تقرير صيانه ال100 الف - لانسر بوما 2007 - مركز سبيد سيرفس / م هاني ميخائيل

**behman** · 23-05-2014 07:36 PM

السلام عليكم

حبيت انقل تجربه الصيانه لانسر 2007 لتعم الفائده و اعرف الناس اسعار قطع الغيار و المشاكل اللي كانت موجوده و جوده الخدمه في مركز سبيد سيرفس و المقابله المحترمه و زوق م / هاني وده كان اول تعامل بينا و اكيد مش اخر تعامل بعد اللي شوفته

انا طبيت علي المركز الساعه 11 كده من غير معاد ورغم الشغل اللي كان موجود في المركز خلصت كل اللي كنت عايزه و زياده شويه

المطلوب كان عمل صيانه ال 100 الف و كان في مشاكل في السلانسيه و السحب و كانت العربيه بترجرج مع التكييف و كانت لمبه الاير باج منوره لوحدها ( من غير اي حوادث )

بعد رفع العربيه و الكشف وتشخيص المشاكل اشتريت الحاجات دي من الشرقاوي اللي في جسر السويس قدام نادي الشمس و كل الاسعار دي اسعار الاصلي عدا التيل ( اسباني عشان الطنابير هاتتغير كمان 20 الف فحرام اركب تيل اصلي ب 550 ج علي طنابير قديمه )

قاعدتين موتور 700 ج
قاعده فتيس 525 ج
تيل امامي 120 ج
سير كاتينه 165 ج
بليه كاتينه 220 ج
2 سير خارجي 195 ج
طقم بوجيهات 135 ج
زيت موتور و فلتر الفلتر 60 ج ومش فاكر الزيت كام
فلتر هواء 240 ج
فلتربنزين 550 ج
فلتر تكييف 290 ج
4 ك زيت موبيل atf 220 140 ج

اسعار الحاجات دي مش اصلي اقل من نص السعر علي فكره من عند الشرقاوي برضو عشان الناس اللي هاتقول الاسعار دي غاليه

تم عمل الصيانه و التركيب و ظبط الكهربا علي الاسكانر و تربيط العفشه و ظبط الفرامل قدام و ورا و غسيل الموتور و غسيل سربنتينه التكييف و تنظيف البوابه و الحساسات و مسح ايرور الايرباج بس للأسف طلعت ساعه الايرباج فيها مشكله وعايزه تتغير و الكلام ده كله بخصم محترم علي المصنعيه .

بعد كل ده طلعنا جربنا العربيه و الحمدلله بقت حاجه تانيه خالص و كل المشاكل انتهت فعلا و اخدت استيكر المركز و فاتوره مفصله بالشغل و المصنعيات

[COLOR="rgb(75, 0, 130)"]سعر مصنعيه الكلام ده كله 260 ج فقط ايوه 260 بس
طبعا بعد واجب خصم محترم من م/ هاني عشان ده كان اول تعامل [/COLOR]

في الاخر اجب اشكر م/هاني علي امانته و مقابلته الحلوه و ال8 شاي و قهوه و جوده الشغل و اسعار المصنعيات الهايله

**gadoo30** · 23-05-2014 07:45 PM

الف مبروك على الصيانة والمهندس هانى معروف من زمان بزوقة وكرمة والشغل ال مية مية

**behman** · 23-05-2014 08:32 PM

[quote][/الف مبروك على الصيانة والمهندس هانى معروف من زمان بزوقة وكرمة والشغل ال مية ميةquote]

تسلم ياباشا ربنا يخليك ... انا نسيت اقول حاجه مهمه ان العربيه اصلا مش عربيتي ... هي بتاعت واحد صاحبي
انا معايا نيواكسنت 2006 و هاعمل تقرير صيانه قريب عنها انشاءالله

**J A G U A R** · 23-05-2014 08:54 PM

عقبال صيانه ال 500 الف

**عادل البطل** · 23-05-2014 09:20 PM

وعايز أعرف منك لو سمحت الصيانة اتكلفت كام شاملة المصنعية

**ahmedamgad18** · 23-05-2014 10:13 PM

الف مبرووك ياباشا .... وربنا يبارك لك فى سيارتك وسيارة صاحبك
بس استفسار يا باشا ... عشان انا اتلغبطت

هى دى اسعار قطع الغيار الاصلى ... ولا غير كده ؟

واستاذنك عنوان المركز ده فين فى القاهرة ؟
والف شكر .... ومبرووووك

**Fadi Ezzat** · 24-05-2014 01:27 PM

واللة اسعار فوق الممتازة

**behman** · 24-05-2014 06:11 PM

الف مبرووك ياباشا .... وربنا يبارك لك فى سيارتك وسيارة صاحبك
بس استفسار يا باشا ... عشان انا اتلغبطت

هى دى اسعار قطع الغيار الاصلى ... ولا غير كده ؟

واستاذنك عنوان المركز ده فين فى القاهرة ؟
والف شكر .... ومبرووووك

الله يخليك ياباشا ... تسلم
الاسعار دي كلها اسعار الاصلي عدا التيل اسباني ب120 ج
و سعر التيل الاصلي 550 و سعر الطنابير الاصلي 1500

و المركز اسمه سبيد سيرفس - 10 ش 10 خلف حديقه بدر متفرع من جسر السويس
م / هاني 0106090088