الموضوع: خدعوك فقالوا العربية بتسخن تقرير شامل قابل للنقاش

كلام سليم في معظمه.... بس عايز أوضح بعض النقط في الاقتباسات اللي تحت .. واللي يمكن يكون عاملة لبس لبعض الناس:

المشاركة الأصلية كتبت بواسطة hassan_uwk

1- ليه الحرارة بتوصل 90 او بتعديها

المشاركة الأصلية كتبت بواسطة hassan_uwk

؟
انا هاقولك يا سيدي ليه الحرارة بتوصل 90 لان البنزين علشان يحترق علي اكمل وجه ويطلع اعلي واقصي قدرة ووجه استفادة لازم يكون في حاجتين أ- حرارة ب- اشعال
فلما الحرارة تبقي قليلة بيبقي الحرق اقل بيهبب البوجيهات و بيقلل كفائة الموتور وبالتالي السحب يقل وتاكل بنزين وتطلع بنزين ني من الشكمان .

الحرارة 90 دي مش درجة حرارة الاحتراق... دي درجة حرارة مياه التبريد... اللي بتسخن نتيجة الحرارة اللي طالعة من الاحتراق.

والمفروض نحافظ على درجة حرارة المية في حدود الـ90 درجة مئوية علشان نحافظ على كفاءة الاحتراق داخل السلندر عالية..

طيب لو درجة الحرارة نزلت.. إيه اللي بيخلي الاحتراق يبقى وحش؟؟؟

ببساطة كده... جدران السلندر ووش السلندر هتسحب الحرارة الناتجة من العادم...


طيب إيه المشكلة؟؟

العادم عبارة عن غاز... والغاز بيتمدد وينكمش بشكل أكبر بكتير جدا جدا من أي مادة تانية... وانكماش الغاز معناه ضغط أقل... والضغط الأقل معناه قوة أقل على البستم... يعني قوة الموتور انخفضت.


وعلشان تاخد أداء معقول لازم نزود كمية الغاز... يعني لازم نحرق بنزين أكتر ... يعني نسبة الوقود بقت أكتر من المعتاد مع وجود نفس كمية الهوا المعتادة...

وتبقى النتيجة إن ناتج الاحتراق يبيقى فيه بنزين لسه ما اتحرقش بشكل كامل .. وده اللي بيخلي العربية تهبب.

المشاركة الأصلية كتبت بواسطة hassan_uwk

2- طيب ليه الحرارة بتعلي علطول وبسرعة عندي حتي وانا واقف وتشتغل المروحة التانية و تقعد تشتغل وتطفي والحرارة بتفضل ثابتة علي 90 -80 ؟

المشاركة الأصلية كتبت بواسطة hassan_uwk

بص يا باشا الموتور فيه حاجة اسمها دورة تبريد الدورة دي فايدتها تحافظ علي الموتور من السخونة الزيادة الي تخلي المعادن بتاعة الموتور تتمدد ويقفش وما ينفعش يفضل بارد علشان زي ما قولنا الحرق يبقي تام ف عملوا حاجة اسمها ثرمو ستات دي بتبقي راكبة في كوعة المياه الي الي ف وش السلندر وظيفتها ايه يا معلم لما المياه بتسخن نتيجه سخنيه الموتور في نسبة ضغط نتيجة تمدد المياه والبخار ف هي بتفتح عن ضخط معين والضغط دا بيكون عنده الحرارة بين مثلا 80-90 درجه وتبداء تشتغل دورة التبريد واول ما الحرارة تنزل بتفصل المروحه وبتتقفل الدورة لحين ارتفاع الحرارة ولما تعلي بتتفعل الدورة بتاعة التبريد علشان تحافظ علي الحرارة .

دورة التبريد هي عبارة عن مجاري وخراطيم بتمشي فيها المية علشان تبرد الحرارة الزايدة اللي طالعة من الاحتراق في السلندر.... وسموها دورة علشان الخطوات بتاعتها متكررة (اكتساب حرارة من السلندرات والموتور - انتقال إلى الرادياتير - فقد الحرارة في الرادياتير - نقل إلى الموتور.. .. ثم اكتساب الحرارة مرة أخرى وهكذا)

وأجزاء دورة التبريد مكونة من الآتي:

1- مجاري المياه والخراطيم (الحاوية للمياه)
2- طلمبة مياه (علشان الدورة تشتغل)
3- رادياتير (علشان يبرد المية السخنة)
4- مروحة الرادياتير (علشان استمرار التبريد في حالة لو كان تيار الهوا الطبيعي مش كفاية)
5- محبس حراري أو "ثرموستات الكوعة" (علشان المحافظة على درجة حرارة ثابتة للمية)
6- حساس حرارة "ثرموستات كهربي أو ميكانيكي" (لتشغيل المروحة)
7- غطاء الرادياتير "أو القربة في بعض السيارات اللي ما فيهاش غطا رادياتير" (علشان تنفيس الضغط الزيادة في دايرة التبريد)
8- خزان مياه "القربة" (علشان تخزين المية اللي خارجة في حالة ارتفاع الضغط)
9- حساس عداد الحرارة (علشان تعرف درجة الحرارة كويسة ولا لأ)


دورة التبريد الصغرى (جوه الموتور بس ... بدون الرادياتير) بتبقى شغالة باستمرار مادام طلمبة المية شغالة... والطلمبة شغالة طول ما الموتور داير... ولما درجة حرارة المية توصل إلى 80-90.. ثرموستات الكوعة بيفتح علشان يودي المية للرادياتير علشان تتبرد

ثرموستات الكوعة بيفتح مع درجة الحرارة.. مش الضغط... لإن فكرته قائمة على التمدد الحراري.. ومالوش دعوة بالضغط نهائي... ده كمان مش محتاج أي كنترول كهربائي.


لو عايز تعرف أكتر عن ثرموستات الكوعة ممكن تدخل على الموضوعين دول:
http://www.nilemotors.net/Nile/410256-a.html
http://www.nilemotors.net/Nile/328708-a.html

المشاركة الأصلية كتبت بواسطة hassan_uwk

3- ليه الموتور بقي ما يقفش من السخونة زي ما انا بقول سؤال زكي ؟؟؟

المشاركة الأصلية كتبت بواسطة hassan_uwk

الخواجة الي عمل العربية لما جه للموتور ما عدتش عليه طبعا ان لازم الموتور يبقي من سبيكه معدن خاصة مصممه لتحمل درجات الحرارة والضغط المرتفع داخل غرفة الاحتراق والا كنت هتلاقي الموتور دا اتكسر لو شغلته تمام والناس بقي الي بتغير بساتم وشميز ومش بتجيب حجات اصلية من السبيكة الاصلية الي ذد التمدد وبتستحمل ضغط ما تزعلش لما متورك ما يتحملش سخونية وما تزعلش لما كل شوية تعمل وتغير شميز وبساتم .

الخواجة اللي عمل موتور العربية اختار أنواع معينة من المعادن متوافقة مع بعض.... وحسب حساباته بحيث إن المعادن دي لما تسخن وتتمدد تقفل الخلوصات ما بين الأجزاء وبعضها وتحكم عملية الاحتراق وما تخليش الضغط يهرب..

كمان في الأجزاء البعيدة عن السلندر.. بيبقى معمول حساب التمدد لإنها بتأثر على انتظام الحركة.


لما بتغير بأجزاء غير أصلية... تمدد الأجزاء دي هو اللي ممكن يكون مختلف .. أو بمعنى أصح... مش ماشي مع باقي الأجزاء اللي موجودة في الموتور.. بس ممكن جدا تكون ماشية مع موتور تاني بيستخدم مواد مختلقة تمشي معاه.


مسألة إن الأجزاء تستحمل الضغط مش هي المشكلة.... لو حضرتك جبت أي جزء معدني واديته سمك أكتر من 3 أو 4 مم هيستحمل الضغط بمنتهى السهولة.


الموضوع كمان مش مجرد حرارة وضغط... وزن الأجزاء الجديدة (البستم والبيل بالذات) عامل أساسي في عمر الموتور بعد العمرة... وكل ما كانت الأجزاء خفيفة تقدر تاخد أداء أحسن.

المشاركة الأصلية كتبت بواسطة hassan_uwk

5- الميكانيكي قالي لازم اظبط تاكيهات اول الصيف واول الشتاء عليشان الحرارة والجو وكدا ؟
والله انا تعبت اشق هدومي يعني ما فيش حاجة اسمها الكلام دا ظبطه التاكيهات لو مظبوطة صح بالفلر وبمقاس الكتالوج بتاع الصيانه للبنزين والعادم والميكانيكي بيه بيراعي ان العادم بيبقي اكبر من النزين ما كنش هايقولك كدا وما كنتش هاتسمع صوت تاكيهات عالي وبعدين تاني اهو الحرارة بتاعة الجو ما بتاثرش علي حرارة المحرك مهما كان خلاص دا مستحيل علميا وعمليا فمش هتاثر علي التاكيهات لان المعادن مش هتتمدد زيادة او هتقلص زيادة عن الحد الي الخواجة حسبه

أفضل شيء لضبط التاكيهات هو ضبطها على الساخن (مش على البارد زي ما هو معروف)

لإن الأجزاء المعدنية بتكون اتمددت للوضع الحقيقي للتشغيل.. باعتبار إن درجة حرارة التشغيل ثابتة بفضل ثرموستات الكوعة


ولو الصانع كان بيقول إن الضبط يكون على البارد.. فده لازم يكون في درجة حرارة معينة.. غالبا بتبقى 20 درجة مئوية... وده معناه إنك لازم تظبط عربيتك في مكان مكيف.

المشاركة الأصلية كتبت بواسطة hassan_uwk

فلو انت جايب عربية استيراد لازم توديها للوكيل علشان يعمل التعديل المناسب لكي تكون مناسبة مثلا يزود قوة المروحه يغير الثموستات لو المياه الي خارجة من الموتور فيها نسبة راجع علشان الموتور ما يبردش خالص فبيلغيها الطرمبة لو انها بطيئة بيغيرها دا الكلام الي المفروض يتعمل

وكفائة التبريد دي بتتفاوت من عربية لاخري لان كل عربية محتاجة تبريد بقوة معينة فبلاش تلعب فعربيتك وتغير حاجة بحاجة تاني وكمان كفائة التبريد دي تحسبها لو موتور عربيتك سليم من العيوب المزكورة اعلاه وعندها بيكون الحرارة لما بتعلا مثلا عن 90 تشوف العربية بتبرد نفسها ولا لاء وتشوف الحرارة في كتيب استخدام العربية وعلي اساسها بتقارن وتشوف لو في خلل ارجع للتوكيل او روح لميكانيكي يحللك العيب ويصلحه

كفاءة التبريد بتبقى أساسا جاية من استخدام رادياتير أكبر أو كفاءته أحسن من ناحية تصميمه بـ3-مواسير مثلا أو تكون المساحة المعرضة للهواء تكون أكبر.

أم بالنسبة للطلمة... فسرعة أي طلمبة هتبقى ثابتة بدون تغيير باستثناء تغيير دوران الموتور.. لإنها متوصلة بشكل مباشر على السير الأمامي...

كل الموضوع هو استخدام طلمبة ليها ريش داخلية أكبر أو أكتر.. وبالتالي تيار المية هيبقى أسرع.

على فكرة... كفاءة التبريد لو بقت أكبر مفيش منها أي مشكلة طول ما ثرموستات الكوعة سليم.