تقرير مصور عن تركيب طقم نواكل وا سبويلر لسيراتو 2014

**said.d.y** · 10-06-2014 01:55 AM

المشاركة الأصلية كتبت بواسطة mokhtarhany

طيب ممكن حضرتك تشرحلنا طريقة الشراء من الموقع بالتفصل لحد الحاجة ما تيجى مصر

اولاً بتدخل على الموقع وتطلب عمل اكونت وتسجل بياناتك زى الميل والموبيل والعنوان ال هيوصلك ال order علية، وبيجيلك ميل بتاكيد التسجيل وبيكون فية اسم ال مستخدم الخاص بيك وتاكيد للكود السرى الاخترتة.
ثانياً تحدد السلعة وتطلب الشراء، وتدخل رقم الفيزا الخاص بيك، وممكن تفتح حساب وتدفع فية الثمن.
ثالثاً بيجيلك ميل تاكيد على الخصم وميل تاكيد على قبول عملية الشراء وبعد كدة ميل باتمام عملية الشحن.
رابعاً عند وصول الطلب مصر مندوب البريد (قسم الطرود) بيكلمك على رقم الموبيل المكتوب على الطلب او بيبعتلك اخطار وبيحدد فية الرسوم المطلوب دفعها وبتستلم الطلب اما على عنوانك او عند مكتب البريد التابع لمنطقة سكنك، علماً بان من ضمن البيانات البتسجلها بيكون الرقم البريدى لمنطقتك.
اى خدمة،،،،،،،

**ashouhdy** · 10-06-2014 02:22 AM

العربية دي لازم تتفيم

والف مبروك جميلة ماشاء الله

**Hosam_Optrawy** · 11-06-2014 12:31 AM

الف مبروك

**said.d.y** · 11-06-2014 07:34 PM

المشاركة الأصلية كتبت بواسطة bassem.naguib

بسم الله ما شاء الله .. شيك قوي .. ربنا يباركلك فيهم وفي العربية ويكفيك شرها .

بس ممكن توضيح بالصور ازاي وصلت كهربا لليد الأسبويلر .. يعني السلك مشي ازاي علشان يدخل الشنطة .. واتوصل ازاي على فانوس الأستوب من غير ما تلعب في الضفيرة أو تقشرها .

السلام عليكم ورحمة الله وبركاتة،
اولاٍ انا اسف لانى موش هقدر اشرح بالصور على العربية بتاعتى لانى ركبتة خلاص ، لاكن هاشرح لحضرتك على صور حملتها من الموقع.

الصورة الاولى بتوضح المرفقات البتكون مع القطعة ، وهى عبارة عن 3 مسامير لو حابب تثبت الاسبولير بالمسامير ودى موضوع انا استبعتة تماماً ،علاوة على شريط3m ، وكمان بيكون معاها منديل مبلل مادة فيها اسبيرتو علشان التنظيف قبل التركيب، علاوة على شرح بالصور لكيفة عملية التركيب.
الصورة الثانية بتوضح انك بعد تركيب الاسبويلر بتفك الفانوس الخلفى الشمال (الجزء الراكب فى غطاء الشنطة) ودى من خلال فك 3 مسامير بتريحهم بمفتاح فى عدة العربية، وبتكمل فك بايدك.
ثم بتفك الفيشة.
الصورة الثالثة بتوضح ازاى بتعدى سلك الليد بتاع الاسبويلر من مكان الفانوس المفكوك، وتثبتة فى جسم الشنطة بشريط لحام، وتعدية من الفتحة الموجودة بغطاء الشنطة زى الفى الصور.
الصورة الرابعة وفيها بتعمل قص فى سلك الضفيرة وتوصل فية سلك الاسبويلر.
لاكن انا معملتش كدة، انا دخلت سلك الاسبويلر فى فتحات الفيشة بتاعة الضفيرة نفسها ( الجزء الدكر)وبعد كدة ركبت الفيشة بتاعة الفانوس (الجزء النتاية) بالضغط عادى.
ارجو اكون عرفت افيد حضرتك، ولة اى استفسار انا تحت امرك.

**said.d.y** · 11-06-2014 08:10 PM

المشاركة الأصلية كتبت بواسطة regata86

ماشاء الله جميل ربنا يكرمك بالعربيه بس ليه النيكل الخاص بفريم العربيه مش كامل من فوق انا شوفته علي عربيه زيرو نازل كامل بس كانت خليجى

اولاً ربنا يكرمك ياباشا
ثانياً موجود طقم بيكمل الفريم بتاع العربية، لاكن انا اكتفيت بالطقم الركبتة على اساس انة الاوريجينال البينزل مع العربية (زى ما شفت) وكمان محبتش يكون النيكل اوفر.
لو حضرتك هتلاحظ الكورولا الجديدة والبيجو هتلاقى ان نيكل الفريم موش كامل.
لاكن ممكن افكر فى المستقبل

**said.d.y** · 11-06-2014 09:11 PM

المشاركة الأصلية كتبت بواسطة ahmed.antar

الف مبروك واضح جدا فرق الخامات بس السعر عالي جدا .. ونصيحه ابعد عن التفييم ﻻن غرامه الفيميه بقت 500 جنيه ... ربنا يسترها

الف شكر وربنا يبارك فى حضرتك، بالنسبة لموضوع ان السعر عالى ، فدى بيرجع زى ما سبق وذكرت فى الموضوع علشان سعر الدولار وبلد المنشا كوريا والشراء لقطعة واحدة، وكمان احنا اتعودنا على سعر المنتج الصينى البيكون اقل جودة واقل سعر، علشان كدة لما بنسمع سعر لمنتج اوربى او كورى او يابانى بنحس ان السعر عالى.
واشكرك على نصيحة التفييم ودى كان فكرى من الاول وعلشان كدة انا مفيم الزجاج الخلفى فقط وافتح درجة فى الفيمية.

**said.d.y** · 11-06-2014 09:15 PM

المشاركة الأصلية كتبت بواسطة mastr_n

بسم الله ماشاء الله
حلال فيها وربنا يباركلك فيها بس لازم فامية لايت

انا مفيم الزجاج الخلفى فقط ياباشا ، ومحبتش افيم كل العربية علشان المخالفة
سؤال ياباشا ، قصدك اية بالفيمية لايت؟
الفيمية المركبة فى الزجاج الخلفى كان افتح درجة موجودة فى المحل، معرفش هو دى الحضرتك بتقصدة ولا لا.