تاريخي مع Byd Flyer (انا ثاني مالك في الجمهورية)

**shanodaa** · 17-10-2008 09:51 PM

العربيه لسه معاك والا بعتها

**khpopo** · 17-10-2008 11:04 PM

فين ياباشا عاوزين الباقى الله ينور فى التقيم
اول مانزلت كنت هاشتريها من الامل بس تراجعت فى اخر لحظة ودة للشكل العام مش الى هو ماروتى اكرم فى الزمن دة لكن كنت حاسس انه هاتكون كويسة الى حد ما :k48:
ربنا يوفق

**MoDyBeNz2008** · 17-10-2008 11:17 PM

يا راجل فين الباقي انت مشوقنا و سايبنا على نار مينفعش كدة

**fahd_628** · 18-10-2008 12:07 AM

فين البااااااااااقى :)

**mrbond88** · 18-10-2008 12:16 AM

السلام عليكم

معلش انا اسف على التأخير ده بس كنت مشغول في شوية حاجات( مش بتقل عليكم والله

)
وانا بجد مبسوط اوي بالردود دي وبالنسبة للفلاير استحالة ابيعها (او مستحيل الاقي حد يشتريها بصراحة

) بس هي موجودة ماتقلقوش
وحكاية الركنة يتاعة الصني الحمدلله البيت في جراج كويس
وانا هحاول تكون دي اخر حلقة او بالكتير حلقة كمان -رغم ان (مسلسل الدالي 33 حلقة جزأين و ناويين بعملوا التالت رغم رفض 81% من الناس في الاستفتاء :k46:)

نكمل الحكاية:
الصوت يتاع العربية كان عالي اوي لدرجة ان ممدوح (واحد صاحبي) قاللي(بسخرية) : هي العربية شحرت من السفر وللا ايه يا حازم

؟؟
قاتله: هأبه اروح اشوفها عند الميكانيكي

انا ساعتها كنت راجع من السفر و ضارب تفليسة معتبرة ومش عايز اقول لابويه عايز فلوس تاني فقررت ااجل حكاية تصليح الصوت دي شوية , لحد مالقيت العربية بتسخن وسحبها ما بقاش زي الاول قلت مابدهاش اروح لبدوي

بدوي بصراحة ميكانيكي 8\10 بس الميزة انه فاتح في الشارع اللي ورايا -وانا اكتر حاجة اكرهها اقف عند الميكانيكي - فكنت بركنها عنده و انام في البيت وهو لما يخلص بيديني رنة وانا واثق فيه بصراحة هو امين و مش غالي
رحتله وكان ده الحوار
انا: بش مهندس بدوي ( شوية نفخ عشان يظبطني):k49:
بدوي: دكتور عامل ايه واحشنا ( اصل انا في كلية صيدلة )
انا: العربية دي سافرت بيها و رجعت صوتها بأه زي مانت سامع كده(وحكيتله اللي حصل في الطريق)
بدوي ( بيكشف على العربية )

: ده الفرن طق
انا: فرن ايه؟؟
بدوي: فرن الشكمان طق من السخونة ,اصل هو زهر
انا: طب وحله ايه ده كمان
بدوي: انت تروح تسأل عليه في التوكيل لو مالقتوش ممكن نجيبه استيراد (من عربية عاملة حادثة) او نلحمه
انا: طب انا هاروح اسأل عليه في التوكيل وهشوف
رحت بعدها للتوكيل ودخلت المخازن وسألت على الفرن , الراجل لقى واحد عنده كده ووراهوني ,الفرن كان شكله غريب ولا محطوط في علبه وتقريبا مصدي كده وشكله كان مشروخ ولحموه ,سألته على سعره قالو 140 جنيه , بالحالة اللي هو فيها ده شكيت فيه ومارضيتش اشتريه , ورجعت تاني لبدوي.......
حاكيتلوه الحكاية قاللي: خلاص احنا نلحمه
قلتله هايتكلف كام قاللي 100 جنيه , العربية اعدت معاه يوم وظبطها والعربية رجعت تمام
فضلت ماشي بالعربية شهرين او اكتر (مش فاكر بالظبط) والصوت رجع تاني فرحت لبدوي قاللي مالوش حل غير يتغير , قلتله بعدين ومش مهم , و لحد دلوقتي الفرن مشروخ وماعملتلوش حاجة ..
بعد ما الفرن اتشرخ تاني بحوالي تلات شهور ظهر في العربية عيب غريب اوي ..ماكنتش عارف سببه بس كان بيحصل على فترات بعيدة , العربية كانت فجأة كانها مش واصلها اي كهربا وتعد تقطع وترجع تاني وتظهرلي لمبة check engine ,

العيب ده كان بيحصل كل اسبوع مرة تقريبا وبدأ يزيد تدريجيا لدرجة انه كان هيتسبب في حوادث جامدة لولا ستر ربنا .
مرة كنت رايح الجامعة من محور ال N\A وهناك عاملين مدفن زبالة صحي فكان عربيات الزبالة وهي طالعة منه بتمشي حتة عكسي, ففجأة وانا ماشي على 80 العربية عملت الحركة دي وعمالة تهنج ومش عايز تظبط جي اركن على اليمين لقيت عربية زبالة نقل جية فوشي

المهم دخلت بينها وبين الرصيف في اخر لحظة( الحمد لله)

وقفت شوية وبعدين شغلت العربية تاني , و ساعتها اكتشفت حاجة اني لو شغلت التكيف على الاخر العيب ده بيروح(كأني بسحب كهربا ) .
المهم رحت لبدوي ,قاللي : ده احتمال يكون رشاشات الانجيكشن مسدودة او يكون دورة البنزين عايزة تنضف
انا: خلاص ننضف دورة البنزين , وده اللي انا عملته :
غيرت الفلتر
فكيت الطلمبة ونضفناها
حطيت البتاع اللي بينضف البنزين (مش عارف اسمه هي العلبة ب 26 جنيه)

العربية بعدها مشيت تمام و الغريب ان العيب راح شوية بس كان موجود
بدوي قاللي ده عيب حساس (حاجة تبع الانجيكشن)
سألته على تمنه قاللي ممكن يعدي 800 جنيه

قلتله بلاش و سيبها كده شوية
كنا وصلنا ساعتها للصيف وزي الصيف اللي قبله قررنا نسافر
انا بصراحة كنت مقلق من السفرية دي على الاخر و مش عايز اطلع بس جيه مراكبي (واحد صاحبي) وقاللي فكرة
مراكبي

: ايه رأيك يا حازم تنفخ العجل نيتروجين ( اصل العجل كنت مشيت عليه 50000 الف كيلو و وواخد 20 خابور و مليون لحام وفي متركبله داخلي رغم انه تيوبلس)
انا: نيتروجين مش ده اللي بيحطوا في البلالين؟

مراكبي: لا يا زكي التاني هيليوم ( الشعب المصري بيحب يألف)
انا: اشطة نملى النيتروجين ده فين؟
مراكبي: في الوطنية الي عند جامع السلام
رحنا ملينا العجل نيتروجين ب 25 جنيه وحددنا معاد السفر بعدها ب 4 ايام

بصراحة ابويا ماكنش راضي على السفرية دي وانا طلعتها بالعافية و يمكن ده يكون سبب في اللي حصللي ( واللي انا بحاول انساه ودي اخر مرة هاقوله فيها)
كان فجر يوم التلات عند مسجد بلال كنا عشرة و العربية اللي طلعة معايا المرة دي لانسر 2001 بتاعة واحد صاحبي اسمه رجائي
وطلعنا على طريق السفر والحوار ده تم :
انا: يا رجالة عايزين نفطر
ممدوح: نفطر في نعمة اللي في أول الطريق الصحراوي
(ممدوح ده من اكتر الناس الي تحب تفتي , ولا في نعمة في اول الطريق ولا حاجة )
طلعنا على الطريق ولقينا عربية فووول وفطرنا هناك وشربنا شاي وكملنا الطريق

كان كل حاجة تمام بس كانت لمبة الموتور كل شوية تشتغل اقوم مشغل التكيف تروح وهكذا لحد ما وصلنا اللوتس في الساحل الشمالي
نزلنا الشنط وجي اشغل العربية عشان اركنها عدل وهي مش عايزة تشتغل , ومش بتجيب اي حاجة قلت بس دي البطارية و بصراحة كنت ها :K14:
اقرو الشوية دول على بال ماكتب الباقي

**Ayman_52** · 18-10-2008 12:39 AM

اسلوبك حلو اوووى بجد...ماشاء الله عليك

تصدق انا كل يوم بقيت ادخل عالقسم الصينى بس عشان اشوفك كتبت حاجه جديده ولا لسه....

جامد يا حازم باشا

متــــابــع معـــاك