المشاركة الأصلية كتبت بواسطة l0new0lf
انا هاقول رايى فى الموضوع و انا عارف انى هاتحدف بالطوب و يتقال عليا رجعى متحجر
1- العلاقات الانسانيه بين الراجل و المرأه مفيهاش حاجه اسمها صداقه
فى جيره, فى نسب و فيه زمايل عمل او دراسه. انما صداقه لا
2- ال3 اجيال الى قاعدين على القهاوى هيفضلوا قاعدين علشان هم عاجباهم القعده
3-الناس هتتكلم عن التوافق المادى و الاجتماعى و محدش هيكلمك عن التوافق النفسى بين االرجل والمرأه, لازم يكون فيه توافق نفسى
4- مش معنى ان واحد او واحده دخل تجربة خطوبه او حتى زواج و الموضوع متمش يبقى فيه حد غلطان, و مش معنى ان لو فيه 2 بيحبوا بعض و اتجوزوا الجوازه هتنجح
(نجاح الزواج له مقومات كثيره )
5- عمر ما كان السن مقياس للنضج, الاجيال الى فاتت (اجدادنا) كانوا بيتجوزوا اصغر من 20 سنه و كانت زيجات ناجحه, بص على الاحصائيات الان و شوف كام حالة طلاق, ده اساسه راجع لعدم النضج و قلة الخبرات و الاحتكاك بالحياه. كان زمان الناس بتشتغل فى الاجازه الدراسيه و كان برضه فى ناس بتشتغل اثناء الدراسه و كان فى احتكاك فى سن صغيره و ده كان بيدى خبرات فى التعامل مع الناس و المواقف, غير ان الناس كانت بتستشير الكبار
الان معظم الشباب خبراتهم من الدش و التلفزيون و بداية احتكاكه بالحياة بتبدأ بدخول الجيش او بالاتحاق بعمل, ده غير ان كل واحد بيعمل الى يريحه و ماياخدش بأراء الكبار بل بالعكس بيعند لما حد ينصحه علشان هو شايف ان كل الناس غلط و هو بس الى صح
6-مفيش حاجه اسمها (خايف تضيع من ايدي) لان انته اصلا لا تملكها, و ده برضه من اكبر الغلطات الى بيقعوا فيها المتزوجون انهم اول ما يتجوزوا بيتصرفوا على اساس ان الموضوع خلص على كده و انهم وصلوا لهدفهم و ياخدوا الموضوع for granted ده غلط. الجواز بداية المشوار السليم ل تكوين اسره و بيحتاج مجهود و شغل علشان ينجح
7-الخطبه القصيره مضره و الطويله برضه لها اضرار, و اوعى تفتكر ان كل ما الخطبه تطول ه تعرف شريك حياتك احسن, ده وهم(سمعت عن المثل بتاع تعرف فلان؟)
انت علشان تعرف الى قدامك على حقيقته لازم تحطه فى مواقف معينه و كتير و تشوف ردود افعاله و تصرفاته و قيس شخصيته على كده لان الطبع يغلب التطبع
8-زى ما الأخوه (مش اتحاد اشتراكى ولا حاجه) قالوا ان الزواج ده مش ارتباط بين شخصين لأ ده ارتباط بين عائلتين, و لما تيجي تختار اختار من بيت طيب و شوف الاب و الام بيعاملوا بعض و بيتعاملوا مع المواقف ازاى (الكلام لكلا الطرفين)
و متاخدش بالمظاهر (never judge a book by the cover).
9-انا شايف انه انت عندك فراغ عاطفى و عدم نضج نفسى و بتحاول تملاه بادخال زميلتك فى الكليه فى حياتك, اصبر شويه وزود خبرتك فى الحياه, و لازم تكون قوى و سيد قرارك و عقلك يعرف يسيطر و يوجه عواطفك فى الاتجاه السليم مش العكس و حياتك متقفش على حد
10-املأ الفراغ الى فى حياتك بالرياضه او بهوايه جميله او استفيد بوقتك فى تعلم حاجه مفيده و لازم يكون عندك اهداف في الحياه تعمل على تحقيقها واحد ورا واحد(كمل دراستك الاول), و يكون عندك يقين ان مصر فيها ناس محترمه و متدينين كثير و لوعزمت على جواز و صدقت النيه ربنا هيوفقك
11- و ده المهم عندى, ياريت الى يحدف طوب ينشن كويس و مالهوش دعوه بازاز العربيه علشان مش موجود