الموضوع: تجربة تركيب جهاز تتبع tk106 بالسيارة بالتفاصيل

المشاركة الأصلية كتبت بواسطة japrulez

معلش سوأل ...
هو الجهاز ده فى لعب كتير فى العربيه عشان يتركب ؟
ليه مجبتش الجهاز بتاع الحكومه و فودافون ؟
هل فيه ارخص من كده ؟
هل الحرامى ممكن يتغلب على الجهاز ده لو ميكانيكى كويس ولا ده هيعطله بس ؟
فى حاله السرقه لا قدر الله ممكن تقولنا السيناريو فى حاله التثبيت و فى حاله ايضا صحيت الصبح مثلا و ملقتهاش ؟
شكرا جزيلا

اسئلتك مهمة جدا وان شاء الله اجاوب عليهم كلهم ونفيد حضرتك والناس كلها


[overline]هو الجهاز ده فى لعب كتير فى العربيه عشان يتركب ؟[/overline]
تركيب الجهاز مفيهوش لعب كتير ولا حاجة . الموضوع بسيط ولو فيه حد بيعقده ممكن لمصلحة شخصية عشان يعملك حوار على الفاضى
انا شخصيا ركبته بدون اى مساعدة من كهربائى لانه سهل زى مقلت
تركيبه بيتطلب توصيل كهرباء ( موجب و سالب ) من البطارية او من اى مصدر ثابت للكهرباء وان كنت بفضل من البطارية الى الجهاز اللى انت ممكن تخبيه فى اى مكان وبمفروض يكون مختفى بس توصله بسهولة برضة لو انت حبييت

تانى حاجة وده المهم انك هتركب كتاوت اللى جاى مع الجهاز فى دائرة الكهرباء الاساسية او الكهرباء المغذية لطرمبة البنزين ود مش صعب الوصول اليه , ( تقدر تشوف فين الطرمبة وبعدين تحدد اسلاك الكهرباء و تقطع واحد منهم توصله بالكتاوت بتاعتك )
الموضوغ غير مقلق لان الكتاوت دى نوعها موصلة بطبيعتها من غير اى تشغيل
الكتاوت او الريلاى ده بتوصله اربع اسلاك
2 للدائرة المقطوعة ليتم توصيلها
و 2 تانين بالجهاز التتبع
لو فيه حاجة مش واضحة انا هبقى سعيد اوضح ان شاء الله على قد ماقدر


[overline] ليه مجبتش الجهاز بتاع الحكومه و فودافون ؟ [/overline]
لان ببساطة حكومتنا كالعادة عاملة شركة واحدة لاحتكار الموضوع ده فى مصر وده مغلى سعر الجهاز جدا تقريبا نفس المواصفات دى ب 1600 او اكتر و كمان بقولك فيه اشتراك شهرى 75 جنيه تقريبا يعنى 900 فى السنة وده تكلفة عالية جدا معتقدشى واحد بيفكر يدفعها ابدا .
بالعربى تدفع سعر عالى للجهاز وكمان اشتراك سنوى 900 جنيه
انما الجهاز ده ارخص تقريبا النصف ّ825 ومفيش اشتراك شهرى
حاجة كمان انا شايفها مهمة جدا : عامل الامان من ناحية انك شركة الحكومة مع فودافون هيبقوا عندهم كافة المعلومات عن سيارتك ونوعها ومتركب ازاى فى العربية وفين وبتروح فين وبتيجى منين وكمان طبعا رقم الشريحة اللى هما هيركبوها . يعنى بالعربى انت هتبقى مراقب من جهة بدون اى داعى وطبعا المعلومات دى لو اتسربت او انت كان عليك عين من حد فى الحكومة هيبقى سهل قوى يسرقوا العربية لانه هو اللى مركب وعارف نوع عربيتك كمان
الجهاز التانى ده انت اللى بتركب ومخبيه فى اى مكان فى العربية( ولا انصح بكهربائى لنفس سبب المان اللى ذكرته من شوية )
وكمان انت اللى بتشترى خط عادى وممكن تغيره لو حبييت فمحدش عارف الرقم ده لايه. كمان التحكم بالسيارة هيبقى من خلال ارقام سرية انت اللى محددها وده بيزود عامل الامان برضه جدا


[overline] هل فيه ارخص من كده ؟[/overline]

فى مصر سالت كتير اقل حاجة فى الاجهزة النضيفة اللى بتفصل العربية كدة حوالى 1000 جنيه
اينعم الاجهزة ديه صينى بس فيص صينى يفرق كتير عن صينى تانى
الصين بتعمل اى حاجة باى تكلفة و ده بياثر على الكفاءة طبعا
ادريان سالت بيبيع ب حوالى 1250 وامكانيات اقل كمان ( والكفاءة معرفشى لاننى مجربتش )


[overline] هل الحرامى ممكن يتغلب على الجهاز ده لو ميكانيكى كويس ولا ده هيعطله بس ؟[/overline]
طبعا كل شىء قداء وقدر و لو مكتوبلك حاجة هتشوفها بس طبعا لازم ناخذ بالاسباب ونامن نفسنا على قد منقدر.

من الناجية دى اطمن لان الحرامى عادة معندوش المعلومات ديه وحتى لو عنده هيعرف فين مكان الجهاز الا لو انت قايله او هو بنفسه اللى مركبه :)
انت ممكن تخبى الجهاز فى مكان والكتاوت فى مكان تانى وده هيصعب عليه المهمة , بل مستحيلة
وكمان ميعرفشى رقم الشريحة ولوعارفة معهوش الارقام السرية
اللى بسرق بيبقى جبان جدا , وبيراقب ويسرق بسرعة , لو اخذ وقت بطلع يجرى
الجهاز فيه امكانيات عالية قوى منها انك توصله بجهاز الانذار بتاع العربية او الباب فه بدل ما النذار يعمل دوشة ملهاش اى 30 لزمة يبعتلك رسالة , وممكن لو العربة اتحركت من مكانها يبعتلك رسالة فورا بانها اتحركت ومكانها وسرعتها و حاجات تانية كتير موجدة بالمانوال بتاع الجهاز هحاول الاقيه على النت و ارفقه هنا

[overline] فى حاله السرقه لا قدر الله ممكن تقولنا السيناريو فى حاله التثبيت و فى حاله ايضا صحيت الصبح مثلا و ملقتهاش ؟ [/overline]

ربنا يبعد عننا ولاد الحرام امين
لا قدر الله فى حالة السرقة لو انت مظبط الجهاز يبعتلك رسالة لو اتحركت او مع جهاز الانذار او الباب فى الحالة دى هتعرف فى ساعتها وبالتالى هتتصرف اسرع وافضل
لو مش مظبط واكتشفت متاخر شوية هتتابع مكان العربة عن طريق تتبعها على ال موقع السيرفر او حتى بالتليفون و ساعتها فى الوقت المناسب والمكان المناسب ( اللى تكون انت قريب منه طبعا ) وتكون العربية واقفة او ماشية بسرعة خفيفة تفصل العربية . الحرامى هيضب لخمة و يخلع تيجى تاخد العربية وكان شىء لم يحدث
فى حالة التثبيت اولا موقف صعب طبعا ولو تهرب منه ياريت بس تكون متاكد , لو شاك : فيه كذا حاجة ممكن تدوس على زرار الاستغاثة ساعتها الجهاز تلقائى هيبعت رسالة استغاثة للارقام المسجلة فى الجهاز ( اصحاب , اقارب . الخ )
تانى حاجة ممكن تسيبله العربية بدون اى عنف للحفاظ على سلامتك و سلامة الركاب و تسيبه يمشه بيها و بعدين فى اقرب فرصة و فى مكان امين تقدر تفصل العربية و ساعتها هيسيبها فى مكانها برضه ويمشى

فى حالة انه فصل البطارية وده صعب لانه مش هيعرف يمشى بالعربية , الجهاز بداخله بطارية هتشتفل لمدة تقدر تلحق العربية فيها او فى حالة فصل الجهاز نفسه هيبعتلك رسالة بقطع الكهرباء عنه لانه هيكمل بالبطارية
فى حالة اكتشاف المكان الجهاز وده صعب جدا و فصله بعد ما العربية تكون فصلتها , برضه مالهاش لازمة لان الكتاوت فى مكان تانى و ده اللى ماسك الكنترول ساعتها


عموما لو حد محتاج مساعدة فى تركيبه يقدر يسألنى وان شاء الله نفيد الجميع

ارجو التثبيت بعد اذن الادمن لتعميم الفائدة

مستعد لشرح تفاصيل اكتر لو مطلوب منى اى تفاصيل اخرى

انا بفكر جديا في الموضوع ده وخصوصا اني مش هجدد التامين الشهر ده بعد ما غلوا الريت قوي...فياريت لو حد زي نجمع نفسنا

المشاركة الأصلية كتبت بواسطة amro_on

انا بفكر جديا في الموضوع ده وخصوصا اني مش هجدد التامين الشهر ده بعد ما غلوا الريت قوي...فياريت لو حد زي نجمع نفسنا

هو التامين بيغطى سرقة العربية ؟ انا لا اعتقد

المشاركة الأصلية كتبت بواسطة himaz

هو التامين بيغطى سرقة العربية ؟ انا لا اعتقد

ايوه بيغطي بنسبة 75% من قيمة العربيه

المشاركة الأصلية كتبت بواسطة Mico_Mico

انا مش فاهم بردو - هو انا لازم ابقى موصل موبايلى عالنت عشان الجهاز يتصل بيه لما العربية تتسرق؟
ولو اتسرقت وانا فالبيت بخش على موقع السيرفر من الكمبيوتر عادى وابقى عامل يعنى اكونت بحيث مش اى حد يخش عالموقع يفصلها ؟
انا مش فاهم حاجات كتير من طريقة عمل الجهاز يا ريت لو فيه موقع عليه الكتالوج بتاع الجهاز او لو تكرمت ونزلتهولنا يبقى كتير خيرك

استاذ Mico
لا مش لازم توصل مويايلك على النت ولاحاجة
كموضوع النت ده للتسهيل لتتبع السيارة بس انت بموبايلك (حى لو مفيهوش نت ) تقدر تتحكم فى العربية من خلال رسائل النصية القصيرة

الموقع للتسهيل وتكلفة تتبع السيارة اقل لان ان الجهاز التتبع يكون بيبعت مكانه للموقع ده ارخص من عدد من الرسائل فى تمن ارسال الرسالة بس ده اختيارى لو مش محتاج تتنبعها على طول يعنى

لو بس عند الضرورة فالرسائل sms زى الفل تكفى لمعرفة مكان العربية او معرفة لو سابت مكانها او ماشية بسرعة عالية او دخلت او خرجت من مكان او مدينة معينة


الكتالوج اهوه تقدر تنزله و تشوف كل التفاصيل :
http://www.binxincheng.com/upload/file/1286441727.pdf

المشاركة الأصلية كتبت بواسطة ahmedfor3

سوال لحضرتك هو انا لو جبت تليفون بخطين مثلا
وخبيته فى العربيه وشحنته كل فتره مش ممكن يكون نفس الموضوع والتليفون مش لازم يكون غال ممكن تليفون ب 100 جنيه اللى هو من سامسونج والبطاريه بتعيش من 5 ايام ال6 ايام طبعا فى حالة عدم الاتصال هل ده ممكن ينفع فى حالة السرقه وشكرا لحضرتك اسف على الاطاله

شكرا للسؤال استاذ ahmedfor3
طبعا سؤال جميل جدا بس للاسف الاجابة مينفعشى اى موبايل
لاسباب عديدة منها ان الجهاز ده فيه جزء التوصيل بنظام الملاحة GPS واللى عن طريقة بيتم تحديد موقع السيارة باحداثياتها بالظبط فين و على ارتفاع كام كمان
الفكرة كمان ان جهاز التتبع مخصص للتحكم فى دائرة السيارة و يتم توصيله بالكهرباء او البنزين
الجهاز يتم توصيلة بكهربة العربية مباشرة لضمان تشغيل الجهاز على طول من غير مانت كل شوية تشحنه و كمان فيه بطارية داخلية بتشتغل اوتوماتيك لو البطارية اتفصلت او فضيت
الجهاز يقدر يبعتلك انواع كثيرة من الانذارات منها تحرك العربية من مكانها , سرعة عالية يتم تحديدها , خروج او دخول منطقة يتم تحديدها , لو حد استخدم زرار الاستغاثة . لو البطارية اتفصلت او اتسرقت او حتى فضيت وساعتها انذار ظريف جدا يقولك البطارية بتودع :)
طبعا الكلام ده غير متاح فى اى موبايل لان الجهاز مبرمج بكل المطلبات دى