الموضوع: مشكلتى هيا التعامل مع البنات "الخجل "

المشاركة الأصلية كتبت بواسطة adel 000

السلام عليكم

انا لقيت ان المنتدى الأجتماعى ده أحسن مكان أفضفض فيه وأقول الللى جوايا :(

بصوا يا جماعه انا مشكلتى زى ما هو باين فى العنوان انى بخجل من التعامل مع البنات وبسبب كده انا أتخرجت من الجامعه ومتكلمتش مع بنت ربع ساعه على بعض طوال مدة دراستى فى الجامعه مع العلم انى والحمدلله بتمتع بمظهر حسن وكتير جدا جاتلى فرص ضيعتها " بدون زكر تفاصيل " لو شاب تانى كان مكانى كان زمانه مصاب البنت وواخد رقمها ومقضها -_- مع العلم انى مش بتاع حوارات والله ومش من الشباب السيس اللى بيفرح بلمة البنات حواليه وعمرى ما هرتبط ببنت أو اعلقها بيا الا لو كنت فعلا ناوى أخطبها واتجوزها

أكتر من بنت أبقى معجب بيهم وحاسس انهم بيبادلونى الأعجاب " بدون زكر تفاصيل " لكن بسبب بطئى وترددى وضعفى فى أخد الخطوه الأولى البنت بتضيع وتيأس وترتبط بواحد تانى ومنهم واحده كل الناس كانوا حاسين انها عايزانى من تصرفاتها بس انا كالعاده كنت جبان ومكلمتهاش المهم البنت دى دلوقتى أتجوزت اهيه وفى انتظار مولود :)

فيا عاده غبيه اوى وهيا انى ممكن يبقى فى واحده عجبانى وعمال ابص عليها من بعيد لكن اول ما عنيها تيجي في عينى أبص ناحيه تانيه على طول ولو هعدى من قدامها مقدرش ابص ليها حتى لو كنت هموت عليها :(

لو قاعد فى مكان زحمه وفى بنات كتير حوليا " يعنى لو بصيت فى أى أتجاه هبقى باصص لواحده منهم " ببقى مش عارف أبص فين اخاف ابص لواحده منهم يفتكرونى معجب بيها ولا حاجه فبطلع الموبايل وافضل باصص فيه او باصص لفوق او للأرض

لو ماشى مع واحد صاحبى وقابل واحده صاحبته ببقى مرتبك ومش عارف اعمل ايه وبحاول ابعد

أى شاب واحد صاحبه يقوله تعالا اخرج معايا هخرجك مع بنات بيكون مبسوط وبينزل جرى انما انا برفض تماما وبحس انى لو نزلت مش هعرف اتكلم زى صاحبى وهبقى ساكت ومنظرى غبى وممكن ميتقبلونيش

كل ده وانا فى أشد الحاجه للأرتباط العاطفى " اللى طبعا هينتهى بجواز " مش تسالى وخلاص
والمفروض الفتره الجايه فترة أرتباط وزواج طبعا بعد ما اشتغل -_- ومش عارف هرتبط ازاى وانا بحالتى دى خصوصا انى مش من مؤيدى جواز الصالونات اطلاقا وعندى متجوزش خالص احسن ما اتجوز صالونات
ساعات بحمد ربنا انى مشتغلتش عشان كده موضوع الجواز مؤجل شويه وادى الواحد معاه وقت يفكر فيه

السؤال بقى هوه انا كده مريض ؟ ولا عندى عدم ثقه فى النفس ولا ايه :(

كنت زيك كده بالظبط
وكأنك بتوصفنى بالظبط
واتجوزت جواز صالونات
بس سبحان الله فى الحلال كنت ولا كأنى مقطع السمكة وديلها
هى نعمة أحمد الله عليها وستعرف قيمتها إن شاء الله عند الزواج لانك ستكون مطمئن لشريكة حياتك
لانه كما تدين تدان

يابختك

اعتقد محتاج شوية جراءه مش اكتر

يا عمونا هما اللى اتكلموا مع بنااات كتير ومشيوا معاهم خدوا ايه؟؟؟؟؟؟؟؟؟؟؟

يا بختك بجد

خليك زى ما انت كده لحد ما تتجوز