الموضوع: العربيةجابت وش سلندر والسبب هو......

السلام عليكم ورحمة الله،
انا معايا عربية كورسا 1600 2003 كان فيها رجة ع السلانسية وبتبطل كل شوية وكمان المية كانت بتنقص لفيت كتير وف الآخر وديتها لمركز هيثم اللي ف الحرفيين قللي سيبهالي سبتها عنده اسبوع ...
الراجل جرب كل حاجة لغاية م وصل للمشكلة وهي ان عمود الكرنك فيه تآكل وطبة الكرنك برضه فغيرهم استيراد من عنده وبعدها العربية ظبطت تمام.
بعدها كلمني واحد اسمه محمد بيشتغل عنده وقللي احنا شفنا مشكلة المياة فلقينا في تنفيس من عند الرادياتير فقلتله بس انا كنت ملاحظ ان المياه لما بتنقص بلاقي في تسريب من خرطوم التكييف السخن.. المهم قللي لا التسريب الأساسي من عند الرادياتير فلو تحب ممكن نصلحه بس المشكلة هتظهر تاني قريب او تركب رادياتير جديد تمنه 500 جنيه والمشلة تبقي اتحلت بشكل نهائي..
فكرت شوية وقلتله لا ركب جديد لو علي ضمانتك قللي ماشي.
رحت استلم العربية الرجرجة اللي ع السلانسيه راحت والتكاليف حوالي 700 ج وهي طبة زيت 40، عمود وطبة الكرنك 300 استيراد تغيير زيت 130، طقم بوجيهات 95 ، ومصنعية 200.
تكلفة موضوع الميه 500 رادياتير جديد 80 مصنعية تركيب و45 ج غطا القربة ولغي التكييف السخن.
خدت العربية ومشيت بيها طلعت ع الدائري الدنيا زحمة وماششي ع السلانسيه حواي نص ساعة لقيت العربية سخنت جدا وداخلة علي 100 ركنت وبصيت لقيت القربة فاضية اتجننت كلمت الشيخ هيثم قللي زودها وامشي شوية وشوف بعد ربع ساعة العربية سخنت تاني نزلت برضه ملقيتش مية وعلي هذا الحال خمس مرات كمان ف الآخر الشيخ هيثم قللي لما تروح تاني يوم الصبح فك الخرطوم اللي جنب القربة وصب مية ف القربة بشكل مستمر لغاية م تلاقي المياه نازلة من الخرطوم من غير تقطيع عشان لو في هوا ولا حاجة...
النهاردة الصبح عملت زي م هو قال لقيت الميه بتنقط من تحت وش السلندر بصيت ع الزيت لقيته مطحن. مع العلم ان المياة قبل كدة كانت بتنقص بس مش بتختفي زي م حصل وعمر الزيت م عمل طحينة.
انا دلوقتي ربنا أعلم بيا عشان دفعت كتير امبارح والميزانية متسمحش ب جنيه زيادة ومش عارف اعمل ايه ...لو هاخد العربية بونش مش هياخد اقل من 400 او 500 انا ساكن ف اكتوبر وقلتله انا مش هقدر اجيلك تاني قريب..
دلوقتي انا علي آخري انتوا ايه رأيكم؟؟

المشاركة الأصلية كتبت بواسطة ahmedfouad

خلى بالك ومن غير ما اضايقك ..
حضرتك بتقول ان العربية كانت سخنة جداً
المفروض ما ازودش مياه للدورة وهى سخنة قوى كدة
لازم اسيبها لما تهدى شوية وتكون دايرة

فى مشكلة فى دورة التبريد ودى مسئوليته .. لكن موضوع الجوان اللى ضرب دى مسئوليتك
انا بحاول اقول رأيى بما يرضى الله
تقبل مرورى وربنامعاك

يا اخي لا انا كنت وانا ع الدائري بحطلها ميه بعد م تهدي أكيد والعربية دايرة ودا اللي انا كاتبه بناء علي كلام الميكانيكي ف التليفون.
لو تقصد وقت اكتشاف المشكلة النهاردة فالعربية كانت تلج ومدورتش وحطيت مية برضه زي ما هو قال وزي ما كتبت والعربية مش دايرة.