الموضوع: حذاري من قطع الغيار الإستيراد

المشاركة الأصلية كتبت بواسطة alalfi

حبيت أنقل لكم تجربتي مع قطع الغيار الإستيراد
في البداية إشتريت العربية مستعملة على أساس إنها فابريكة وحسبي الله ونعم الوكيل في اللي باعهالي وفي اللي كشفوا عليها وقالولي إنها فابريكة.
كنت بصين العربية صيانة ال 40000 كم عند فني في التوكيل فاتح ورشة لحسابه .. فأخبرني أن سير المجموعة عايز يتغير بس فيه مشكلة إن كمبروسر التكييف مش بتاع العربية وبالتالي سير المجموعة الاصلي مش هيركب ومرضيش يغير السير بحجة إنه مبيعرفش يعك ويركب حاجة مش بتاعة العربية ولازم أغير الكمبروسر . عشان كده بتحسبن في اللي باعلي العربية واللي كشفوا عليها .

المهم روحت لميكانيكي معرفة غيرلي السير وقاللي طالما الكمبروسر شغال والتكييف كويس متشغلش بالك ومتغيرش حاجة .
من حوالي شهر التكييف حلف يمين ما هو مسقع روحت لفني تكييف وبعد الفحص والمحص الكمبروسر ودع ولازم يتغير .. غيرنا الكمبروسر بواحد أصلي إستيراد مع شرط التجربة طبعاً والرجل بصراحة محترم وقاللي بتاعي ولو بعد سنة .. الحمد لله إشتغل زي الفل لمدة شهر ومع أول مشوار سفر من اسبوع وانا راجع لقيت صوت المحرك علي بشكل مخيف وريحة شياط مفيش ولا لمبة بيان منورة والزيت متغير والمياه والحرارة تمام .. روحت للميكانيكي قاللي بسيطة المشكلة مش في المحرك دي بلية الكمبروسر (الحدافة أو الكلتش) فركت .. روحت للفني اللي جابهولي وركبه قاللي يبدو إننا شدينا السير زيادة عن اللازم فالبلية فركت وجاب واحد غيره وركبه مشتغلش جاب واحد تاني مشتغلش برضو .. خلص اليوم ومشيت ورجعتله إمبارح اليوم بطوله وفي الآخر الكمبروسر إشتغل ونص ساعة فصل تاني .وإتفقنا إني أرجعله يوم الإثنين إما يجيبلي كمبروسر محترم أو آخد فلوسي .. روحت بالعربية وقبل ما أوصل بخمس دقايق عينك ما تشوف إلا النور رجة شديدة في العربية وصوت كأنها ربع نقل موديل 1965. وفصلت مني ييجي 10 مرات خصوصاً عن المطبات أو لما أهدي على الآخر .

طبعاً غير ثمن الكمبروسر أنا صارف لحد دلوقتي 400 شحن فريون و200 جنيه مصنوعية ولسه الله أعلم هصرف كام وربنا يسترها على المحرك وعيب الكمبروسر ميأثرش عليه لحد ما أغيره إن شاء الله .. ده غير العطلة والقرف والتعب البدني والنفسي .

فعلاً الغالي ثمنه فيه .. والجديد لا يعلى عليه .. وتوبة إن لا قدر الله وحصل حاجة في العربية مستقبلاً إني أشتري قطعة غيار مستعملة تاني .. إلا إذا كانت قطعة صماء مفهاش ميكانيكا ويمكن فحصها والتأكد منها بالعين المجردة زي الجنوط والصاج وخلافه .

يا ريت الكل يستفيد من التجربة دي ولما يغير حاجة يوجع نفسه شوية في الفلوس ويجيب جديد لانه لو جاب إستيراد هيصرف قرابة ثمن الجديد ومش هياخد نفس الكفاءة أبداً .
دعواتكم معي ربنا يخلص المشوار ده على خير ... وآسف للإطالة

اخى العزيز السلام عليكم ورحمه الله
ارسلت لك رساله على الخاص بخصوص الميكانيكى وبعد اذنك منتظر الرد

المشاركة الأصلية كتبت بواسطة alalfi

وعليكم السلام ورحمة الله وبركاته
تم الرد على الخاص يا باشا

اشكرك اخى العزيز