الموضوع: a11 انطباعات واستفسارات

المشاركة الأصلية كتبت بواسطة Dr amr samir

[OVERLINE]السلام عليكم
انا جديد فى هذا المنتدى ودى اول مشاركة ليا
ما شاء الله شايف ناس جميلة وبتحب بعض ومهتمين
انا لسه جايب a11 مو 2005 عاملة 130000 كيلو
بصراحة انا شايفها كويسة خاصة بعد الفيات وكانت مع واحد زميلى لمدة سنتين وكانت هايلة
ودى بعض الحاجات :
1- من حيث الخارج عندى كف مراية يمين مكسور ومتركبلها مراية عادية بس سىئة للغاية والنقطة العمياء لها كبيرة ومش لاقى زيها
2- العتبة اليمين واقعة نتيجة حكة رصيف يبدو بس دى موجودة 70 جنية
3-لماجيت اغير الزيت نزلت 2 ونص لتر وكان تحت العربية غرقان زيت بصراحة اتخضيت وحطيت موبيل الف كيلو اختبار ومشيت عليهم حوالى تمنمية كيلو وجيت انزل لقيتة 3 ونص بالفلتر ( مكتوب فى الكتلوج ان العربية بتاخد 3.75 لتر بالفلتر بصراحة اتطمنت شوية
4- رحت غسلت الموتور بالجاز ورفعت العربية علشان ظبط زوايا فالراجل قالى ان اولسية الكرنك الخلفى ضارب وهو اللى بيرشح زيت وتغييرة عاوز فك فتيس ب 250 جنية تكلفة بس بيرشح خفيف ومابينقطش فخلية مع صيانة الديسك والاسطوانة اللى هما كويسين
5-فلتر الزيت كان ضارب وجبت حاجة فنلندى ب 25 جنية ولقيت اللى راكب فيها بتاع دايو ب 20
--
6- غيرت مكنة المرشدير بواحدة a516 وشغالة كويس اربعين جنية
7-قربة المية البزبوز بتاعها مكسور وملزوق بمعجون حديد قلت اغيرها بس لقيت اللى موجودة فى بنها اتنين بزبوز فمستنى الاقيها
8-المية بتنقص بس مش عارف بسبب تسريب بسيط فى القربة ولا حاجة تانية مع العلم ان الراديتير جديد
9-العفشة محتاجة بطاحتين امامى وجلب مقصات بس ملاحظ نقر ورايا مش عارف فيه حاجة فى العفشة الخلفية ولا لاء ... لقيت البطاحات الصينى ب 130 جنية بس مش عارف هل ادور على الالمانى؟
10- ملاحظ صوت الموتور عالى سنة وفيه هزة وانا واقف حاسسها فى العربية والدركسيون وهزة فى الطلعة مع العلم ان الناس قالتلى ان الديسك والاسطوانة كويسين
11- مش لاقى كلبسات العتبة الامامية خالص فى بنها فهل يتوفق عليها حاجة تانية
12- السرعة القصوى ليا 120 كيلو وبعدها العربية وابور والار بى ام على 4
13-غيرت زيت ليكوى مولى معدنى 20-50 العربية هادية علية وبتسحب حلو ما شاء الله بس لما اجى اقيس الزيت الاقيه بينقط من على المقاس بينقط بينقط يعنى واللى قبلى كان بيحط شيل
14- العربية وانا بشتريها الراجل قالى فيها بخرة بسيطة يعنى موتور 70% بس مش عارف شنبر ولا اصبر عادى

اسف للاطالة وارجو تفيدونى
[/OVERLINE]

وعليكم السلام
اولا: مبروك على العربية وربنا يكفيك شرها.
ثانيا: ح ناخد النقط بتاعتك نقطة نقطة.
1- المراية كلها بتتباع عند صقر او ف التوكيل وانا عامل موضوع عن المراية هنا ف المنتدى ... انت لازم لك مشوار مصر تلم فيه الحاجات اللى ناقصاك ف العربية.
2- النقطة دى انت لقيت لها حل.
3- موضوع فقد جزء من الزيت انت عرفت التسريب فين والعلاج.
4- خليه مع صيانة الديسك ان شاء الله طالما مالوش تأثير سيئ على الاسطوانة.
5- فلتر الزيت مهم جدا ح تجيب فلتر هنجست المانى Hengst - H14/2W وده بيتغير على 10000 كم.
6- ماكينة المرشدير حضرتك حليت المشكلة.
7- و 8- مشكلة قربة مياة التبريد محتاجة مشوار الحرفيين وتجيب واحدة استعمال جولف 3 ومادام الموجوده شغالة ح نتعكز عليها الى ان نشترى الجديد.
9- بالنسبة للعفشة كلها جولف2 و3 المقصات جولف 2 المساعدين والبطاحات جولف3 واذا كان المقصات حالتها كويسة حتغير الجلب عند عفشجى كويس بياخدهم عند الخراط ويركبلهم على المكبس جلب ماتسوبيشى بعد تعديلها، جلب جولف2 بتركب بدون تعديل.
10- هزة الموتور ممكن تكون من القاعدة الامامية خلف الردياتير ودى كاوتش بالزيت جولف3.
11- اذا كان قصدك على العتبة البلاستك اللى داخل الباب الامامى دى ح تجيبها من التوكيل علشان ما فيش حاجة ح تركب عليها.
12- السرعة القصوى ليها ف الكاتالوج 185 كم/ساعة بس انا جبت بيها 150 مستريح وصوت الموتور عالى فعلا !!! بس انا ما بزودش عن 120 كم/ساعة ف السفر حرصا على حياتى و حياة من يركب معى بحد اقصى 4000 لفة على الموتور ودى بتعمل 125 او 127 ودى حلة نادرة جدا.
13- بالنسبة للزيت حضرتك ح تستعمل زيت شلل هيليكس الاصفر HX5/ 15W-50 وده موجود عند بتوع الزيت بس واحد نضيف مش مضروب علشان بنزينات شلل اتباعت لتوتال.
14- مش مهم موضوع البخر ده سيبها لما تجيب اخرها.
ارجو انى اكون قدرت اغطى اسئلة حضرتك وانا اسف على التأخير عليك اللاب بتاعى بعافية شوية وجارى اصلاحة وبدخل من لاب بنتى.
والله الموفق.

اولا ربنا يباركلك فيها و يحفظها لك من كل شر و سوء و يعينك و ييسر لك اصلاح ما بها
بص يا سيدى بالنسبه للمرايات انا اشتريتها من صقر اللى فى المعادى الجوز بحوالى 100 جنيها انا طبعا بتكلم عن البللوره فقط مش كل المرايا طبعا و بتركب كبس و صاحبى اشتراهم من بتوع الشيرى بالتوفيقيه الزوج بحوالى 90 تقريبا لكن مكنوش بجودة بتوع صقر برغم انى شايف ان صقر بيبالغ فى سعر حاجات كتير لكن احيانا بيطلع من تحت ايده حاجات سعر معقول و خامه ايضا
بالنسبه لكلبسات العتب لما تنزل التوفيقيه ان شاء الله تجدهم عند بتوع الشيرى هناك و ممكن تأخذ معك العتبه كلها و هناك فى التوفيقيه على شارع رمسيس فيه بتوع كلبسات ممكن يوفقلك عليها حاجه
بالنسبه للزيت فيه زيت توتال 5000 جربه و إن شاء الله يعجبك و انا جربته و مش بطال و احتمال المره الجايه اجرب مصر للبترول لأنى وجدت كتير بيشكروا فيه فقلت مفيش مانع نجربه و العربيه بالفلتر بتأخذ اقل من4 لتر بقليل و بدونه 3.25 تقريبا
بالنسبه لفلتر الزيت هذه قائمة بالخيارات التى يمكن لك ان تختار منها
H90W01 Hengst Filter Germanyالأفضل
W712 MANN FILTER Germany
W17 MANN FILTER Germany
OC 21 MAHEL FILTER فلتر نمساوى
اما باقى التساؤلات فقد رد عليك فيها الأخوه الكرام
و بالتوفيق و لا تنسانا بالدعاء