الموضوع: تويوتا تستدعى اكثر من ٢ مليون سياره لوجود عيوب فى الوسائد الهوائيه

المشاركة الأصلية كتبت بواسطة hany saad

* أسمحولى نحلل مع بعض الظاهرة اللى بتحصل دى و دون التحدث عن ماركة سيارة بعينها و لكن تعالوا نطلع نقط مفيدة من الموضوع:

- أولاً لو قرينا الموضوع ده كويس هنلاقى أنه مش أستدعاء جديد و لكنه إستكمالاً للأستدعاء السابق بتاع السنة اللى فاتت و هو فعلاً لسيارات موديل قديم

- اللى حصل أن تويوتا بعتت أستدعت عربيات كتير عن مشكلة الأيرباج اللى كانت جايباه من شركة تكاتا اليابانية زيها زى شركات كبيرة أخرى حسب سيريال جايلهم من شركة الأيرباج (الجزء البايظ هو المادة الكيميائية اللى بتنفخ الأيرباج ساعت الفتح و اللى حصل أنه حرق كرسى سواق)

- فيه ناس كتيرة راحت و غيرت الأيرباج و فيه ناس لأ....المهم القصة هديت و بعد شوية حادثة جديدة حصلت و كرسى سواق ولع لما الأيرباج فتح فى حادثة.....

- على فكرة المادة الكيميائية دى مصنعة فى مصنع فى المكسيك لصالح شركة تاكاتا اليابانية....و طبعاً المكسيك دول نامية و شكلهم أشتغلوا تويوتا و أدولهم سيريال نامبر غلط أو مش كامل و طلع أن العربية الجديدة اللى كرسى السواق أتحرق فيها خارج نطاق هذا السيريال

- لما تويوتا أكتشفت أشتغالة شركة الأيرباج (و على فكرة ده تانى أكبر مصنع أيرباج فى العالم) و زنقتهم أقروا أنهم مش عارفين بالظبط يحصروا المشكلة فى أنه لوط و معندهمش مستندات دقيقة من قسم الجودة لحصر المشكلة (مش عارف الكلام ده سمعته فى أنه بلد قبل كده لما كارثة بتحصل :):).....

- لذا قررت تويوتا تزود نطاق الأستدعاء ليشمل كل العربيات اللى اتركب فيها الأيرباج ده فى سنين تصنيع معينة علشان يقدروا يسيطروا على الوضع لأنه فيه حريق و مساءلة و ناس بتموت

- طبعاً نيسان و بى أم و هوندا هما كمان كانوا واخدين من نفس الشركة فى نفس السنة....صحيح محصلش حاجة عندهم حتى الأن و لكنهم بيراقبوا الموضوع عن كثب

* الخلاصة:
- أغلب شركات السيارات بتعتمد نفس الموردين لسياراتها، فبلاش نثق بزيادة فى ماركة معينة لأن فى الأخر المكونات غالبياتها من نفس المصدر....يعنى كله مش فارق أركب و أستمتع
كاوتش, مساعدين، يايات، أيرباجز، مكونات ألكترونية، سيور، بوجيهات، عامود دركسيون،......كله فى الأخر من مصنع أو أتنين على مستوى العالم
نظام فرامل و ثبات الكترونى من بوش
نظام إضاءة من بوش
حساسات من بوش
ضفاير كهربا و مكونات كهربا من فاليو
و هكذا....

- مشكلة الأيرباج لا تعيب تويوتا فى أى شىء

- كل شركات السيارات أصبحوا مجمعين و ليسوا مصنعين
- كلما زادت المكونات الألكترونية و الكماليات الحديثة كلما زادت الأعطال
- كلما كانت العربية تعتمد على حساسات و كارتات لتحليل المعلومات كلما أصبحت أكثر حساسية للأعطال
- كلما أرتبطت مكونات العربية مع بعضها بكارتات كنترول و حساسات لتحليل البيانات و قراءة عمل كل منظومة و مدى توافها مع باقى المنظومات كلما زادت الأعطال
يعنى حساس الأوكسجين اللى بقى يقرا نسبة حرق العادم و يبلغ بيه الكنترول يونيت أصبح بيدى أيرور لو فيه مشكلة...زمان كان العادم جزء منفصل مش حاسس باقى العربية بتعمل أيه و لا الحرق طالع إزاى
طبعاً الناتج بقى أفضل و أكثر إقتصادية و لكن المشاكل و الأعطال زادت
بالمثل حساس الكامة و خلافه....

- ماركة العربية تفرق معايا فى الأختبار النهائى للمنتج و مدى توافق كل مكوناته مع بعض ثم ال support و الضمان بعد البيع زى تويوتا و رينو و الكثير من الماركات الى بتحترم نفسها و مستهلكها علشان تكمل

هذه قناعتى الشخصية و دمتم فى أمان الله

تحياتى

+١١١١١١١
كلام مظبوط ١٠٠٪ وانا اعرف واحد معانا حصل معاه الحكاية دي بعربية bmw x1 ٢٠١١ والاريباج فتح وفرقع في وشة وعمله حروق درجة تالته لولا ستر ربنا كان اتشوه وبعد تهديد الشركة برفع قضيه لمو الموضوع مع شركة التامين وعملو العربية توتال لوس وادولو عربية جديدة