الموضوع: مشكلة في فتيس التوليدو ٢٠١٤ اوتوماتيك

السلام عليكم ورحمة الله وبركاته
علي فكرة يا جماعة انا لسة مكلم التوكيل من شوية علشان الاستلام واخد رقم الشاسيه علشان التامين وبالمرة سألته علي عربية الاستاذ كريم وهو اللي افادني بالاسم وحبيت اعرف المشكلة بالظبط منه فا افدني بنفس العيب اللي ذكره الاستاذ كريم وقاللي ان المشكلة اتحلت الحمد لله ودي مابتحصلش الا مرة في الالف . فانا رأيي ان لو المشكلة اتحلت علي خير ان شاء خليك مع هذه العربية وانا شايف انها مقارنة بعربيات اخري فيها نفس الكماليات اللي موجودة فيها وبالسعر ده فهي ممتازة بجد . والحمد لله انها جت علي اد كده وبالبلدي كده يمكن دي عين وجت في المشكلة دي وقول الحمد لله . وربنا يسترها معانا جميعا" ان شاء الله

المشاركة الأصلية كتبت بواسطة kgayyar

لو بتتكلم عني فانا اسمي خالد .. و لو في حد تاني اسمه كريم عنده نفس المشكلة يبقى الموضوع مختلف .. يا ريت تعرفنا تقصد مين بالزبط .. و انت كلمت فرع ايه و مين في الفرع

انا كلمت فرع العبور وكلمت واحد اسمه فريد في المبيعات وهو اللي اتأكد من الموضوع واتصل بيا للاطمئنان .

الحمد لله استلمت العربية النهاردة و هي قيد التجربة .. ربنا يسهل و الامور و المشكلة تكون اتحلت و ما تتكررش بس دا مش معناه ان موضوع التأخير و عدم توفير سيارة بديلة هيعدي .. و ان شاء الله اعرفكم الاخبار بعد تجربة يومين تلاتة

عملت ايه فى مشكله الفتيس طمنى لان انا معايا توليدو والحمدلله مفيهاش حاجه لحد الوقت وان شاء الله تكون بسيطه والف مبروك عليك

المشاركة الأصلية كتبت بواسطة EngAhmedSayed

سيدى العزيز
الف مبروك على عربيتك الجديدة و ان شاء الله ربنا يكفيك شرها
بخصوص الفتيس الخاص بحضرتك و هو فتيس الاتوماتيك التيبترونيك
و بخصوص البادى فالف
نمسك الموضوع نقطة نقطة
ماهى اعراض البادى فالف نتشة فى الغيارات و تحسها عند نقل من ترس ترس و فى الغالب ما بين التانى و الثالث و بتتزايد مع فترة تزايد المدة
رزعة و هبدة جامدة فى الفتيس و انتا ماشى على 100 كيلو او 120 فما فوق لو سيادتك ما شى على السرعة دى ورفعة رجلك من على دواسة البنزين مرة واحده و حصلت رزعه او هبدة يبقى دة بادى فالف
زى ما حضرتك اشارة فى ردودك و اختبارك فى العربية و اكيد كنت على سرعة 100 كيلو فما فوووق صح

اسباب تلف البادى فالف
و هو عدم اجراء الصيانة فى المواعيد المحددة و هى كل 60000 كيلو و للامان انا بنصح يتم عمل صيانة الفتيس 55000 كيلو
لابد من تغيير الزيت الموصى بيه من قبل الشركة المصنعة (هام جدا)
لابد عند اجراء عمل الصيانة لابد من دورة غسيل لوحدة الميكاترونيك و هى المسؤلة عن تدفق الزيت عن طريق المجارى الموجودة بالوحدة

نرجع بقى للموضوع حضرتك
و تعتبر حالة شاذة انى العربية معمليتش 2000 كيلوووووووووو يعنى و له غيرة زيت وله اتعملو صيانة
يبقى سيادتك من فترة لتانى سيادتك تيبقى قافل الزجاج و يفضل مساء فى الهدوء كدة و مثل على الدائرى ابقى شد بالعربية شدايا كدة و جرب و شوف
سيادتك لازم تثبت العطل و اصلاحه فى تقرير الصيانة و يكون معاك نسخة معتمدة من الوكيل و تحافظ عليها
هل تم اخذ ضمان فردى على الفتيس لانى خلى بالك مش حلو انى الفتيس يتحل على 2000 كيلو
فكان لابد من اخذ ضمان فردى للفتيس يا فترة زمنية يا عداد كيلو متر خارج ضمان العربية و تكون كافية
سؤال هل تم تغيير الزيت و له تم اضافة نفس الزيت القديم و يجب اثباته فى التقرير

انا قريت موضوع حضرتك بالتفصيل بما فيها ردود السادة الاعضاء

فأنا حبيت ارد على حضرتك فى قسم سيات علشان يكون مرجع للا عضاء
و اهلا بيك فى قسم سكودا

و شكرا خاص
لحبيبى
محمد سيد

تحياتى بالتوفيق
أحمد سيد
منسق قسم سكودا

أولا شكرا جزيلا ليك يا أحمد باشا لردك و اهتمامك
بالنسبة لاستفساراتك:
١- تم اثبات العطل و القطعة التي تم تغييرها (Valve Body) في كتيب الضمان
٢- تم تغيير الزيت بزيت جديد حسب كلام مهندس الاستقبال و لكن غير مثبت في كتيب الضمان
٣- لم يتم أخذ ضمان فردي للفتيس .. هل دا بيحصل في توكيلات أخرى .. و هل ينفع بعد ما استلمت العربية ارجعلهم تاني و اطلب الطلب ده .. و لو تم ده ايه الكيلومتر او المدة المناسبة لضمان الفتيس