الموضوع: شارك 2014 وﻻ سيراتو 2014 ثاني فئة؟

راي الشخصي السيراتو ودي طبعاً بتختلف من شخص للتاني والقرار قرارك
انا كنت في نفس حيرتك دي وكنت محتار بين الشارك والريو والاتنين كانو تقريباً بنفس السعر وفي الاخر اختارت الريو فما بالك بقى لو كانت المقارنه مع سيراتو (السيراتو تكسب)
طبعاً في الاول كنت متحمس جداً للشارك وياباني 100% والكلام ده بس لقيت الاتي
1- الاوبشنز اقل يعني الريو كانت فيها جنوط اسبور درج تلاجه كاسيت usb وبلوتوث ودرج بمسند جانب السائق وايموبليزر وفوج لايت الكلام ده كله مكانش موجود في الشارك
2- وكيل متسوبيشي في مصر مش قد كده وانتشار قطع الغيار وتوفرها مش زي الكيا خالص
3- اعاده بيع الكيا افضل
4- ودي كانت اهم نقطه اللي حسمت الموضوع بالنسبه ليا هي اسعار قطع غيار رحت سالت عليها في التوكيل لقيتها نار على زيت حار واخر استهبال يعني لازم تبقى عامل حسابك ان تكلفة الصيانه هتزيد على الاقل الضعف بين المتسوبيشي والكيا وسيبك من اي حد يقولك ما الكوري برضوا بقى غالي واسعاره مولعه والكلام ده انزل اسأل بنفسك عن اسعار قطع الغيار هنا وهنا وانت تعرف وهو ده اللي انا عملتوا (بس لما تسأل اسال على حاجات متشابه يعني متسألش على فانوس الشارك العادي وتروح تسأل على فانوس الكيا الليد مثلاً اسال على قطع الغيار بتاعت الكاتيجوري اللي انت بتقارن بينهم في الاتنين)
واللينك ده فيه اسعار قطع غيار الشارك لما سالت عليها من 3 شهور ممكن تبص عليها بصه
http://www.nilemotors.net/Nile/414352-a.html

طيب هل انا لو جبت الشارك هاخد عربيه افضل كتير عشان أعمل كده
انا من وجهة نظري لأ الشارك عربيه زي اي عربيه لها عيوب هي بسيطه بس موجوده زي
- ضيق حجم الشنطه
- صوت الماتور العالي
- والعزل الغير جيد
- الدهان خفيف
والعيوب دي انا عرفتها من ملاك العربيه لما كنت بدور قبل ما اشتري
هي كلها عيوب بسيطه بس في الاخر هي عربيه زي اي عربيه لها عيوبها

طيب هل الكيا اعتماديتها اقل من الشارك بشكل كبير؟؟؟
اعتقد موضوع ان الياباني احسن من الكوري وبيعيش اكتر ده كان زمان في التسعينات وممكن اوائل الالفينات لكن دلوقتي اشك ان بقى فيه الفرق الكبير ده
انا راكب ماتريكس من 2008 لحد النهارده وماشي بيها 205.000 كم لحد دلوقتي وبسم الله ما شاء الله العربيه تمام جداً وبلا مشاكل تقريباً يبقى مينفعش اقول انها مش اعتماديه
وطبعاً حضرتك عارف ان الكيا كوالتي اعلى كمان من الهيونداي يبقى ازاي تكون عربيه مش معمره

وفي النهايه دي كانت وجهة نظري اللي ممكن تتفق او تختلف معاها لكن حبيت اوضحها ممكن تساعدك في التفكير
ومبروك عليك مقدماً سواء الشارك او السيراتو الاتنين عربيتين محترمين جداً واي واحده فيهم ان شاء الله هتكون مبسوط بيها