الموضوع: شوية المقاطيع إللي عاملين نفسهم ركيـنة عربيات ومستوليين على كل أرصفة مصر

هي إيه بقى ظاهرة الركينة إللي في الشوارع... دول بقوا في كل مكان وكل شبر في أرصفة مصر... مش بس المناطق الحيوية.. دول بقوا عند سوق المقطم... وقدام كل قسم شرطة على الرغم من أن أرصفة الشوارع فاضية... بس هي سآلة أم إللي جابه يجي وانت بتركن وكأنه أجر الرصيف من المحافظة ويقول لك:
كمااان... كماااان.. حضن شوية... بس كده ياباشا ارفع فراملك وسك عربيتك ومتخفش عليها...
ولما تيجي تقولوا طيب ما أنا مش خايف عادي.. وكمان بأعرف أسوق وأحضن وأظبط العربية... عايز انت بقى إيه؟؟؟
يقول لك: ياباشا إحنا واقفين هنا بنسترزق.. وبنحرص لك عربيتك بدل ما تتخبط كده ولا كده...
بصراحة الموضوع زاد عن حده أوي.... حتى شوارع بلدنا مش قادرين نستمتع ولا نمشي ولا نركن فيها جنب الرصيف.... أنا مش عارف شوية العواطلية والبلطجية دول بيدفعوا للقسم علشان يخليهم واقفين يأخذوا إتاوة من الناس...
وبعدين هو كل واحد معاه عربية يبقى مبسوط وحاله ميسور.... علشان يدفع في كل مكان يركن فيه جنب محل أو سوبر ماركت يجيب متطلباته يقوم دافع إتاوة يعني ولا إيه.. هو المرتب فيه كام 5 جنيه ولا 10 جنيه؟؟؟
بصراحة الموضوع زاد عن حده أوي... مش عارف ليه الشرطة إللي المفروض تحمينا مسيباهم علينا بالكثرة دي ليه....
حسبنا الله ونعم الوكيل في أجهزة الدولة الفاسدة إللي مش شايفة غير حاجة واحدة بقائها في السلطة فقط لا غير

المشاركة الأصلية كتبت بواسطة yasser100

ساعة ما يقول لك ما تخفش على عربيتك يبقا كده خاف :)))))) . ما عليش هيه ظاهره زايده شويه بسبب الاحوال الاقتصاديه فى البلد . خدها بصدر رحب شويه هاتستريح . لو فكرت فيها بشكل تانى .اللى واقف ده مش لاقى شغل او عيل صغير و احلامهم بسيطه . انا وقفت و اتكلمت مع عيل منهم و كان كل حلمه يشترى عجله . لو طلعت جنيه او اتنين مش هايأثروا و لما الدنيا و البلد ها تتحرك ها تختفى ظواهر كتير و بدل ما يسرقوا او ينشلوا . الشرطه مش ها تعمل حاجه و اقل حاجه هاتقولها لك لو انت و غيرك ما تديش لهم حاجه هايختفوا و هو ما غلطش فى حاجه علشان نمسكهم

استاذي
كلام حضرتك مظبوظ في حالة إن الموضوع مش عافية وبلطجة... لما واحد تيجي تديله 2 جنيه ويزعق معاك ويقول لك: إيه يا عم 2 جنيه إيه دول... الركنة هنا بـ 5 جنيه على الرغم من أنه رصيف عام الدولة عملاه علشان تركن وتمشي عليه بحرية كاملة.. ويقعد يقل أدبه وطبعًا أنت بيبقى معاك أطفال مش عايز تبين أمامهم أن باباهم وصل لمستوى هذا البلطجي واتخانق معاه..

لازم الموضوع يبقى ليه حل من الحكومة... أنا عايز أمشي وأركن عربيتي من غير ما أعطل المرور.. وبرده من غير ما ألاقي أشكال وسخة تتطفل علي في كل شارع وفي كل زقاق وعند كل محل