الموضوع: للرجالة اللي شركت في مصنع الملابس ارجو الرد

الملابس انواع يعنى مفيش مصنع ملابس متخصص فى كل حاجه يعنى فيه مصنع ملابس داخلى وايضا خارجى ترينجات وعبايه وفيه مصنع قميص وفيه بنطلون جينز وكتييييييييييير
المصانع اغلبها تخصصات على فكره موال المصنع كبير كنت فاتح ملابس وقفلتها مشكله مع انى متخصص وملم بالموضوع لكن مراحل التصنيع كتيره وعماله الملابس مقرفه جدا لانها بتعتمد على البنات اولا ومفيش بنت مستقره فى الشغل والصنايعيه الرجاله بيبقوا شركاء مستريحين واحسن من صاحب المصنع كمان لانهم بيشتغلوا بالقطعه وحسابهم حاضر وانت بقى لما تبيع ربنا معاك صدقنى مشروع متعب والمخاطره فيه كبيره لعلمك انا بصنع اقمشه ومن مصلحتى مصانع الملابس تكتر :) لكن احنا من ايام الثوره بالظبط شغلنا خراب بيوت مش اكتر بنشتغل شهور قليله فى السنه يعنى لو جبنا مصاريفنا يبقى الدنيا زى الفل الحمد لله على كل حال وفيه ناس كتير جدا وقعت والديون زعلت ناس كتير وفيه ناس شغاله ربنا يبارك لها
نصيحه بلاش المشروع ده لانك مش فاهم فيه فهتكون سقطاتك كتير ولو قصه واحده بس باظت منك او الموديل مش مظبوط هتضيع لك كل حاجه

المشاركة الأصلية كتبت بواسطة merooxx

من اكتر الناس اللي بحترمها في المنتدي لاخلاصها وحبها وتمنيها الخير للجميع
بصراحة مشفتش اخلاص كدا
الف شكر علي كل هذه المعلومات القيمة وعلي وقت حضرتك



بس هوا المشروع اللي كانو متفقين عليه (مش بتاعي ) ولا. فكرت فيه
هما كانو قايلين انه مصنع (بديهات) زي كارينا وكدا
وقعد يقول انو مفيهاش مقسات وكدا

وعملو جروب علي الفيس بس شالوني منها


وانا بس كنت عاوز اعرف ايه اخبرهم وهل فعلا تم المصنع ولا


والف شكر علي معلومات حضرتك

الله يبارك فيك واشكرك على كلماتك الطيبه
انا افتكرت اك داخل فى شراكه
للعلم بادى الكارينا بالذات اللى عايز يقلده بالظبط مش هيبقى مصنع ملابس تقليدى يعنى كم ماكينه خياطه ومقص لالالالالالالا

الكارينا لها ماكينات تريكو دائرى متخصصه نوع منها والافضل هو ماكينه سانتونى الايطاليه الماكينه دى بتيجى جديده ب 650 الف جنيه وعايزه محترف يتعامل معها لانها سيستم كمبيوتر ومعقده جدا فى الميكانيكا
والماكينه نفسها بتعمل كل حاجه يعنى لو تلاحظ بادى الكارينا الاصلى مفيش فيه خياطه يعنى ماكينه النسيج بتنزل المنتج جاهز وبيحتاج حاجات صغيره جدا فى التقفيل بتعمل بردوا ملابس داخلى رجالى وحريمى (قطعتين وقطعه واحده) لوحدها برسوماتها ونقشتها وكل حاجه ماكينه تحفه وكان نفسى اجيبها لكن لقيت على الاقل خالص لازم العدد يكون 2 على الاقل ومع انى من فضل الله محترف تريكو دائرى بجميع فنياته ودورات فى اوروبا وسمعتى طيبه فيه لكن الماكينه دى بقف قدامها وازعل من نفسى لانى مش محترف فيها يعنى تشغيلها بس لكن معرفش اصلحها لانى متدربتش عليها ايام الشباب
يعنى الموضوع كبير كبير ههههههههه

المشاركة الأصلية كتبت بواسطة blazer

انا بصنع ملابس اطفال و بنزل منتج باسمى والحمد لله ,, الموضوع مش سهل زى ما اى حد ممكن يفتكر وارباحه ممكن تضيع كلها فى غلطه واحده لاا قدر الله و خصوصا ان السوق زى الزفت بسبب اوضاع البلد مش زى الاول






كلام حضرتك مزبوط الماكينة دى ثوره فظيعه و انا بنفسى دخلت مصنع كارينا الاورجينال بتاع البديهات و مصانع جوارب " اشهر ماركات الماكينات الايطاليه زى لوناتى lonati" و الماكينات دى كلها كمبيوترايزد و دقيقه جدا فى شغلها و عاوزه حد فاهم فى الصيانه و المصانع الى فى مصر بتعتمد على الخبراء الاجانب كل فتره بجانب الصيانه المستمره من الفنيين المصريين

و حضرتك ياستاذ طارق عندك مصنع نسيج ؟

فعلا كلامك صحيح والماكينات دى نزله من فتره كبيره على فكره وانتاجها مميز دى ممكن تعمل تى شيرت رجالى منسوج بصورتك الشخصيه مش طباعه امكانياتها جباره بس مش منتشره كتير لسعرها المرتفع وتعقيد تقنيتها ومن فضل الله اخدت دوره تدريبيه فى اكبر شركه فى العالم لتصنيع ماكينات التريكو لكن هى مش بتشتغل فى التخصص ده فمعرفش اصلح مكنه زى دى لكن اى ماكينه تريكو تانيه لعبتى ان شاء الله
ومن فضل الله عندى مصنع نسيج دائرى بصنع اقمشه الانترلوك والبولو والدبل فيس والروزيتا المحله صناعتنا الاولى المنسوجات

المشاركة الأصلية كتبت بواسطة blazer

اتشرفت بمعرفتك ياباشا و ياريت تكتب لى رقمك فى رساله عشان لو جت فرصه نتعامل مع بعض
انا بشتغل فى الانترلوك ال 30 و ال 40 الممشط و السنجل ال 30 و الريب اليكرا و القطيفه مش محلوقه فى شغلى
و حاجه كمان,, تعرف كريم الصلاحى ,, حد من اصدفائى عندكم من المحله

الشرف لى وتحت امرك فى وقت
ربنا يبارك ويوسع رزقك ان شاء الله