قبل اي كلام في الموضوع احب اني احيي رجالة المنتدي لانكم بجد بتعرفو الواحد معلومات كتيرة جدا عن البيجو 301 الي انا بتشرف اني من اوائل الناس الي ركبتها من اول ما نزلت مصر.
مش هطول عليكو انا استلمت العربية من سنة بظبط هي اوتوماتيك بيزلاين و ماشية دلوقتي 18 الف كيلو و من وجهة نظري العربية محترمة جدا جدا و افضل قيمة مقابل السعر..لو بنتكلم علي الثبات انا مش من هواة الجري لكن كنت مسافر بيها مرسي مطروح جبت بيها 180 و دي كانت اعلي حاجة جبتها و مكونتش خايف لان فعلا العربية تقيلة علي الطريق و سحبها ممتاز حتي بعد ال100..الفرامل الي فعلا عاملة قلق عند الناس هوا فعلا انا صادفني مشكلة تيل الفرامل و غيرتو علي 17 الف كيلو و كان قبلها بحوالي 2000 كيلو بيصفر لكن عاما فرامل العربية ممتازة..التكييف اول ما جبتها كان مش كويس و بيقصر علي السحب جامد بصراحة اتفاجئت اني لقيت التوكيل بيكلموني بيقولولي اروح انزل السوفتوير و فعلا نزلتو و التكييف بقي كويس جدا (الكلام دا كان الصيف الي فات)...عفشة العربية ممتازة و ناعمة مش بحس بالمطبات..و زي ما قولتلكو السحب بتاع العربية رائع و التكييف مش بيأثر اوي علية...البنزين كان استهلاكو عالي شوية اول ما جبت العربية بس مع الوقت بدأ الاستهلاك يتظبط..العربية واسعة جدا بطريقة غريبة انا برجع الكرسي علي الاخر و الي بيعد ورايا بيكون فارد رجلو عادي و الشنطة واسعة بردو..اوحش حاجة في العربية موضوع ان ظبط المراية مانيوال في البيزلاين دي حاجة عيب انها تكون بتنزل في اي عربية لحد دلوقتي بصراحة و طبعا مصنعيات التوكيل كتيرة جدا لازم حل ليها..بس في المجمل العربية بصراحة مريحة جدا جدا.
رغم كل حبي للعربية انا عايز منكو نصيحة لاني بكلامكو ممكن ابيعها او لا..انا قدامي عربية 307 sw موديل 2008 ماشية 40 الف كيلوهايلاين و فابريقة بالكامل اية رأيوكو ابيع الي معايا و اجيب دي؟؟ انا عارف اني هنزل 6 سنين بالموديل...هل تستاهل ال307 كدة؟؟ هيا اغرتني بصراحة بالاوبشنز الكتيرة الي فيها مفيش مقارنة من ناحية الاوبشنز و انا اسمع ان ال307 عربية محترمة بدليل اني بشوفها كتير جدا في الشارع..عايز نصيحتكو ضروري لاني محتار و لازم اقرر عشان الحق اعرض عربيتي قبل ما ال307 دي تتباع...مستني نصايحكو لو سمحتو.
اسف اني طولت عليكو و اتمني يكون تقريري عن ال301 زود اي حاجة.
المفضلات