الموضوع: تقرير عن صيانة 5000 وتقييم لكرولا 2014 خلال هذه المسافة

الموضوع ده حينقسم لجزئين تقرير عن الصيانة وما تم فيها وتعامل التوكيل ، والتقرير الثاني انطباعي الشخصي عن كرولا 2014 .

صيانة ال 5000

حجزت صيانة ال 5000 عن طريق رقم خدمة العملاء 16550 وتم الحجز في فرع العباسية وتحديد موعد اليوم الساعة 10.15 .. كنت محضر قبليها ورقة كاتب فيها الملاحظات اللي قابلتني وهي كالتالي :
1) حساس حزام الكرسي اللي جنب السائق ساعات بيعلق .. لأنه من المفروض بيحس لو حد قاعد جنبي ويدي زمارة وتنبيه وده في بعض الأوقات مش بيحصل .
2) أحياناً بسمع صوت عند فتح وغلق المرايا الجانبية .. صوت زي ما يكون حشرجة في موتور المرايا .
3) لو مشيت بالعربية فترة طويلة أو في طرق مزدحمة بحس أن درج الكونصول والجزء اللي تحت الفتيس فيه شيء من الدفء (مش لدرجة السخونيه) .. وكنت سألت أكثر من عضو هنا في الموضوع ده والكل قالي أنه بيحصل معاه نفس الشيء بس حبيت أتأكد من التوكيل .
4) طلبت غسل حوض السيارة .. وكان الرد بأن السيارة خارجياً والحوض بيتم غسلهم .. فمكنتش ملاحظة بالنسبة ليهم .
5) صيانة ال 5000 الدورية واجرائتها العادية وتشمل (تغيير زيت + فلتر - تنظيف فلاتر التكييف والهواء - تربيط العفشة - التأكد من الأنوار - التأكد من سوائل السيارة - التأكد من ضغط الإطارات- تنظيف تيل السيارة بالهواء)

تم التوجه لفرع العباسية قبل الميعاد بساعة تقريباً ... ووجدت طابور من السيارات في انتظار الدخول (حوالي 8 سيارات) .. المهم جه دوري ودخلت وتوجهت لمهندس الاستقبال وتم التأكد من الحجز .. وخرج معي لاستلام العربية في تمام الساعة 10.40 وكتب ورقة بالملاحظات اللي قولتها .. وانتظرت في ساحة الانتظار وكنت متابع العربية حيخدوها أمتى .. وتم ذلك الساعة 11 تقريباً .

خرجت من الاستراحة لأني كنت عاوز أشوف العربية حيعملوا فيها أيه .. وتم رفع السيارة على الكوريك وتابعت إجراءات الصيانة .. فقربت من مهندس الصيانة وطلبت منه النظر أسفل السيارة لأني حكيت في كذا مطب وكنت قلقان من الموضوع ده .. ولكن الحمد لله السيارة ولا كأن فيها أي حاجة لأنها مصفحة من أسفل تصفيح جيد جداً .. وأثر الحك كان شبه معدوم أو مش باين وكله جاي في التصفيح .. فطمأن قلبي .

سألت مهندس الصيانة عن التعديل وما يتم فيه .. فأجاب بأنك بتقدم شكوى في الكول سنتر وبيتم تحديد ميعاد لإجراء التعديل اللي بيشمل تغيير 4 مساعدين + 4 سوست + كوبلن شمال (ومحدش يسألني اشمعنى كوبلن واحد لأني مش عارف) وللأسف مخدتش وقت كافي للكلام مع المهندس لانشغاله بالعمل وكويس أنه سمح لي بالدخول للنظر أسفل السيارة في وسط الزحمة دي ومتابعته العمل والعاملين في سيارتين أخريين .

على الساعة 11.45 كانت العربية نازلة من على الكوريك .. وكنت واقف بالصدفة خارج الاستراحة .. فلاقيت المهندس نده ليا وقالي صيانة ال 5000 خلصت خلاص .. وحضرتك كاتب ملاحظات تانية .. ممكن تشرحهالي بشكل عملي .. فقلت ليه على موضوع حساس الحزام ده وأن المشكلة دي حصلت بعد ما عملت فرش للسيارة .. فقالي حيشوفوها جوه ويتأكدوا منها .. وقالي أيه شكوتك من المرايا فقلت ليه على صوت الحشرجة اللي ساعات بيطلع منها أثناء الغلق والفتح .. فجرب معايا وركز في الصوت قوي فيه اللي مظهرش ساعتها فقالي على العموم حضرتك كاتب ملاحظات ولازم يتم استيفائها ولو أني مش شايف فيها صوت أو مشكلة وده الصوت الطبيعي بتاع موتور المراية .. وأنا خلصت مهمتي وحتروح مكان تاني يشوفوا الحزام والمرايا .. وكان قمة في الاحترام والذوق بالرغم من ضغط العمل الرهيب والزحمة .

دخل بالعربية مكان تاني الساعة 12 تقريباً وخرج من غيرها يتابع عمله في صيانة السيارات الأخرى .

العربية اختفت عن نظري ومش شايفها فدخلت قولت اقعد في الاستراحة لحد ما يندهوا عليا .. وكل شوية أطلع ابص على المكان اللي بيغسلوا فيه العربيات ملاقيش عربيتي واقفة .. وناس جاية بعدي تستلم عربياتها المغسوله وتمشي وأنا قاعد

فضلت مستني لغاية الساعة 2 تقريباً (حوالي ساعتين) لحد ما فاض بيا الكيل وابتديت اتنرفز من التأخير وخاصة أني شايف ناس جاية بعدي بساعة ومشيت .. رحت لمهندس الاستقبال وكان باين عليا الغضب الشديد فقالي والله يا فندم الشيت بتاع أمر الشغل بتاع حضرتك لسه مجانيش من الورشة .. وده لأن حضرتك كاتب ملاحظات فبتاخد وقت شوية في أنهم يشوفوها ويجربوها .. فقلت ليه العربية واقفة بقالة تقريباً ربع ساعة في المغسلة ولسه مجاش لغاية دلوقتي أمر الشغل ؟! قالي حقوم أشوفه بنفسي .. ولسه بيقوم لاقيت فني جاي ومعاه أمرين تلاتة من ضمنهم الأمر بتاعي .

شوية اعتذارات وأن التجربة بتاخد وقت ومش عاوزين حضرتك تكون زعلان أو متضايق علشان لو فيه مشكلة تتغير في الضمان وتستفاد بيه وشوية كلام من ده وووو إلخ .

بص في أمر الشغل لاقى أن الحزام بعد الكشف فيه تم التأكد من فيش الحساسات وأن كل شيء طبيعي (جاري التجربة) .. وتاني مشكلة وهي صوت المرايات قالي الفنيين كشفوا على الصوت ده ومش ظاهر معاهم ومش قادرين يحددوا المشكلة بالظبط فين .. وللأسف الدعم الفني اللي بيسبورت الفنيين أجازتهم السبت .. فيا ريت تيجي يوم في وسط الأسبوع علشان يشوفوها ويحددوا إذا كان فيه مشكلة أم لا .. طبعاً الردود معجبتنيش بعد التأخير ده كله وقلت ليه أنا غلطان أني جيبت العباسية ومرحتش التجمع .. قالي والله يا فندم التأخير كان بسبب الكشف على الحاجات اللي أنت طلبتها .. وأنا قولت لحضرتك أن العربية مش حتخلص إلا الساعة 2 ومبعدتش قوي عن الميعاد اللي قولته لحضرتك ودلوقتي الساعة 2.15 .. وأكد عليا أني أجي يوم في وسط الأسبوع من غير حجز علشان يكشفوا على الموضوع ده .. حسيت أنه بعد غضبي ونرفزتي دي نزلت على فاشوش .

المهم تكلفة الصيانة بالكامل 593 جنية ..

نصيحة .. ابعد عن أيام السبت والأحد والخميس في عمل الصيانات لتجنب الزحام لأن الدنيا كانت مولد النهاردة وخاصة من السيارات التابعة للشركات من ميكروباصات وعربيات نقل .

انطباعي الشحصي عن العربية

كنت مأجل الكلام عن أداء العربية طول الفترة الماضية لأعطاء الفرصة لنفسي لتقييم السيارة بشكل كامل متكامل في النقاط التالية (رأي شخصي يحتمل الصواب أو الخطأ) :
1) الشكل الخارجي ودي أذواق في المقام الأول عاجبني من الأمام ولكن تحس أن اللي صمم المقدمة شخص غير اللي صمم المؤخرة اللي مش عجباني وخاصة الرفرفين اللي ورا .
2) العربية عائلية من الطراز الأول من حيث وسع الصالون أو وسع الشنطة .. ولكن في تقديري الشخصي ليست سيارة مدينة لكبر أبعادها نسبياً بالنسبة لبعض الشوارع الضيقة .
3) لولا أن العربية فيها بارك سينسور خلفي .. كان حيبقى من الصعب التعامل معها نسبياً .. لأن الرؤية الخلفية أثناء الركن صعبة شوية وأبعادها كبيرة نسبياً .
4) التعامل مع السيارة على الطرق السريعة مريح وسلس .. وقاعدة الصالون أديها 8 / 10
5) العزل ممتاز وأديله من 8 : 9 / 10 .
6) استهلاك البنزين داخل المدينة عادي زي أي عربية 1600 تقريباً وإن كان أفضل نسبياً من ماركات تانية (مش حقول زي أيه) .. إنما الاستهلاك على الطرق السريعة عبقري بمعنى الكلمة وخاصة لو استخدمت مثبت السرعة .
7) الكماليات شايفها كويسة وتلبي احتياجات الشخص العادي (تختلف مش شخص للآخر) زي المالتي فنكشن والبلوتوث ومثبت السرعة .
8) تجهيز العربية بال ESP يجعلها متميزة في المواقف الصعبة والحرجة ويضيف الكثير على ثباتها العادي نتيجة اتساع قاعدة العجلات .
9) انخفاض الخلوص الأرضي للسيارة مسبب مشكلة كبيرة مع المطبات وخاصة لو مركب ناس في الكنبة الخلفية .. ولكن تم تلافي المشكلة دي في الدفعات الجديدة وكذلك تعديل الدفعات القديمة .. وسواء اللي استلم العربية معدلة أو عدلها في التوكيل أكد أن الموضوع ده انتهى .
10) ضعف الإضاءة نسبياً وخاصة في الطرق المظلمة تماماً .. ولكن يمكن تركيب لمبات أكثر قوة .
10) بعض الحاجات اللي مضيقاني ولكنها شكلية في المقام الأول .. زي نظام ساعة العربية 24 ساعة وليس 12 ساعة .. مفيش لوك اتوماتيك للسنتر بعد سرعة معينة .. بعض الكماليات يمكن تركيبها في التوكيل زي وحدات الرفع للزجاج والضم للمرايات .
11) فتيس ال CVT أداءه ممتاز وسلس في النقلات ومتحسش بيه زي الفتيس الأوتو العادي .. وتحس أنه بيديلك أقصى عزم وقوة لموتور العربية بدون هدر مع وفر في استهلاك البنزين بجانب تكنولوجيا الموتور نفسها .

الحمد لله راضي عن العربية وأدائها بشكل كبير .. وربنا يديمها علينا نعمة ويحفظها من الزوال .. قولوا أمين ..

اسف على الإطالة وأرجو أني مكنش نسيت حاجة وتحت أمركم في أي استفسار .