السلام عليكم ورحمة الله وبركاته
زملائي واحبائي في منتدى نايل موتورز
اخوكم محتاس حوسه كبيره ومش عارف افكر
وبصراحه تعتب من كتر التفكير في موضوع السواقه والعربيه

ندخل في صلب الموضوع
العبد لله بعرف اسوق بس خفيف جدا وماسوقتش قبل كده في القاهره غير مرات يتعدوا على الصوابع في مركز تدريب قياده وكنت بتعلم تعتبر هاديه نوعا ما وسوقتش بره في شوارع رئيسيه
المهم عاوز اجيب عربيه نظرا لظروف شغلي والبهدله اللي بتبهدله في المواصلات العامه والقرف اللي بشوفه يوميا لما بفكر اكرب ميكروباص ولا زحمة المترو التي اصبحت لاتطااااااق
بس محتار وتعبت من كتر التفكير في نوع العربيه اللي اجيبها
ناس تقولي هات الهيونداي اكسنت 1300 عمليه ومش مكلفه بنزين وناس تقول هات دايو لانوس هربيه كويسه جدا وموفره بردوا
وناس تقول هات عربيه جديده وانت كده كده مش اول مره هاتجيبها تروح تنزل بيها في الزحمه وكده
على اساس ان العربيه المستعمله بتكون فاتحه بوقها بالبلدي كده
واللي هاتدفعه صيانه وتصليح تجيب بيه عربيه جديده وتدفعه قسط وهي هي العمليه
في واحد اقترح عليا اجيب السايبا تيبا عربيه سعرها معقول جدا وحنين ويوم ماتفتح العربيه الجديده بقها زي مابسمع في الشارع مش ااقل من 4 او 5 سنين
وفي نفس الوقت عايز عربيه اجيبها وتعقد معايا فتره كبيره يعني مش ااقل من 3 سنين مثلا لو فكرت اغيرها في حالة المستعمله
لكن لو جديده اعتقد هاتعقد معايا اكتر من كده بكتير باذن الله
فاكنت بفكر لو عربيه مستعمله تكون في هيونداي جيتز او شيفروليه افيو هاتشابك
بصراحه العربيتين دول مجنون بيهم وبعشق حاجه اسمها هاتشابك
بس فيها ناس قالتلي ان عربيات الهاتشباك بتتباع بالعافيه :( صح الكلام ده ولا غلط
بس هل العربيه دي هاتفيدني عائليا خصوصا باني مقبل عالزواج باذن الله كمان كام شهر وبصراحه عاوز اتجوز وتكون معايا العربيه خصوصا اني مخلي فلوس العربيه على جمب
وهل اجيبها اتوماتيك ولا مانيوال خصوصا من كتره شكاوي الناس من زحمة القاهره وتعبهم من المانيوال
ولما اجيبها باذن الله هل يفضل انزل مدرسه تعليم قياده من تاني واتدرب على العربيه اللي هاجيبها باذن الله ولا اتدرب على عربيه مركز التدريب
فاتنصحوني بيه افادكم الله