الموضوع: تاريخي مع Byd Flyer (انا ثاني مالك في الجمهورية)

السلام عليكم..معلش ماعرفتش اكمل القصة امبارح عشان كنت بشتري عربية جديدة -باركولي:smile:- (نيسان صني)ورحت رخصتها النهاردة ولسة جي. (ما تخافوش الفلاير موجودة)

كنت عايز ارد على فادي على حكاية ان العداد بيألف ....بصراحة انا شكيت كده زيك بالظبط وقلت العداد شكلو بيشتغلني والعربية ما تجيبش 120 والعداد قاري 160 ..فقررت اشوف العداد مع عداد عربيات تانية زي الكرولا 1300 2003 و شاهين 1400 2005( كنت بشد معاهم وحاجات كده) ولقيت ان العداد تمام ومش بيخرف
---اما على حكاية طقم الدبرياش و ال 20000 كم في دي طبعا مالهاش تفسير غير ان العربية صيني و الاستعمال كان وحش ...

ونكمل الحكاية:
قررت اتصل بالتوكيل اشوف عندهم طقم الدبرياش ولا لأ
انا: الو السلام عليكم
الموظف : ايوة
انا: كنت عايز اسأل على طقم دبرياش فلاير
الموظف: هحولك على المخزن
المخزن : الو
وسألتو نفس السؤال
المخزن : والله هو كان بيقولو قطع غيار العربية جية يوم الخميس
انا: هي لسة ماجتش لحد دلوقتي ؟؟:huh: (مش عارف ليه انا طيب كده )
المخزن : ان شاء الله يوم الخميس يا افندم

طبعا كلمتهم يوم الخميس وكان الرد هو هو في حكاية طقم الدبرياش وطبعا شديت معاهم
بس ماوصلتش لحاجة .
المهم كان في ميكانيكي جنبي اسمه سيد ( غير بدوي)
سيد بصراحة شاطر وبيفهم بس هو حشاش و سكري ولا مؤاخذة بتاع نسوان المهم كشف على العربية .
سيد : ياباشا انا هفكلك الطقم وانزل شارع دمشق وهاتلائي مقاسو,, وفهمني اهم حاجة في المقاس ايه هي.
وبصراحة الراجل عانى جامد:k23: عشان يفك طقم الدبرياش والسبب في تفسيري هو ان العربية دي مصمملها موتور 800 سي سي(3 سلندر) ولما قررو ينزلوها مصر حطو موتور 1100 سي سي (4سلندر) وده طبعا اكبر في الحجم فالمهم اسطوانة الدبرياش اتزنقت و بقى تطليعها يطلع الروح ( ونفس الكلام للدينامو - لي قصة هو كمان ) -والكاتلوج اللي معايا بيقول ان الموتور 800 3 سلندر

المهم خدت الطقم ونزلت شارع دمشق ,, وبصراحة شارع دمشق:k18: يعتبر احسن مكان تجيب منه قطع غيار في مصر لكن التجار هناك كسلانين شوية , المهم رحت وكنت طبعا بدور على تجار الكوري والياباني
والحوار اللي جي ده اتكرر معايا كذه مرة :
انا: عندك الطقم ده لو سمحت
البياع ( من غير مايبص على الطقم ) : العربية نوعها ايه
انا: عربية صيني اسمها فلاير
البياع : لا مش موجود
الحوار ده اتكرر معايا كتير لحد ما وصلت لواحد ابن حلال باين عليه بيفهم , شاف الطقم
وقاللي احتمال يكون اد الماتيز ..فخد مقاساتو و طلع فعلا نفس الطقم بتاع الدايو ماتيز والحمد لله
اشتريت الطقم وكان ب 300 جنيه (البلية+ الاسطوانة+الديسك)
و رحت لسيد و ركبهولي وخد مصنعية 80 جنيه
والحمدلله الطقم قاعد معاية لحد دلوقتي وانا ما شي 60000 كم وخلصت من مشكلة الدبرياش
قررت بعدها احاول اظبط في شكل العربية من بره بشوية استيكرات
وفعلا نزلت دمشق ورحت لابراهيم (محل مشهور اوي هناك) واول حاجة عملتها
فيميه لزجاج -وانا عملت نفسي محترم وطلبت اخف درجة اللي ماتبانش
تاني حاجة, حطيت استيكرز على الجناب واستيكر (dragon) على الكابوت وشماسة مكتوب عليها(Need for speed ) -كان نفسي اصورهالكو-و مشيت بيها حوالي اسبوعين في الشوارع من غير ما حد يكلمني ,لحد ما في يوم وانا راجع من الجامعة عند الجهاز في التجمع الخامس
كانو عاملين لجنة زي الفل وكنت لسة مطلع رخصة القيادة فكنت داخل على اللجنة بقلب جامد ( وماكنتش عارف المصيبة اللي انا عاملها ) المهم ده اللي حصل :
قبل مان وصل للظابط ب 20 متر كان في أمين الشرطة .
امين الشرطة ( والله بكل ذوق): الرخص بعد اذنك يافندم.:)
انا( بكل براءة ) : اتفضل . (كنت فرحان برخصة القيادة ونفسي حد ياخدها مني )

خد الرخصة وبعدين قرربنا للظابط و كان مشغول بيكلم واحد وفجأة بص على العربية
الظابط:k48:: ههههههه ايه يا عم ده هي العربية كلها باتنين جننيه ونص وعامل فيها ده كله هههه ,, اركنلي هناك
رحت ركنت العربية ونزلتلو ,, والراجل كان مصمم يسحب الرخصة وبعد توسلات مني ومن الجماهير اللي واقفة بتتفرج قال:
خلاص مش عايز اشوف نقطة فيميه على الآزاز
وقعدت ساعة ونص بشيل في الفيميه عشان ما يسحبش الرخصة
وبعدها قولت ده كان يسحبها احسن :K13:, ده طلع اسهل حاجة انك تجيب رخصة من مرور مدينة نصر(وكله بواسطته او بتمنه)
و بعد ما الحكاية دي حصلت كانت بداية الاحباط الحقيقي اللي جالي من ناحية العربية

والعربية ما كانتش فارقة معايا خالص بس بصراحة العربية ماتخبطتش مني خالص غير حاجات بسيطة اوي
ماحصلش حاجة جديدة للعربية غير :
الازاز اللي ورا المكنة بظت
الفرش اتقطع
كرسي السواق الحديد في اتكسر
الاكصدام اللي ورا متسقط كاني مسقط البنطلون
الاكصدام الامامي متخيط كانه لسه طالع من عملية جراحية
مرايات اللي في الجانبين راحو
و رغم كل ده قررت اسافر بيها الساحل الشمالي بعد ضغط شديد من صحابي و بعد محاولات عسيرة مع ابوية وامي عشان يوافقه
و عند فجر اول يوليو 2007 تقريبا اجتمعنا عند مسجد بلال ابن رباح عشان نسافر بالعربية وكان عددنا تسعة ومعانا عربية تانية شاهين 2005 والحوار ده تم قدام المسجد
انا: العربية عندي كبيرها 4 مش هازود عشان الطريق طويل
الرجالة وافقوا وماحدش اعترض, بعدين رحنا فطرنا في شبراوي السابع ومسكنا الطريق الساعة 7 تقريبا
كنت متفق ان احنا مانزودش في السرعة وكمان كان لازم نكون ماشيين جنب بعض طول الطريق
لكن مع الوقت والطريق الفاضي بقيت ماشي طول الطريق 160 ( والله العظيم ) وكانت الشاهين بتحصلني بالعافية وخدنا الطريق لحد قرية اللوتس في ساعتين وشوية تقريبا
قعدنا بالظبط 3 ايام مشيت فيهم 1000 كم رحنا فيهم اسكندرية و مارينا وبصراحة كانت اخر اجمد مصيف قضيتوه ال 3 ايام دول ولولا اسباب عائلية كنا طولنا عن كده طبعا بس ده اللي حصل الحمد لله
وبعدين في يوم العودة انا بتأكد من الميه والزيت والحاجات دي ومسكنا طريق العلمين
ماشيين زي الفل و بعد حوالي خمسة كيلو لقيت الحرارة عليت اوي وشامم ريحة غريبة
اديت الو للعربية عشان يقفوا وفتحت الكابوت ولاقيت العربية مافهاش ميه وعرفت السبب كان الغطاء , الغطاء مش مقفول كويس
اعدنا ندور على ميه في العربيتين مفيش ازازة ميه مليانة
وطبعا واقفين في الصحرا وعربية بتعدي كل خمس دقايق وممكن تقف وممكن لأ وعلى فكرة اتصورنا صورة وفيديو في الوضع ده
المهم الناس الجدعان كانو بيقفولنا الناحية التانية المهم مليت الاربة و قفلتها كويس(طبعا)
شغلت الموتور كان تمام بس كان في صوت غريب (عرفت ايه هو بعدين)
كملت الطريق وكان في راجل عنده حوالي 60 سنة واقف مستني حد يقفلو في نص الصحرا في عز الحر عديتو بعدين وقفت ورجعت وركب معايا كان وزنه حوالي 100 وانا كان وزني حوالي 100 (80 حاليا)وواحد كمان نفس الكلام واتنين تانيين حوالي80 غير الشنط
وكملنا الطريق على 160 بدون مبالغة ده العداد الديجيتال كان سعات يقرا 165 166 كده وطبعا الثبات تمام اوي مع الوزن الراكب فيها
وصلنا مصر الحمد لله ورحت للميكانيكي عشان اسأل عن الصوت الغريب ده ومعلش هكمل بكرة عشان مضطر انزل
السلام عليكم