الموضوع: كروز 2014 ولا فيلونس 2014 اول فئه اتوماتيك؟

المشاركة الأصلية كتبت بواسطة hany saad

الف مبروك مصطفى بيه...ربنا يباركلك فيها و يكفيك شرها
و منتظرينك فى قسم رينو تشرفنا و تقولنا انطبعاتك عن العربية
تحياتى

الله يبارك فيك يارب يابشمهندس
انا لسه مستنى الورق بتاعها هيجى ان شاء الله الاسبوع ده
مش عايز اطلعها من الجراج اللى لما اعلق النمر ان شاء الله
باذن الله بعد 1000 كيلو هكتب تقرير عنها وان شاء الله تكون جميله يارب
وانا ليا الشرف طبعا انى بقيت معاك فى قسم الرينو

المشاركة الأصلية كتبت بواسطة midooo_119

اختيار موفق ياباشا و ربنا يباركلك فيها

الله يبارك فيك يا باشا

ألف مبروك ربنا يباركلك فيها عربية محترمة جدا

الف مبروك وربنا يبعد عنك وعنها العين ويديك خيرها ويكفيك شرها

المشاركة الأصلية كتبت بواسطة moustafa nabih

متشكر اووووى يارجاله ناس فاهمه جدا ومحترمين
الحمد لله ربنا وفقنى لاختيار الفلوانس e2 موكا اللى ب 155 الف ( اخدتها ب 153500 الف من المصريه جرين بلازا ) عن الكروز علشان شوية حاجات من وجهة نظري المتواضعه
اولا الكروز :
1- هما قايلين عليها انها هاى لاين ازاى وهى مفيهاش usb , blutoth . Aux ولا مثبت سرعه ولا محدد سرعه
2- هى شكلها قديم شويه بدون تعديلات جوهرية تقريبا من ساعة منزلت سنه 2009
3- الكراسي الى ورا مش بتضم !!! حاجه غريبة
3- الفكرة عند الناس ان لسه فيها مشاكل الفتيس ( ودى نقطه تعبتنى نفسيا ) مع ان عارف الموتور اتغير زي بتاع الاسترا بس طبعا الناس بتفضل واخده الانطباع ده وصعب يتغير
4- حجم العربية كبير على 115 حصان ( الكورز اتقل زيادة 100 كجم على الفلوانس اللى هى برضه 115 حصان )
5- توكيل منصور على الكلام اللى سمعته انه مش تمام اوي
6- احتمال نزول الشكل الجديد 2015 والله اعلم
7- اضيق من الفلوانس ( وجهة نظر انا شايفها كده مش عارف ليه )

بس برضه الحق يقال
1- قاعدة الكروز جميله جداااااا والكراسي من احلى الكراسى اللى قعدت عليها بأمانه ومريحة وفخمه جدا
2- شكل التابلوه جميل جدا واشيك من الفلوانس بمراحل ( وجهة نظري )
3- يوجد عزل فى الكبوت
4- يوجد مخرج 16 فولت ( مش موجود فى الفلوانس e2 موجود فى الفئات الاعلى )
5- طبعا esp
6- جنووووووووووووط 16 شيك اوي

ثانيا الفلوااااااااااانس :
1- شكل جديد
2- عدادت الديجتال حلوه جدا
3- فيها بلوتوث . Usb . Aux ومثبت سرعه ومحدد سرعه
4 -ستارة خلفيه
5- موتور وفتيس وتكييف يابانى ( اكيد احسن ان شاء الله )
6- الكراسي بتضم الشنطه كده ممكن انام جواها :d
7- توكيل رينو ناس كتير بتشكر فيه ( معرفش اسعار قطع الغيار لسه بس تقريبا مش غاليه اوى )
8- اوسع من الكروز
9- انا كنت مستريح نفسيا فى الفلوالنس ( مش عارف ليه )
10- العربية اعلى فئة 200 الف يعنى يتتقارن بالكورولا يعنى عربية كاتجوري اعلى من الكروز

العيوب
1- مفيهاش esp ( على فكره انا مش من هواة السرعه يعنى 100 حلو اوي )
2- مخرج 12 فولت ( بالنسبه لى مش فارقه )
3- مفيهاش جنوط ( موجوده فى الفئات الاعلى ) ان شاء الله بعد فتره اقدر اغير الجنط الحديد
4- مفيهاش سينسور مش موجود برضه فى الكروز

انا كان نفسي ازود واجيب e3 بس الحمد لله مكنش انفع ازود اكتر من كده ( انا كنت حاجز 301 هى لاين وزدوت وجبت الفلوانس فده كان اخري الحمد لله اولا واخيرا )

يارب يكون اختياري موفق ويبعد عنها وعنى يارب شرها
ومره تانيه متشكر اوى على الاهتمام وشرح مميزات وعيوب كل عربية من احسن ناس فى احلى منتدى

الف مبروك يا باشا وربنا يباركلك فيها ... انا تقريبا كنت داخل اكتب نفس موضوعك ... انا نفس حالتك بالظبط ... كنت بفكر في الاليزيه او ال 301 والاتنين عاجبني جدا جدا وخصوصا الاليزيه ومتابعهم بقالي فترة وشايف استهبال التوكيل في الاتنين وفي ناس غير راضية عن العربية وانا بصراحة مش هروح اشتري عربية زيرو علشان يتحرق دمي كل يومين بمشاكل او باستهبال من التوكيل وخصوصا ان العربية جديدة فلازم يرضي الناس بأي شكل وللاسف العكس تماما هو اللي بيحصل حاليا ... وده اللي خلاني ابدأ افكر في حاجة تانية وقلت بدل ما ادفع 140 وانا كدا كدا هجيب قسط ... اقدر ازود لحد 150 او 155 بالكتير واشوف عربيات تانية ... ومفيش تقريبا غير الكروز والفلونس e2 ... الفلونس شكلها عاجبني من بره اكتر من الكروز ... والعكس من الداخل الكروز تابلوه اشيك من الفلونس بغض النظر عن العداد الديجيتال التنين في الفلونس ... بس هروح اركب الاتنين واشوف مين الافضل فيهم

لو حد يعرف اي معارض في القاهرة عندهم الاتنين علشان اقارن بينهم يبقي تمام اوي
ولو حد عنده اي اقتراحات تانية او اي تعليقات علي العربيتين دول يا ريت يفيدني لاني محتار بقالي اكتر من شهرين ومش عايز ادفع فلوس في حاجة وارجع اندم عليها والواحد مش بيشتري عربية كل يوم دا هي مرة كل فين وفين