تاريخي مع Byd Flyer (انا ثاني مالك في الجمهورية)

**mrbond88** · 11-10-2008 02:25 AM

:Dالموضوع ده ممكن افضل احكي في شهر عن تاريخي مع العربية دي من كل حاجة
سواء مع الاداء او مع نظرة الناس او مع الاسطة بدوي الميكانيكي بتاعها خليني احكيلكو انا اشتريتها ازاي
التاريخ :
في يوم 8 / 10 / 2005 كانت الساعة واحدة الظهر تقريبا
المكان : معرض الفرسان ( الله يرحمه) في شارع الطيران وهو ده اللي حصل معايا وكانت معايا والدتي صاحبة العربية
انا: السلام عليكم
الموظف : وعليكم السلام اتفضل يا افندم أأمر (كان اسمه محمود )
امي: احنا بندور على عربية تكون زيرو في حدود 35 40 الف بالكتير
الموظف : في يا افندم السوزوكي ماروتي
العبد لله : لا بس دي صغيرة اوي و مافهاش اوبشن دي عربية من سنة خمسين
الموظف(محمود ) يفكر و قام قايل : احنا جاتلنا عربية لسة واصلة من بلدها(الصين طبعا) اسمها فلاير وتوكيلها شركة الامل لادا .
ماما: طب ورينا شكلها
الموظف: دقيقة واحدة
وجاب الكاتالوج بتاعها وده كان شكلها :k17:

ماما: والله شكلها كويس مش وحشة .... ايه رأيك يا احمد (اللي هو انا)
انا (هامسا) : ما تصبري شوية يا ماما و نجيب اي حاجة مستعمل كويسة
ماما: ابدا استحالة ليه اجيب عربية مستعملة كل يوم اروح للمكانيكي
انا: طيب براحتك
ماما: بكام دي يا استاذ محمود
محمود : دي عاملة 39900 يا مدام
ماما : ونستلمها امتى ؟؟
محمود :ابعت اجيبهالك من المخزن حالا يا افندم وورقها تعالي خدي اخر النهار
انا: ودي ضمانها اد ايه ؟ والتوكيل فين ؟
محمود : 30000 كم و الصيانة في العباسية عند توكيل لادا
و بعد حوالي ساعة العربية جت وكانت المفاجأة
العربية على الطبيعة صغيرة خالص على عكس الصورة ( وعلى راي صحابي علبة كبريت)
محمود : مالك مش مبسوط ليه ؟؟
ماما : اصل هو كان راكب قبلها رينو كليو فا طبعا حاسس بفرق.
اومأت برأسي ( حلوة أومأت دي):k25: وكانت هي دي حالتي او حرارتي
ماما (اسرع الامهات قرارا في العالم ): خلاص يا محمود- نتوكل على الله- خلص الورق ( وكانت البداية ) .
وسوقت العربية متجه للبيت وده كان احساسي :
كنت حاسس اني قصير قوي( انا 179 سم) لان الكراسي واطية اوي والسقف عالي قوي , كنت حاسس اني قاعد في حجر اللي جنبي , كنت حاسس اني قاعد على الكبوت (مش عارف ليه)
و في دماغي قيمت العربية : قولت العربية دي شكلها خفيفة , والعفشة ناشفة اوي ( باكل المطب في العمود الفقري عدل ) وكأني راكب بالظبط

الفتيس كان بيعض شوية ,الفرامل كانت وحشة , سحبها كان حلو اوي (1100 سي سي ) وكان اول واحد ققابلو يعرفني وانا سايقها هو احمد رافت جاري كان ساعتها بيلعب كورة في الشارع .
وسألتوه بضحكة بلهاء :D : ايه رأيك في العربية ؟؟
قالي : يا عم انتو شاريين عربية لعبة ولا ايه ( وده كان اول تعليق )
سيبتوه ومشيت وركنت وطلعت البيت .
اكملكو بكرة عشان رايح انام و ارجو التثبيت عشان لسة في تفاصيل مهمة والقصة دي ممكن تتعمل مسلسل حلو