مشاكل كهرباء بميجان 2006 ومش عارفلها تفسير

**أسامه الحسيني** · 05-05-2014 10:34 AM

الاخوة الاعزاء عندي مشكلتيين ومش عارفلهم تفسير
1- غسلت العربية بالماية من الخارج وبعد ما نشفتها جيت ادور لقيت لمبة الـ Service & Air bag منوريين فصلت البطارية بتاع 20 دقيقة وفكيت فيش Air bag الى تحت الكراسي ونظفتها مع ان ماكنش فيها حاجة وركبتهم تانى لقيت نفس المشكلة رحت مكرر الموضوع دا بعدها باسبوع بردة نفس المشكلة فيا ريت اية ممكن تكون المشكله

2- من اسبوع كدا بتظهرلي رسالة Electronic Fault ولحظيت انها بتظهر بليل بس يعني لما بشغل نور العربية لما كنت بفصل العربية وشغلها تانى تختفي وتظهر بعد ما بمشي بيها شوية بدون ما بتأثر على اداء العربية وحاليا لما بتظهر بطفي نور العربية تختفي ولما اشغلة تانى تظهر بعد شوية ولاحظت كمان ان النور الاحمر الخلفي بتاع الفرمل لو بالنهار لما بدوس فرامل شغال تمام لكن باليل لما بشفل نور العربية بيشتغل معاه ولما بدوس فرامل الدرجة الثانية للنور الاحمر مش بتشتغل مع ان المفروض ان فية نور احمر تاني للفرامل ولا انا غلطان ومش عارف المشكلة ممكن تكون فين مع انى نظفت فيشة الـ Stop الى هي فوق دواسة الفرامل ورجعت على الفيوز كلها
ولكم جزيل الشكر

**m_elbog** · 05-05-2014 10:43 AM

بصراحة مش بيضايقنى ويزهقنى فى العربية دى غير مشاكل الكهرباء

**أسامه الحسيني** · 05-05-2014 02:19 PM

المشاركة الأصلية كتبت بواسطة m_elbog

بصراحة مش بيضايقنى ويزهقنى فى العربية دى غير مشاكل الكهرباء

وماله كل العربيات ليها مشاكلها لكن الفكرة ان كل مشكلة مفروض يكون ليها سبب منطقي

**Super_Star_h** · 06-05-2014 02:20 AM

فعلآ عربيه كلها مشاكل كهربا لدرجه تزهق
روح لكهربائى يكون فاهم بس
وربنا يعين

**محمود سامح** · 06-05-2014 04:30 AM

المشكلة بسيطة جدااا 75 % من الميجان فيها العطل ده وحلها انك تشوف ماكينة الاستوب ممكن تكون عاوزة تنظيف او باظت وسهل تغيرها وممكن تكون معلقة وهى ماكانها عند دواسة الفرامل

**elhelawy** · 06-05-2014 06:41 AM

المشكله رقم 1 معنديش خلفيه عنها
لاكن المشكله رقم 2 غير ماكنة الاستوب هتلاقى الدنيا ضبطت عندك وهى فى حدود 90 جنيه الاصلى انا لسه مغيرها
وفى معلومه لازم تعرفها ان الرسالة بتاعة اليكترونيك فوولت بتطلع لما يكون فى عطلين بس اللى هما
1- ماكنة الاستوب
2- فى ثلاث فيوزات بيبقوا موجودين على قوطاش البطاريه ال+ دول لو فيهم حاجه تديك نفس الرساله

**أسامه الحسيني** · 18-05-2014 02:44 PM

المشكله طلعت فيا انا
بالنسبة للمشكله الاولى لسة قائمه واعتقد انها ممكن تكون من شريط الايرباج بس لسه مش متاكد
اما بالنسبة للمشكله التانية (الحمد لله الذي هدانا لهذا وما كنا لنهتدي لولا ان هدانا الله ) طلعت من لمبة الاستوب لانها لما تلفت غيرتها بلمبة 21 وات عادية زي بتاعت الرجوع للخلف وهي دى الى كانت عمله المشكلة بتاعت الـ Electronic fault

**mm007hh** · 02-06-2014 09:47 PM

الاير باج هيفضل منور لازم يطفى من عن طريق الكمبيوتر و ده هتلاقيه عند حد عنده برمجه للعربيه انا معرفش غير حمدى بيرو بتاع الحرفين ده اللى فى اسكندرية 01281760666 و الباقى كله هيحلهولك لو برمجلك اليو سى اتش