أنا اعرف الكثير عن نفس الشكل ولكن الأمريكي 2013 وعرفت انهم هيجمعوها من قريب لي من فتره طويله ومن ساعتها وأنا منتظرها .

أول ما اتعرضت رحت لبعض المعارف وقعدت ساعتين ونص افلي في العربيه هاختصرهم في بعض الملاحظات مالها وما عليها وهاقارن بينها وبين بعض ال SUVs من واقع تجربتي الشخصية معاهم

في مصر منزلين فئتين اللاريدو بـ500 ألف والليمتد بـ 550 ألف الإتنين بموتور هيمي 5700 مع التحفة الالمانيه الفتيس ال 8 سرعات ZF مع خاصية الشفتات من الدركسيون.

الاولى فعلا لاريدو جنط 18 وشاشة 5 بوصه وبدون حساسات و افقر بكتير من الفئة التانيه أما التانيه فهي اسما بس في مصر ليمتد لكن على حسب التصنيف الأمريكي للجيب فهي اقرب بكتير إن مكنش فيها مواصفات أعلى من الفئة الاعلى ''الأوفرلاند'' اللي فيها الجنط ال 20 والجلد الطبيعي مع الخياطات البيضاء , المرايات والمقابض الكروم ,الهوك الامامي المزدوج , حساسات اماميه وخلفيه , وغيره من مواصفات أعلى بكتير من مواصفات الليمتد وأهمها نظام الترفيه الخلفي مع السماعات الوايرلس وشاشتين 9 بوصه وإن كان ده بينزل في امريكا زي كتير من الكماليات بالطلب وطبعا تحفة كريزلر نظام ال يوكنكت مع شاشه 8.4 بوصه باللمس بتتحكم في معظم وظائف العربيه تقريبا .

تقفيل السياره '' ممتاز '' بلا مبالغه وإن كان فيه كام حاجه بسيطه تتوه عن عين المشاهد العادي غير الفاحص منها جراب النضاره محتاج تغير وده سهل يتجاب الأمريكي بتاعه لانه خامته سيئه وكمان المخدع اللي في النص الجزء العلوي منه خامته سيئه.أغطية السماعات محتاجه تتغير بالامريكي للغاوي .الصالون وفرش السياره ككل من كراسي وفرش ابواب وجلد ابواب وجلد تابلوه وموكيت ممتاز .

الكاوتش كومهو وده بردو اللي بينزل في الأمريكي .

العربيه للوهله الاولى محستش إن فيه فرق بينها وبين الأمريكي وبالمناسبه الدفعة الاولى من أي عربيه تتجمع في مصر هي أحسن دفعة تشتري منها لسبب بسيط وهو إن نسبه ال 40% مصري منها بتكون غالبا على الورق ومعظمهابتكون مستورده .

أكتر حاجة قالقاني إن العربيه دي بقت زي الأوروبي كلها كنترولات وكهربة كتير وطبعا الضفيره مصري فممكن تحصل مشاكل بسبب الموضوع ده وإن كان مفيش مشاكل مثلا في BMW ومرسيدس اللي الضفيره فيهم مصري بردو لكن الموضوع استحق التنويه .

في الجراند 2014 جيب صلحت كتير جدا عن 2013 اللي فشلت فشل ذريع في الموس تيست وتقريبا كانت هتتقلب أما 2014 نجحت وابهرت مهندسين المعهد السويدي اللي عمل التست واصبحت 2014 ند بند في حاجات كتير لل X5 والتوارج أعدائها اللدودين في الثبات و في الفخامة وفي جودة البناء وده راجع للتدخل الواضح لمرسيدس و فيات فيها و إن كانت تتفوق بفارق مش صغير في قدرة ال Off Road عنهم ومينافسهاش في ده إلا اللاند كروزر والباترول.

ومن تجربتي رملة وصحراء رمليه الكروزر والباترول وحوش في الموضوع ده أما صخور وجبال الجراند على القمه . في المدينه جراند 2014 اخدت الطابع الأوروبي لل SUVs الفخامة والهدوء والبرستيج اللي يخليك ممكن تركبها وأنت لابس بدلة ورايح عشاء فاخر ..أنا معملهاش بالكروزر الصراحة !

بالنسبه لمقارنة الجراند ب ال X3 فدي مقارنه مش في مكانها تماما , صحيح ال BMW عملاق لكن مينفعش نقارن C300 من كريزلر مع 320 من BMW ونقول إن BMW جودتها أعلى !

ال X3 مش عربيه Off Road دي عربية مدينه مرتفعه عن الأرض شويه وحجمها اصغر بكتير من الجراند , الجراند جنبها زي ابوها ! أنا اقف وأفكر ألف مرة لو بقارنها مع X5 أما مع X3 الموضوع محسوم و بصراحه لو هادفع 550 ألف هادفعهم في الجراند مش في ال X3 ... جراند 2014 مش هتزعل أي حد يسيب ال X3 بسببها بالعكس هياخد حاجات تانيه أكتر بكتير مش هيلاقيها في ال X3 .



بعض الصور السريعه من المصنع
















صور عامه للعربيه من الإنترنت