صيانة ال 2005 لل 2008 في الاسكندرية.

**nav man** · 20-05-2014 12:10 PM

قبل اي حاجة شكر واجب للمهكدس احمد طوبر والمهندس احمد عادل.انا رحت النهاردة الساعة 8:30 مكانش موجود غير الراجل بتاع البوفية بالضبط 5 دقايق وكل التوكيل وصل لقيت احمد طوبر سلم عليا وقالي ال 2008 بتاعتك قولتلة معلش انا محجزتش بس معلش علشان الشغل بتاعي قالي بالضبط 15 دقيقة وابداء في الكشف عليها قولتلة ربنا يكرمك واداني رقمة علشان قبل ما ارود بيوم اكلمة واللة منتهي الزوق والاحترام.بداء يبص علي العربية من برة ودخل جواها واخدها علي الصيانة جواة انا استنيت بالضبط 10 دقايق وجالي قالي العربية كانت محتاجة ربع كيلو زيت وحطنلها وراح تاني يستقبل عربيات كانت الساعة وصلت تقريبا 9:15 واللة ابتدا في العربية قبل ما يشتغلوا الساعة 9.وجالي تاني بعد ما دخل عربيتن 301 وقالي عملنا كاشف كامل علي العفشة والزيوت والمياة وبصينا علي الفلاتر وكلوا تمام.سالتة بعدها علي قطع الغيار قالي بالضبط 20 يوم وهرد عليك علشان الاكسسوارات بتعتها هتيجي وقطع الغيار.لسة ملهاش حاجات اوي بس قالي هي هي التابلوة والموتور بتاع ال 208 الاختلاف في البودي.وبعد كدا وقف معايا علشان معجب جدا بالعربية هو واحمد عادل وقالي لو معايا فلوسة هشتريها وقتي.المهم العربية طلعت 9:20 والراجل قعد يغسلها وخلصها قولت للمهندس احمد طوبر هكلمك علشان اعرف اسعار قطع الغيار قالي كلمني في اي وقت بس بعد اسبوع علي الاقل.واخدت العربية وانا بدور العربية افتكرت اني مش عارف اشوف الصور من علي الموبيل جالي احمد عادل وقالي الموبيل مش هينفع ودخل فلاشة وقالي ان شاء اللة هتعرض الصور واللة انبسط لما لقيت الصور بتتعرض من الفلاشة بتاعتوا.قالي كمان مش هتعرض اغاني او كليبات علشان الامان اثناء السواقة قولتلة طيب ينفع اركب دي في دي زي اللي في ال 5008 قالي هيتاكد.واخدت العربية الساعة 9:45 ومشيت ..بالضبط ساعة وكنت ماشي...نقول اللي ليهم واللي عليهم طبعا منتهي الادب والاحترام وقالولي احنا مقدرين مشاعر الناس لما بتزعل.هما كانوا حبين اوي العربية وقالوا ان امكنياتها حلوة اوي.اللي عليهم الاستراحة وحشة جدا لازم يحسنوا منظرها .اما من ناحية الشغل اللي شوفتة واللة الاهتمام بالعميل وبيسمعوا الشكوي بكل احترام وكل جد.ربنا يوفقهم علشان يريحونا وهما يشتغلوا بحب واهتمام.النقطة المهمة معلش طوليت انا قولتلة انا عضو في نيل موتورز وعضو قديم قالي اهلا وسهلا الكلام دا لاحمد طوبر وقولتلة ان الناس بتشكر جدا فيك قالي واللة انتوا اللي عملاء وموقع محترم.واللة بجد هما ناس محترمة.ودا كان اول تعامل ليا واول تعامل للبيجو 2008 مع التوكيل.بدية جيدة . وانا تحت امركم في اي استفسار عن ال 2008

**nav man** · 20-05-2014 01:19 PM

معلش تعديل العنوان صيانة ال 2500 وللمعلومية انا رحت علي 2900 وقالي معاك ل 3500 وبردو صيانة ال 10000 ممكن من 9500 ل 10500.

**nav man** · 20-05-2014 01:20 PM

ووبردوا ميعديش 6 شهور يعني ايهما اقرب 6 شهور او 10000

**nav man** · 20-05-2014 01:27 PM

معلش كل ما بفتكر حاجة بقولها.تكلفة الصيانة اللي جاية 700 ودي فيها تغيير زيت وفلتر بس مافيش اي حاجة تانية.

**ابو هنا** · 20-05-2014 01:55 PM

المشاركة الأصلية كتبت بواسطة nav man

معلش كل ما بفتكر حاجة بقولها.تكلفة الصيانة اللي جاية 700 ودي فيها تغيير زيت وفلتر بس مافيش اي حاجة تانية.

الف مبروك على الجميلة 2008 ، عندك حق على زوق وادب المهندسين في الاسكندرية سوا احمد طوبار او احمد عادل وده كان راي فيهم بمنتها الامانة ، ودة بالضبض اي انا قلته على صيانة 10000 كم تغيير زيت وفلتر فقط بس برده 700 جنيه ممكن تكون كتير شوية على زيت وفلتر .

**nav man** · 20-05-2014 01:57 PM

ماهو علشان زيت وفلتر ومصنعية علشان بيعمل كشف علي كل حاجة.

**abohend** · 20-05-2014 08:07 PM

و الله أنتو بتفتحوا نفسي
الواحد أصيب بإحباط من تقارير الصيانة في القاهرة

**nav man** · 20-05-2014 09:05 PM

لا واللة اكيد يافندام الناس المحترمة في كل حتة .

**m1988** · 20-05-2014 09:29 PM

انا كان عندى سؤال بس انا محتار ما بين البيجو 2008 الفئه الاولى او رينو فلوانس الفئه التانيه اهم حاجه عندى العفشه تكون نعمه وسعر اعادة البيع

**abohend** · 20-05-2014 09:42 PM

المشاركة الأصلية كتبت بواسطة m1988

انا كان عندى سؤال بس انا محتار ما بين البيجو 2008 الفئه الاولى او رينو فلوانس الفئه التانيه اهم حاجه عندى العفشه تكون نعمه وسعر اعادة البيع

عفشة ناعمة يبقى ابعد عن أي suv و خليك في الفلوانس أفضل
إعادة بيع العربيتين غير جيدة (بالمقارنة بالكوري و الياباني) لكن الفلوانس أفضل

لو عايز عربية عائلية الفلوانس أفضل لكن ال2008 شكلها مميز جدا و السقف البانوراما ده حكاية بس الصالون مش واسع كفاية
بالتوفيق و متنساش الإستخارة