الموضوع: ملاك الكورولا ٢٠١٤ هاي لاين .. كيفية التعامل بالمفتاح الذكي

فئة ال 200000ج الكورولا اخدتها بالضربة القاضية حتى الان لكن بداية من 210000 لحد 300000 الانسجنيا كاسحة طبعا فى ناس كتير حتقول طب التوكيل و قطع الغيار و اعادة البيع انا كل ده عارفه لكن لما اقرر اشترى عربية فوق ال250000 كل الكلام ده مايفرقش معايا انا حكون عايز عربية متميزة فى الامكانيات و من الاخر منظرة يضرب لها تعظيم سلام و انت داخل بيها اى حتى و مش منتشرة (ثقافة مختلفة) و هو ده اللى يخلى بعض الناس تدفع ارنب فى عربية و دول مايفرقش معاهم بقى سعر قطع الغيار او التوكيل او اعادة البيع من الاخر

المشاركة الأصلية كتبت بواسطة ahmed_m_ashraf

ياريت ملاك الكورولا ٢٠١٤ هاي لاين يوصفولنا كيفية التعامل مع العربية بالمفتاح الذكي. يعني كيفية التعامل مع فتح وغلق الأبواب هل المقابض فيها أزرار للفتح والغلق ولا سنسورز كيفية التعامل مع الكونتاكت سواء تشغيل المحرك أو إستخدام وظائف العربية بدون إدارة المحرك (كاسيت ،فتح/غلق زجاج). كيفية التعامل مع الشنطة. كنت قريت إنك لو شايل أكياس من الهايبر مثلا وقربت من الشنطة بتفتح لوحدها مش لازم تفتحها بإيدك مضبوط الكلام ده ولا إزاي بالضبط ... يعني بإختصار ياريت تنلقلولنا تجربة إستخدام المفتاح الذكي عشان عايز أكون فكرة أنا وغيري لما ناخد قرار الشراء نبقى عارفين مدى فايدة وإغراء الأوبشن ده في الهاي لاين.


وفي الآخر شكرا جزيلا لكم وربنا يباركلكو في عربياتكو ويهنيكو بيها يارب.

فى حاجة احب برضه احذرك منها فى المفتاح الذكى ان طول ما العربية دايرة العربية ما بتطقيش حتى لو المفتاح مش فى العربية كل ما هناك انها بتدى صفارة لمدة 10 ثوانى و بتقف يعنى بلغة تانية لو و انت فكرت تقف بسرعة عند اى كشك تشترى اى حاجة فى السريع و مشغل التكيف فى يوم حر و تقول بدل ما اطفى العربية منا راجع بسرعة و كده او كده المفتاح فى جيبى محدش يعرف يسرق العربية تبقى غلطان لان طول ما العربية دايرة ممكن العربية تروح لاى مسافة وما تفصلش يعنى المفتاح الذكى فى الحتة يبقى مفتاح غبى ما يعرفش ان العربية مفروض تطفى لو المفتاح مش جوه العربية

المشاركة الأصلية كتبت بواسطة k.ossama

كلام ده أكيد....؟
أصل كدة ممكن يعمل مشاكل رهيبة

الكلام ده اكيد بالنسبة للمفتاح الذكى فى الهونداى ix35 و لما كنت بحجز الكورولا سألت فى توكيل تويوتا اذا كان الموضوع نفسه فى المفتاح الذكى بتاع الكورولا المندوب اكد انه فى نفس الخاصية

المشاركة الأصلية كتبت بواسطة ahmed_m_ashraf

عن نفسي بيني وبين الياباني عشق قديم مرتبط بأول عربية جابها والدي وفضلت أسوقها قبل ماجيب عربيتي الحالية وكانت مازدا ٣٢٣ ولذلك بقولك هي ثقافة برضة أنا وعيت ع الدنيا لقيت العربية دي وإرتبط بيها نفسيا وبقى عندي تذوق خاص للياباني، قاومتة بشدة وأنا بشتري عربيتي اللوجان بحكم الإمكانيات المادية ساعتها لكن قضل الياباني عشقي والكورولا بالذات ليها معزة خاصة عندي وطموحي إني أجيبها فيوم،ودلوقت لما بفكر أغير تاني قريب حاولت أقنع نفسي بالفلوانس مثلا بإعتبار إنها مش غريبة عليا عشان معايا رينو + إنها فيها العرق الياباني. بس بصراحة لإعتبارات كتير أنا ميال حاليا لإعتمادية الكورولا المعروفة وكل مميزاتها إللي الناس عرفاها من إعادة بيع لغيره، غير إني معرفتش أقاوم إنجذابي للكورولا. رغم إن الفلوانس بتغطي الأوبشنز إللي نفسي فيها أكتر وده كان المغزى من أسئلتي هنا لأصحاب الهاي لاين عن بعض الأوبشنز الدقيقة.

تحس إني بتكلم عن مراتي مش كده هههههه، معلش دي حاجة أكيد يعرفها ويحس بيها كل التويوتاوية وأصحاب الكورولا تحديدا. والموضوع مش موضوع تفكير مصري ده كمان خليجي وحتى أوروبا وأمريكا التويوتا ليها نصيب محترم من سوق العربيات الأجنبية.

نفس الكلام بينطبق على اللى بيركب اوروبى لما بيركب اليايانى غالبا مش بيرتاح فيه هى راحة نفسية زى ما حضرتك قلت

اما بالنسبة لموضوع الانتشار والكلام دة انا مثلا مبحبش اركب عربية الشعب كله راكبها و كل مادخل بارك الاقى منها عشرة واقفين جنب بعض ... طيب وقطع الغيار ؟؟ هنا بقا ييجى دور التوكيل ما دام موفر كل قشاية ساعتها لا يهمنى اعادة بيع ولا كلام السوق المصرى العقيم دة انا بدفع 200 الف على سبيل المثال عشان استمتع اربع او خمس سنين وساعتها يحلها ربنا مفيش عربية مبتتباعش

يعنى مثلا احد مصادر اعجابى بالفلوانس ان مش ناس كتيرة راكباها (ولو ان انتشارها زاد بصورة ملحوظة الفترة اللى فاتت) وكل واحد بيركب معايا بيفضل يستكشف فالعربية