الموضوع: حضرتك ليه أشتريت العربية ؟؟

المشاركة الأصلية كتبت بواسطة osamaos20022

متابع

اتمنى حضرتك متكونش واجهتك اي مشاكل عند شراء السيارة

بس اكيد حضرتك اشتريت السيارة لسبب :)

المشاركة الأصلية كتبت بواسطة أبو آسر

أنا اشتريت العربية طبعا علشان أرحم نفسي وأهلي من بهدلة وذل المواصلات سواء كان ميكروباصات أو حتى التاكسيات اللي بقت بتتنك على الزباين وبيركبوا الناس بمزاجهم لدرجة إني أحيانا بيبقى هاين عليا أقول لسواق التاكسي انت عايز تروح فين وأنا آروح معاك !!

الحته دي فصلتنيييي ضحك

معاك حق في حكاية ذل المواصلات وسائقي التاكسي

طيب ايه المشاكل الي بتقابلك وانت سايق او وانت بتعمل صيانة ؟

المشاركة الأصلية كتبت بواسطة أبو آسر

المشاكل اللي بتقابلني وأنا سايق إني من النوع العصبي شوية ومش بستحمل برود كتير من السواقين سواء كان ملاكي أو أجرة يعني تلاقي واحد ماشي على الشمال براحته خالص وعمال ماسك الموبايل وسرحان مش فايق للي حواليه وتقلبله نور أو تديله كلاكس وهو ولا هو هنا الحركة دي بتغيظني جداااا ودي حاجة من ألف حاجة معروفة في شوارع مصر سببها انعدام ثقافة المرور والجهل التام بقواعده وآدابه
بخصوص الصيانة فأنا مش بعمل صيانات في التوكيل علشان مش بحب الاستغلال وعلشان مؤمن إن اللي بيشتغل في التوكيل ده مش خبير ميكانيكا وزيه زي أي صنايعي برة فبروح لصنايعية معينين بثق فيهم بعمل صياناتي عندهم ولذلك مفيش مشاكل بتواجهني الحمد لله في الصيانة
بصراحة العربية رحمة ونعمة في بلدنا دي ربنا يديمها علينا ويرزق اللي معندوش بس بشرط يتعلم يسوق صح الأول علشان ميتعبش الناس معاه !!!

انا استفدت جامد من الكلمتين دول جزاك الله خيرا

وعشان كده ياريت الي يدخل الموضوع يشارك ويكتب هو بيحب ايه وبيكره ايه اكيد فيه ناس موجودة بتعمل حاجات بتضايق في السواقة لما تشوف ناس مضايقها منها متعملهاش ونستفاد

انا مشتريتش عربيتي.. والدي لما اشتري عربيه جديده مشكورا تنازل لي عن سيارته القديمه
في الواقع انا طالما سنجل فانا فعلا بؤيدك ان العربيات مقرفه وقلتها احسن لكن المشكله الكبيره ان معندكش بديل هنا غير انك يا اما تتمرمط جامد ف المواصلات يا اما تقضيها تاكسي
التاكسي طبعا اغلي الي حد ما.. يعني انا شهريا بكلف عربيتي حوالى 700 جنيه مصاريف وةده طبعا ف حاله ان ربنا مسهلها ومحصلش حادثه جامده لا قدر الله
اما التاكسي هيكلفني حوالي 1500
تعرف؟.. انا مؤخرا اتفقت مع مجموعه من زملاء العمل وركنا عربياتنا واتفقنا مع سواق عربيه ميكروباص يوصلنا كل يوم ومرتاح ومبسوط جدا
لكن المواصلات ف مصر عموما مش كده.. تقعد علي كراسي مكسره وتاخد مكانك بالخناق وتسمع اغاني شعبي بالعافيه وتشم عرق الشعوب وسواقه ميكروباصات يشيب لهولها رأس الغلام
لكن طبعا حتي لو المواصلات اتحسنت العربيه بتباه ضروره لو عائله مش مجرد واحد سنجل

أنا جايبها عشان أنا من المنصورة و جامعتى فى القاهرة و بعد 5 شهور سفر رايح جاى أسبوعيا تعبت جامد من البهدلة و الشيل و لو معايا مثلا حاجة ماينفعش تتحط فى شنطة صغيرة زى البدلة أو غيره و لازم امسكها و كل الكلام ده. و حسبتها طلعلى أن كده كده تكلفة السفر بالعربية لشخصين (أنا و أخويا) هى نفسها التكلفة للمواصلات و بالتالى جبت عربية.
فى وسط البلد بقى, بستخدمها على طول فى كل مشاويرى فى المنصورة لأن السواقة هنا حلوة و مشاكلها عادية و معظم سواقين المنصورة سواقين بجد مش أى كلام ده غير أنى بحب أسوق. فى القاهرة بتتركن طول الأسبوع حتى بروح الجامعة مواصلات عشان هى هياها و التكلفة أقل و مافيش بهدلة جامدة فى مواصلاتى العادية بتاعة كل يوم. فى الخروجات و الفسح و اللى زى كده بأخدها عشان التاكسيات غالية نار و المواصلات العامة بتدمر الخروجة نسبيا لو مش عارف أنت رايح فين بالضبط و ازاى (العربية معايا بقى foursquare و gps و maps و المسائل لذيذة).
أنا غاوى جدا سواقة لدرجة رقم الميكانيكى و العفشجى الاتنين على speed dial :D قبل أبويا و لكن فى رأيي المفروض أن العربية ما تستخدمش أبدا أبدا فى commuting يعنى ما ينفعش تروح كل يوم شغلك بالعربية, من الأحسن تستخدم مواصلات عامة لأنها أوفر و أنت عارف مشوارك بالضبط و مش هيبقى معاك حاجة غير شنطة على ظهرك أو فى أيدك و خلصت.
و لكن استخدامك لسيارتك فى المشاوير الروتينية اللى مش محتاج فعلا فيها سيارة و بتعملها يوميا على الله ده فى رأيي مش تصرف مسؤول لأن كده بتلوث البيئة, بتصرف كتير و بتضر ماديا, ممكن لا قدر الله تعمل حادثة و يومك يبوظ, ممكن تتعصب, غيره كتير يعنى. و المفروض يعنى أنك طالما مش محتاج العربية فعلا يبقى ماتستخدمهاش و تسيبها مركونة, على الأقل بتوفر فى الكيلومترات عشان لما تيجى تبيعها ده غير البنزين اللى غلوه و ماعادش من الناحية الذكية ماديا أنك تستهلكه كتير كده.