الموضوع: تقرير عن صيانة 5000 وتقييم لكرولا 2014 خلال هذه المسافة

المشاركة الأصلية كتبت بواسطة mohamed.hany

الف مبروك يا باسم باشا علي الصيانة بس ابقي طول بالك شوية انت مسلم العربية الساعة ١١ و استلمت بعد ٣ ساعات فيها صيانة كاملة و تشيك علي ٣ مشاكل في يوم زحمة.
الدروس المستفادة من الصيانة دي هي البعد عن أيام السبت والأحد والخميس .. لأن الزحمة كانت جامدة فعلاً وخاصة من الميكروباصات والعربيات النص نقل الخاصة بالشركات .

١. حساس الحزام لو السوكيت راكب كويس ممكن يكون في جزء من السلك متأشر و بيلمس في شاسيه العربية.
والله يا هاني المشكلة دي حتجنني لأنها مش بتظهر دائماً واستبعد أنه تكون حاجة ملمسة أو مقشرة في السلك .. وأدينا حنجرب ونشوف .

٢. صوت المرايا بيبقي متصل و لا متقطع ، و متصل مفيش مشكلة.
برضه مش على طول الصوت بيطلع .. بدليل أني وأنا بجرب مع المهندس مطلعش الصوت وكان ماشي زي الفل .. بس أعتقد محتاج أقارن مع عربيات تانية علشان أشوف إذا كان طبيعي ولا لآه .

٣. الدفء ده واضح عندك شوية لما قارنت بعربيتي بس حاجة غير ملحوظة.
لما سألت عن الموضوع ده اكتر من واحد قالي أه وده طبيعي زي ما قالوا في التوكيل .. وكان موجود في اللانسر السي في تي برضه .. فالموضوع مش قالقني قوي وخاصة أنه مش مزعج أنا بس اللي مركز معاه .


ملحوظة بد مهتعمل التعديل هتحس ان العفشة نشفت شوية خصوصا من الخلف، لان العفشة اتبدلت من سوفت الي هارد.
طب أنت مظبط الكاوتش على كام .. ويا رب نعمله في القريب العاجل .

المشاركة الأصلية كتبت بواسطة hanzala

السلام عليكم
عندي سؤال لوسمحت
لماذا الصيانة بعد 5000 كم مع ان اول صيانة في الكتالوج بعد 10000 كم حتى مع استعمال زيت غير تخليقى (sl ,sm, sn)
مع الشكر

فيه صيانة مبدئية بعد أول ألف كيلو وبتبقى تشك كامل على العربية وتربيط عفشة .. وبعد كدة الصيانة اللي بعدها 5000 ودي بيتم فيها تغيير زيت الفابريكة .

كل موديل عربية بيبقى ليه السيستم بتاعه في الصيانات وتغيير الزيوت .. فيه مثلاً عربيات بتغير زيت الفابريكة بعد أول 1000 كيلو .. وفيه عربيات بيتم تغيير الزيت بعد 10000 كيلو .. وفيه زي الكرولا بعد 5000 كيلو .

المشاركة الأصلية كتبت بواسطة ahmedkishk@

السلام عليكم
موضوع ان صفاره الحزام احيانا بتعلق ظهر معايا برده مع اني مركبتش فرش و ملعبتش في اي حاجه
علشان أكون أكثر دقة .. أنا التعليقة بتظهر عندي لما أكون مش حاطط الحزام سواء أنا أو اللي جنبي .. بمعنى أنه من المفروض صوت التحذير يسكت بعد دقيقتين .. وبالفعل بيسكت .. ولكن بيرجع يشتغل تاني حتى لو ماشي في الطوالي من غير ما أجيب n , r .. ده المقصود بالتعليقة اللي عندي .. لو اللي جنبي حط الحزام وأنا محطتش الحزام الصوت بيسكت ومبيشتغلش تاني .. وده اللي مخليني شاكك أن المشكلة في كرسي الراكب اللي جنبي .


و صوت المريات بتزيق في بعض الاحيان
عندي الشمال بس بتزيق بس مبقتش اركز في الصوت اوي
تمام .. بس محتاجين المقارنة بين أكثر من عربية علشان نعرف إذا كان ده طبيعي ولا لآه .. وده اللي حيحصل إن شاء الله في أقرب مقابلة .


عندي حاجه تانيه و هيه صوت صفير بيظهر لما اهدي عشان العربيه تقف الصوت بيظهر من غير فرامل و انا حاسس انو جاي من الموتور
الصوت مبيظهرش مع تزويد البنزين علي الواقف
اشتكيت في التوكيل مع صيانه الالف بس قالولي ان ده عادي و ده صوت الفتيس ال cvt
حد عندو نفس الصوت
محتاجة برضه تجربة عملية ومقارنتها بعربيات أخرى ... تشرفنا في أقرب مقابلة إن شاء الله ونشوف الموضوع ده مع بعض .

شكرا
نورت الموضوع يا باشا .