الموضوع: خدعوك فقالوا العربية بتسخن تقرير شامل قابل للنقاش

السلام عليكم ورحمة الله وبركاته

عاوز اتناقش معاكم واديكم معلومه هتريحكم من ناحية عربياتكم
وزي ما انتم شايفين العنوان " خدعوك فقالوا العربية بتسخن "

اولا : هنتكلم في الاسئلة الي بتدور في بالكم ..... ليـــــــه !!؟؟؟
1- ليه الحرارة بتوصل 90 او بتعديها ؟
انا هاقولك يا سيدي ليه الحرارة بتوصل 90 لان البنزين علشان يحترق علي اكمل وجه ويطلع اعلي واقصي قدرة ووجه استفادة لازم يكون في حاجتين أ- حرارة ب- اشعال
فلما الحرارة تبقي قليلة بيبقي الحرق اقل بيهبب البوجيهات و بيقلل كفائة الموتور وبالتالي السحب يقل وتاكل بنزين وتطلع بنزين ني من الشكمان .

2- طيب ليه الحرارة بتعلي علطول وبسرعة عندي حتي وانا واقف وتشتغل المروحة التانية و تقعد تشتغل وتطفي والحرارة بتفضل ثابتة علي 90 -80 ؟
بص يا باشا الموتور فيه حاجة اسمها دورة تبريد الدورة دي فايدتها تحافظ علي الموتور من السخونة الزيادة الي تخلي المعادن بتاعة الموتور تتمدد ويقفش وما ينفعش يفضل بارد علشان زي ما قولنا الحرق يبقي تام ف عملوا حاجة اسمها ثرمو ستات دي بتبقي راكبة في كوعة المياه الي الي ف وش السلندر وظيفتها ايه يا معلم لما المياه بتسخن نتيجه سخنيه الموتور في نسبة ضغط نتيجة تمدد المياه والبخار ف هي بتفتح عن ضخط معين والضغط دا بيكون عنده الحرارة بين مثلا 80-90 درجه وتبداء تشتغل دورة التبريد واول ما الحرارة تنزل بتفصل المروحه وبتتقفل الدورة لحين ارتفاع الحرارة ولما تعلي بتتفعل الدورة بتاعة التبريد علشان تحافظ علي الحرارة .

3- ليه الموتور بقي ما يقفش من السخونة زي ما انا بقول سؤال زكي ؟؟؟
الخواجة الي عمل العربية لما جه للموتور ما عدتش عليه طبعا ان لازم الموتور يبقي من سبيكه معدن خاصة مصممه لتحمل درجات الحرارة والضغط المرتفع داخل غرفة الاحتراق والا كنت هتلاقي الموتور دا اتكسر لو شغلته تمام والناس بقي الي بتغير بساتم وشميز ومش بتجيب حجات اصلية من السبيكة الاصلية الي ذد التمدد وبتستحمل ضغط ما تزعلش لما متورك ما يتحملش سخونية وما تزعلش لما كل شوية تعمل وتغير شميز وبساتم .

4- بس انا عندي الموتور بيسخن في الصيف وبيبقي بارد ف الشتاء ؟
طب انا قولت ايه ان كدا مش راكب عندك ثرموستات وروح ركبها لانك بتقصر من عمر الموتور ومافيش حاجة اسمها موتور يسخن صيفا يبرد شتاء دا كلام تخاريف لان زي ما قولت الموتور فيه دورة التبريد بتحافظ علي درجة حرارة ثابته بين قيمتين حلو كدا الكلام .

5- الميكانيكي قالي لازم اظبط تاكيهات اول الصيف واول الشتاء عليشان الحرارة والجو وكدا ؟
والله انا تعبت اشق هدومي يعني ما فيش حاجة اسمها الكلام دا ظبطه التاكيهات لو مظبوطة صح بالفلر وبمقاس الكتالوج بتاع الصيانه للبنزين والعادم والميكانيكي بيه بيراعي ان العادم بيبقي اكبر من النزين ما كنش هايقولك كدا وما كنتش هاتسمع صوت تاكيهات عالي وبعدين تاني اهو الحرارة بتاعة الجو ما بتاثرش علي حرارة المحرك مهما كان خلاص دا مستحيل علميا وعمليا فمش هتاثر علي التاكيهات لان المعادن مش هتتمدد زيادة او هتقلص زيادة عن الحد الي الخواجة حسبه
_________________
تاني حاجة امتي بقي نقول العربية بتسخن وهي فعلا بتلاقي حرارتها عالية و التبريد مش قادر عليها ها قولك اهو :
1-المكنة خفيفة
2-لو جوان وش السلندر باظ
3-لو طرمبة المياه باظت
4-لو الشكمان فيه مشكله
5-لو في سدد في دورة التبريد
6-الثموستات قفشت وهي قافلة
7- لو العربية متصممة في بلدة باردة وتم استيرادها بدون تعديل من الشركة المصنعه في كفائة دورة التبريد اوبي ايه بقي كفائة دورة التبريد دي ..؟؟ انت ها تجننا . اتقل بس

--------*--------*--------*--------*--------*--------*--------*--------
كفائة دورة التبريد
---------------

دي بتحددها الشركة المصنعه علي حسب المكان الي العربية هتشتغل فيه بمعني ان ظروف الي هتشتغل فيها العربية يعني احنا داولة تعتبر حارة ما ينفعش تجبلي عربية من دولة باردة طول السنه وبيتنزل تلج تشغلها هنا العربية هتولع ليه بقي تمام والكلام دا يتمثل في
1- الريداتير
2- مروحة التبريد
3- طرمبة اليماه
4- الثرموستات
5- طريق المياه الي خارجه من الموتور
فلو انت جايب عربية استيراد لازم توديها للوكيل علشان يعمل التعديل المناسب لكي تكون مناسبة مثلا يزود قوة المروحه يغير الثموستات لو المياه الي خارجة من الموتور فيها نسبة راجع علشان الموتور ما يبردش خالص فبيلغيها الطرمبة لو انها بطيئة بيغيرها دا الكلام الي المفروض يتعمل

وكفائة التبريد دي بتتفاوت من عربية لاخري لان كل عربية محتاجة تبريد بقوة معينة فبلاش تلعب فعربيتك وتغير حاجة بحاجة تاني وكمان كفائة التبريد دي تحسبها لو موتور عربيتك سليم من العيوب المزكورة اعلاه وعندها بيكون الحرارة لما بتعلا مثلا عن 90 تشوف العربية بتبرد نفسها ولا لاء وتشوف الحرارة في كتيب استخدام العربية وعلي اساسها بتقارن وتشوف لو في خلل ارجع للتوكيل او روح لميكانيكي يحللك العيب ويصلحه

اسف للاطالة ومافيش انسان معصوم من الخطاء والموضوع قابل للنقاش ولو حد شايف حاجة خطاء يقول ونتناقش لحد ما نوصل للصح ونستفيد كلنا .. اسالكم الدعاء لي لان عندي امتحانات