الموضوع: مشكلتى هيا التعامل مع البنات "الخجل "

السلام عليكم

انا لقيت ان المنتدى الأجتماعى ده أحسن مكان أفضفض فيه وأقول الللى جوايا :(

بصوا يا جماعه انا مشكلتى زى ما هو باين فى العنوان انى بخجل من التعامل مع البنات وبسبب كده انا أتخرجت من الجامعه ومتكلمتش مع بنت ربع ساعه على بعض طوال مدة دراستى فى الجامعه مع العلم انى والحمدلله بتمتع بمظهر حسن وكتير جدا جاتلى فرص ضيعتها " بدون زكر تفاصيل " لو شاب تانى كان مكانى كان زمانه مصاب البنت وواخد رقمها ومقضها -_- مع العلم انى مش بتاع حوارات والله ومش من الشباب السيس اللى بيفرح بلمة البنات حواليه وعمرى ما هرتبط ببنت أو اعلقها بيا الا لو كنت فعلا ناوى أخطبها واتجوزها

أكتر من بنت أبقى معجب بيهم وحاسس انهم بيبادلونى الأعجاب " بدون زكر تفاصيل " لكن بسبب بطئى وترددى وضعفى فى أخد الخطوه الأولى البنت بتضيع وتيأس وترتبط بواحد تانى ومنهم واحده كل الناس كانوا حاسين انها عايزانى من تصرفاتها بس انا كالعاده كنت جبان ومكلمتهاش المهم البنت دى دلوقتى أتجوزت اهيه وفى انتظار مولود :)

فيا عاده غبيه اوى وهيا انى ممكن يبقى فى واحده عجبانى وعمال ابص عليها من بعيد لكن اول ما عنيها تيجي في عينى أبص ناحيه تانيه على طول ولو هعدى من قدامها مقدرش ابص ليها حتى لو كنت هموت عليها :(

لو قاعد فى مكان زحمه وفى بنات كتير حوليا " يعنى لو بصيت فى أى أتجاه هبقى باصص لواحده منهم " ببقى مش عارف أبص فين اخاف ابص لواحده منهم يفتكرونى معجب بيها ولا حاجه فبطلع الموبايل وافضل باصص فيه او باصص لفوق او للأرض

لو ماشى مع واحد صاحبى وقابل واحده صاحبته ببقى مرتبك ومش عارف اعمل ايه وبحاول ابعد

أى شاب واحد صاحبه يقوله تعالا اخرج معايا هخرجك مع بنات بيكون مبسوط وبينزل جرى انما انا برفض تماما وبحس انى لو نزلت مش هعرف اتكلم زى صاحبى وهبقى ساكت ومنظرى غبى وممكن ميتقبلونيش

كل ده وانا فى أشد الحاجه للأرتباط العاطفى " اللى طبعا هينتهى بجواز " مش تسالى وخلاص
والمفروض الفتره الجايه فترة أرتباط وزواج طبعا بعد ما اشتغل -_- ومش عارف هرتبط ازاى وانا بحالتى دى خصوصا انى مش من مؤيدى جواز الصالونات اطلاقا وعندى متجوزش خالص احسن ما اتجوز صالونات
ساعات بحمد ربنا انى مشتغلتش عشان كده موضوع الجواز مؤجل شويه وادى الواحد معاه وقت يفكر فيه

السؤال بقى هوه انا كده مريض ؟ ولا عندى عدم ثقه فى النفس ولا ايه :(

انت شخص قمه في الاحترام والادب ، احسبك كذلك ولا أزكيك علي الله
وطالما انت بعدت عن الحرام وهو الكلام والاختلاط مع من لا يجوز لك كلامة او مخالطتة ، فكن علي يقين بأنك ستأتيك من هي مثلك في صفاتك ،
وأبشرك بأنك سيكون لك أروع قصة حب مع الانسانة التي من نصيبك ، ليس كلامي ، ولكن راجع سورة النور ( والطيبات للطيبين والطيبون للطيبات أولئك مبرءون مما يقولون لهم مغفرة ورزق كريم )
وانصحك بالأستمرار علي ما انت علية
كف البصر عما حرم الله عز وجل
وأذا أعجبت بفتاه ونويت علي الارتباط بها ، فأترك أختك او والدتك للبحث الأولي عنها ثم تشجع وأذهب الي والدها
اسأل الله العظيم رب العرش العظيم ان يزوجك ويزوجني ويزوج كل عازب يريد العفاف ، وان يقر عينك ، ويرزقك الذرية الصالحة اللهم امين