض 1693 سم
الأرتفاع 1445 سم
المساحة التخزينية 292 لتر
سعة خزان الوقود 45 لتر
الاستلام
كانت اول مره في حياتي اركب اوتوماتيك ورفضت حد يخدهالي ويسافر بيها البيت وقررت اخاطر انا واوديها بس بجد خلال خمس دقايق اتعودت علي الاوتو لان بقالي سنين في المانيوال العربيه كانت عامله عشرين كيلو معقول الي حد ما
الشكل الخارجي
من الداخل
خامات السياره جيده ولا يوجد بلاستيك بشكل مبالغ فيه ومعظم القطع من النوع الجيد جدا
اماكن التخزين
ميزه حلوه جدا فيها .. اماكن التخزين كتير اوي ومتعدده بس يعيبها ان مفيش في الشماسه مكان لحفظ الرخصه
الموتور
دا المنظر لما تفتح الكبوت ومكتوب علي الموتور علامه فولكس وصناعه الماني يعيبه عدم وجود غطاء للمحرك مع ان تكلفته مش هتكون كبيره