آي 10 - 2008 - بتقف لوحدها وأنا ماشي

**د أحمد يونس** · 21-05-2014 07:36 PM

السلام عليكم ورحمة الله وبركاته

العربيه بتاعتي هيونداي i 10 موديل 2008 بتقف لوحدها وأنا ماشي فجأه كأنها قطعت بنزين .. آجي أدوس ع الدواسه مالاقيش سحب خالص وبعدين تقف وأحاول ادورها يا إما ماتدورش خالص يا إما تدور عشر ثواني كده وبعدين تقطع تاني وأحيانا تدور أكتر شويه وممكن تسمع صوت طرقعه خفيفه مع دوسة البنزين وبعدين تفصل .. أسيبها لمدة ربع أو تلت ساعه بالكتير وأدورها تاني تدور وتمشي ولا كأن فيه أي حاجه .. رحت للميكانيكي المره الأولي قالي حساس الأيدل عايز يتنضف ونضفهولي وقالي كده تمام .. لكن بعد شويه اتكرر الموضوع ده تاني .. رحتله قالي كده مكنة البنزين هي السبب وغيرها هي وفلتر البنزين .. قالي المكنه لما بتسخن بتفصل !!
مع العلم بإن: درجة حرارة العربيه مابتعلاش .. والميه مظبوطه .. البطاريه جديده .. البوجيهات جديده وسألت الميكانيكي علي سلوك البوجيهات قالي مافيهاش حاجه .. استهلاك البنزين طبيعي والسحب مظبوط .. لسه مغير الزيت ..
ومع ملاحظه كمان مش عارف ليها علاقه بالعطل ولا لأه إن العطل ماحصلش المرتين غير لما كنت مشغل التكييف وماشي ع الأقل ساعة متواصل

دلوقتي أنا خايف العطل ده يحصل تاني ياتري إيه ممكن يكون سبب تاني في حاجه زي كده .. وهل لو كشفت علي العربيه كمبيوتر هيبان ولا لأه .. وهل الميكانيكي كده ماشي معايا بشكل كويس ولا بيجرب وخلاص .. أرجو الإفاده وشكرا جزيلا لمساعدتكم

**د أحمد يونس** · 23-05-2014 04:32 AM

مفيش ردود ولا إيه

**ozo_eg** · 23-05-2014 12:06 PM

متابع لمعرفة حل المشكلة

**svneleven** · 23-05-2014 01:22 PM

أنت تقصد طرمبة البنزين. عامة احتمال كبير تكون هي السبب. ان شاء الله تكون المشكلة اتحلت و يا ريت تعرفنا أخر الأخبار.

**J A G U A R** · 23-05-2014 06:29 PM

اكشف عليها كمبيوتر وشوف ايه اللى فيها بدل ما تفضل تغير حاجات فيها ومش هيا السبب وابقى عرفنا ايه الاخبار

**J A G U A R** · 23-05-2014 09:21 PM

المشاركة الأصلية كتبت بواسطة د أحمد يونس

شكرا علي مروركم .. أنا فعلا هشوف هيتكرر معايا العطل تاني ولا لأه بعد ما غيرت "طرمبة البنزين" .. بس كنت عايز اعرف لو أمكن إيه الأسباب التانيه لحاجه زي دي وهل في أسباب مش هتبان لما افحص كمبيوتر ولا لأه

ممكن بردو يكون حساس الكرنك
والكمبيوتر هايكشف كل حاجه

**م.محمد علاء** · 02-06-2014 01:48 PM

الموضوع ده حصل معايا و إن اختلفت بعض النقاط.
انا مثلا كانت بتبطل لما بهدي و اشيل رجلي من على الدواسه.
نضفت الحساس و البوابه.مع العلم إن العطل مفيهوش كود يعني الكمبيوتر مش بيقرا اعطال خالص.
بعد حوارات طويله مع التوكيل.
تم تغيير البوابه.وغن كان ده مش السبب الرئيسي ،السبب كان فيه تهريب من ضفيرة الكهرباء الخاصه بالبوابه..و دي اسوأ عطل ممكن يحصلك و هو نتيجة سوء توصيل فولت أو سيجنال نتيجة وجود تآكل أو عدم ربط سيلك او عزله بصوره ممتازه.
ولكن موضوع حضرتك.طالما العربيه بتبطل من نفسها و مش بتدور على طول يخرجنا من احتماليه وجود تهريب في الضفيره ان شاء الله.
اعتقد ان موضوع طلكبة البنزين و كونها لما تسخن اقرب للواقع.و التجربه خير دليل.
استبعد موضوع حساس الكرنك نوعا ما و بصوره مؤقته لن العطل ده و ان كانت ليه نفس الأعراض إلا انه لازم يديك كود تشيك إنجين و اللمبه لازم تنور

**د أحمد يونس** · 07-06-2014 02:13 AM

المشاركة الأصلية كتبت بواسطة م.محمد علاء

الموضوع ده حصل معايا و إن اختلفت بعض النقاط.
انا مثلا كانت بتبطل لما بهدي و اشيل رجلي من على الدواسه.
نضفت الحساس و البوابه.مع العلم إن العطل مفيهوش كود يعني الكمبيوتر مش بيقرا اعطال خالص.
بعد حوارات طويله مع التوكيل.
تم تغيير البوابه.وغن كان ده مش السبب الرئيسي ،السبب كان فيه تهريب من ضفيرة الكهرباء الخاصه بالبوابه..و دي اسوأ عطل ممكن يحصلك و هو نتيجة سوء توصيل فولت أو سيجنال نتيجة وجود تآكل أو عدم ربط سيلك او عزله بصوره ممتازه.
ولكن موضوع حضرتك.طالما العربيه بتبطل من نفسها و مش بتدور على طول يخرجنا من احتماليه وجود تهريب في الضفيره ان شاء الله.
اعتقد ان موضوع طلكبة البنزين و كونها لما تسخن اقرب للواقع.و التجربه خير دليل.
استبعد موضوع حساس الكرنك نوعا ما و بصوره مؤقته لن العطل ده و ان كانت ليه نفس الأعراض إلا انه لازم يديك كود تشيك إنجين و اللمبه لازم تنور

ألف شكر لمرورك واهتمامك .. الحقيقه انا رحت بالعربيه مشوارين خفاف كده محصلش فيهم مشاكل لكن لسه مجربتش العربيه في مشوار طويل لأن عندي امتحانات الفتره دي ومش بمشي بالعربيه كتير ,, لكن ربنا يسهل محصلش حاجه لحد دلوقتي ويارب يكون كده العطل اتحل