قصه لقائى باحد اليابانيين,,, احنا فعلا معندناش اخلاق

**blazer** · 02-05-2014 04:01 AM

السلام عليكم ورحمة الله وبركاتة

عاوز احكى ليكم عن حكاية حصلت من يوم

من 4 سنين ,,,اختى الكبيره كانت بتدرس قران فى احد المساجد الى كان بيجى فيها اجانب لسه داخلين الاسلام جديد و بيتعلموا قران و عربى
فاتعرفت على بنت من ضمن البنات الى بيدرسو فى المسجد و بقوا اصحاب لانها كانت ساكنه جمبنا
البنت دى من اليابان
كانت ديانتها البوذيه ,, و اعتنقت الاسلام و اتجوزت راجل مصرى و كانت الزوجه الثانية ليه
و ابتدت تتعلم عربى وقران لما جت مصر ,,, بعد ما سابت اليابااان جت تعيش فى مصر!
سابت شغلها " على ما فهمت منها انها بتشتغل فى كمياء الاغذيه الحيويه يعنى حاجه معقده ومش موجوده فى مصر اصلا "
وجابت كل مدخراتها و اودعتها فى احد البنوك المصريه لانها كانت فاكره انها خلاص هتستقر هنا "

عاشت مع زوجها ولاكن للاسف بدون الدخول فى تفاصيل ,, عاملها معامله سيئه و كان معيشه فى شقه اقل ما يقال عنها انها معفنه جدااا وكمثال كان جايب لها ثلاجه اديال قديمه من الى بتعمل ثلج ! و كانت راضيه و مبسوطه لولا انه كان مبيزرهاش الا كل كام يوم مره عشان مراته المصريه متزعلش

طبعا بعد فتره زهقت و اتطلقت منه ورجعت اليابان ولاكن معرفتش تجيب مدخراتها عشان كانت حطها فى وديعه و مكسرتهاش و كانت لمده 3 سنوات
فرجعت اليابان

و جت الاسبوع دا مصر عشان تاخد فلوسها
وجت زارت اختى و انا كنت عند اختى بزرها بلصدفه ودى كانت اول مره اشوف البنت دى

البنت ارتدت عن الاسلام بعد ما كانت ابتدت تحفظ قران و تتعلم عربى مع انها لما جت مصر جوزها السابق حاول يرجعها بس هى رفضت تماما

وقعدت شويه معاها اتكلمنا " اول مره اتعامل مع حد يابانى " وهى بتتكلم انجليزى كويس فكنا فاهمين بعض
البنت قمه فى الادب و الاخلاق ,, لدرجه انها مكانتش بتفتح بقها بكلمه الا لما حد يوجه ليها كلام او يسالها او تبقى فى حوار حوالين اى موضوع

صوتها يادوبك بتسمعه ,, حتى لو بتضحك متسمعش حسها

مرتبه و شيك جدا فى لبسها وهندامها و لبسها محتشم ! يعنى لبسها واسع و لما بتنزل الشارع بتلبس جاكت بكم واسع و طويل و طاقيه كبيره تغطى شعرها " راحت مارينا يومين فسالتنا هو ليه مفيهاش مسلمين هناك ,, عشان شافت كل البنات مش محجبات ولبسهم مش محتشم "

دا غير انها فى كلامها مذكرتش نص كلمه وحشه عن مصر او المصريين مع اننا بلنسبه ليهم مقلب زباله
واحنا ماشيين بلعربيه موصلنها لما شافت عربيه كارو مثلا و العربيات الى ماشيه عكس اتجاه و التكاتك و الموتوسيكلات و الى فارشين على الرصيف و الشوارع المكسره,,, معلقتش باى كلمه مثلا ان فيه حاجه مديقاها
وحجات تانية كتير لاحظتها فى الساعتين تلاته الى قعدتهم معاها
وطبعا بعد ما مشيت كنت مصدوم من الفرق الى بشوفه فى التعامل مع المصريين و العرب عموما و الفرق بين طريقتها و طريقه البنات المصريين و العرب فى التعامل ,, ومازلت مصدوووووم :( !

**Mohab.Nabil** · 02-05-2014 04:58 AM

يا باشا عشان كده ببساطة هى اليابان

دولة من غير اى موارد طبيعية و اتدمرت فى الحرب العالمية و بقت دلوقتى اليابان اللى هى علامة الجودة فى كل حاجة

الموضوع ده اكيد بيبدأ من تعليم الاطفال من الصغر على الاخلاق و النظام و احترام الغير و تقبل الاخر

يا رب نبقى فى يوم نص اليابان حتى

**Mahmoud/Nabil** · 02-05-2014 06:32 AM

ارتدت !!! قال عليه الصلاة والسلام : من بدل دينه فاقتلوه
حضرتك بتقول قمة الاحترام ... احترام ازاي ده .... و معلش حضرتك كاتب ارتدت دي زاي اكنها اكلت ايس كريم بس طلع لذيذ اوي !!!!!!!!!!!!
معلش ممكن الرد ميعجبكش بس انا مش فاهم بجد حضرتك بتكلم عنها كويس ازاي !!

**hhhhhm** · 02-05-2014 07:05 AM

المشاركة الأصلية كتبت بواسطة mahmoud/nabil

ارتدت !!! قال عليه الصلاة والسلام : من بدل دينه فاقتلوه
حضرتك بتقول قمة الاحترام ... احترام ازاي ده .... و معلش حضرتك كاتب ارتدت دي زاي اكنها اكلت ايس كريم بس طلع لذيذ اوي !!!!!!!!!!!!
معلش ممكن الرد ميعجبكش بس انا مش فاهم بجد حضرتك بتكلم عنها كويس ازاي !!

يا أستاذ نبيل كامل أحترامى وتقديرى لشخص حضرتك وللعلم أنا مسلم ----------------------
بس عفوا بيتهيألى أنها لو قرأت الكلام أللى حضرتك كاتبه ده أو أى حد بيفكر مجرد تفكير يدخل الأسلام قرؤه بيتهيألى مش هايكره الأسلام بس دا هايكره الأسلام والمسلمين واليوم اللى فكر فيه مجرد تفكيرأنه يدخل الأسلام
(رجاء تقبل رأيى بصدر رحب)

**أبو آسر** · 02-05-2014 08:39 AM

أعتقد الست دي محتاجة تشوف الإسلام على الواقع متجسد في أخلاق إنسان مسلم حقيقي علشان ترجع تاني أكتر من أن يطبق عليها حد الردة عن الإسلام اللي أكيد شافت عكس ما يأمر به ويحض عليه في أخلاق زوجها المصري وأعتقد أيضا أن وزر ردتها عن الإسلام يقع على زوجها الكفل الأكبر منه والله أعلم
طبعا أنا لا أعترض على حد الردة عياذا بالله اللي مش بيطبق أصلا بعد أن صرنا في ذيل الأمم
بس أنا ليا سلف في كلامي وهو أمير المؤمنين العادل عمر بن الخطاب رضي الله عنه الذي عطّل حد السرقة في عام الرمادة
بالإضافة إلى أن الحدود تدرأ بالشبهات وأعتقد أن رؤيتها على أرض الواقع لإسلام عكس الذي قرأت عنه في الكتب وتعلمته من أكبر الشبهات التي ممكن أن يدرأ عنها بها تطبيق حد الردة
والله أعلم

**mgheam** · 02-05-2014 09:01 AM

.....................................
.................................................. ...........
.................................................. ..........
.................................................. ...........
.................................................. ................
.................................................. ............

لا أهلا في المنتدى بمروجي الإلحاد والكفر
تعليقاتك تمس صحيح الدين وتهاجم العقائد
مشاركاتك مخالفة للقاعدة 9 والقاعدة 12
تم مسح تعليقاتك وتم وقفك نهائيا

**samaty** · 02-05-2014 10:50 AM

قال رسول الله صلى الله عليه وسلم :
"أنا زعيم ببيت في ربض الجنة لمن ترك المراء ولو كان محقا"
المراء أي الجدال
قال الله تعالى :
" وإذا سمعوا اللغو اعرضوا عنه وقالوا لنا أعمالنا ولكم أعمالكم سلام عليكم"
"وعباد الرحمن الذين يمشون على الأرض هونا وإذا خاطبهم الجاهلون قالوا سلاما"
----------------------------------------------------
أجمع العلماء على أن حد الردة لا يطبق بمجرد خروج الشخص من الاسلام
وإنما يجب أولا النظر في أسباب إرتداده
وإن كان لديه شبهة أزيلت ثم يستتاب بعد إقامة الحجة عليه ثم يقتل إن استمر معاندا مكابرا
أما إذا لم يستطع احد الرد على الشبهة فلا يمس المرتد
كما حدث في عهد المأمون في فتنة السمنيين حيث مكثوا ثلاثة أشهر لما لم يستطع العلماء الرد على شبههم
وتركوا بمقالتهم التي تنكر قدرة الله تعالى إلى أن قيض الله أحد علماء المعتزلة الذي فند شبهتهم واقام عليهم الحجة

**محمد مجدى** · 02-05-2014 12:09 PM

انا عندى مشكلة قريبة من مشكلة الاستاذ صاحب البوست ؛ اتعرفت على واحدة امريكية فى مصر فى شرم الشيخ عن طريق الفيس بوك ؛ الست عايشة فى شرم الشيخ بقالها 5 سنين وكارهه شرم الشيخ لدرجة انها بتقول عليها sharm el shit ؛ هى مهندسة ولفت العالم كله بما فيهم افغانستان وباكستان وقالتلى اللى بيحصل هنا محصليش قبل كده ابدا ؛ حكتلى انها كانت متجوزة مصرى وطلع عينها ده غير اصحابها الانجليز والمجرين اللى اتجوزوا مصرين وطلع عينهم ؛ حكتلى انها مش مسلمة بس بتضطر انها تلبس الحجاب لانها فى يوم وهى رايحة تشترى اكلها قابلت واحد قالها تعالى نعمل سكس ! ولما قالتله انها مش مسلمة اعتذر لها وقالها i am sorry sister ! هى بتسألنى هو المفروض اكون مسلمة علشان محدش يتحرش بيا ؟ حاولت طبعا افهمها انه متخلف ؛ ده غير انها بتقول انها اشترت شقتها هناك باكتر من سعرها لانه اتضحك عليها وكل حد بتقابله بيحاول يستغلها ؛ طبعا انا بحاول اقولها ان مش كل المصريين كده و اننا كمسلمين كويسين ودعتها انها تيجى اسكندرية وتشوف اهلى واحاول ازيل الفكرة الوحشة دى من دماغها ؛ احنا فعلا محتاجين نتغير كتير اوى

-

-

الموضوع: قصه لقائى باحد اليابانيين,,, احنا فعلا معندناش اخلاق

LinkBack

أدوات الموضوع

عرض

قصه لقائى باحد اليابانيين,,, احنا فعلا معندناش اخلاق - انشر الموضوع فى :

-

-

-

المواضيع المتشابهه

هو احنا فعلا عنينا زايغه اوى كده؟؟؟؟؟

احنا ليه معندناش خط اتصال مع مهندس من جوة توكيل كيـا هنا ؟

المدام قالتلي النهارده احنا ازاي معندناش سلاح

اشمعنا احنا معندناش فلتر تكييف

هو احنا كنا كده فعلا؟

الكلمات الدلالية لهذا الموضوع

المفضلات

المفضلات

ضوابط المشاركة