يا ريت يا جماعة الي يعرف ما يبخلش عليا بالرد
عرض للطباعة
يا ريت يا جماعة الي يعرف ما يبخلش عليا بالرد
اكيد لا طبعااااااااااااا ...
الا في حالة واحدة فقط
انه يشيل العربية على ساطحة
او انه يسرق المفتاح الاصلي
غير كده مسسسسسسسسستحيل
الا لو معاة نسخة مفتاح اصلي
ايوه ممكن
بدليل ان كيا سيراتو والالنترا فيهم ايمبولايزر وبيتسرقوا عادي جدا
ممكن تتسرق عادى جدا .. الايمبولايزر عباره عن وسيله لتعطيل السارق
لو الحرامي في دماغه نوعية معينة من العربيات
بيبقى معاه كنترول للعربية دي و بيشيل فيش كنترول العربية و يوصل الكنترول اللي معاه و تدور العربية عادي
كل حاجة و ليها حل الحرامية برضه عندهم مخ و بيتابعوا الجديد
زي كده الناس اللي بتعمل كراك للويندوز و الاكس بوكس و اللي بيفكوا شفرات القنوات المشفرة كله بيتضرب
مفيش حاجة في المطلق
ازاى يعنى !
الحل انه بيجيب كيجينيريتور ويدخل فيه رقم االشاسيه يطلع شفرة المفتاح ويجيب مفتاح يعمله بالشفرة ويروح زي الباشا
والموضوع ده حصل في كيا تقريبا من سنتين لما كانت العربيات اللى بايموبلايزر بتتسرق عن طريق ان الشفرة اتسربت
انما دلوقتى مفيش
ولا قصدك وسيلة لتعطيله يعنى هيسرقها بطرق تانية زي القطر مثلا او الرفع على ونش؟
عربيات غبور بس أللي ينطبق عليها الكلام ده لأن أنا معايا ألنترا 2011 خليجي و فيها أموبيلايزر
العربية اللي فيها أموبيلايزر لا يمكن الموتور يشتغل ألا لو الحرامي معاه نسخة من المفتاح الأصلي أو أستطاع أستنساخ مفتاح (عن طريق ال VIN المكتوب علي الزجاج الأمامي و أرساله لموقع في سوريا و سداد مبلغ 350 جنيه قيمة الشفرة) و بعد كده يقدر يصنع مفتاح جديد
و فيه كمان طريقة تغيير الكمبيوتر كله أللي في الكابوت و يكون معاه مفتاح شفرته هي نفسها أللي متبرمجة علي الكمبيوتر أللي بيركبه بدل الأصلي
من الأخر الحرامي المحترف لن يقف أمامه أي شيئ حتي لو أضطر لشيل العربية علي ونش
كل أللي نقدر نعمله هو الأتي:
دائما العربية تبات في جراج و لا تتركها أبدا في الشارع لأن الحرامي بيعدي يأخد رقم ال VIN في يوم و بعدها بكام يوم يأخد السيارة كلها
و برضه لازم تغطي رقم ال VIN بورقة من خلف الزجاج الأمامي
لو تركت العربية في الشارع شوف السايس شكله أيه و أتأكد أنه معروف في المنطقة
تركيب سويتش فصل للموتور برضه حايعطل الحرامي كتير
لو جهاز GPS Tracker أكيد حايفيد
أما الحرامي الغشيم فده للأسف الضرر منه أكتر لأنه بيدمر الدنيا و في الأخر علشان كلام فارغ يعني حتي الكاسيت لو عرف يفكه يبقي كويس
الخلاصة أن أي عربية بتتسرق مهما كانت بس الطلب عالي شوية علي الكيا و الألنترا و اللأنسر و تقريبا مافيش طلب خالص علي قطع غيار مستعملة لمرسيدس حديث مثلا أو بي أم
الأموبيلايزر أحد وسائل مكافحة السرقة و بتجيب نتيجة مع الحرامي المبتدئ فقط
متابع
الحرامي المحترف عادة بيقطع العربية و تتباع قطع غيار و أجزائها تتوه في وسط قطع غيار السيارات الأستيراد
و طبعا ده بيحصل بسهولة جدا في السيراتو و الألنترا و مع حجم الطلب الرهيب علي قطع غيارهم و صعوبة ملاحقة مصدر قطع الغيار (أللي مصدرها عربيات مسروقة طبعا)
في العربيات التويوتا و الألماني بتكون نفس نظرية تغيير الكنترول يونيت بس مع الفارق الرهيب في أن لو ظهرت قطعة غيار واحدة لموديلات حديثة فالشرطة تستطيع ببساطة جدا ملاحقة هذا المصدر (و كمان كتير من هذه القطع عليه تكويد يعني تقدر تعرف أصل العربية المتاخد منها القطع) و ده بالأضافة ألي أن قليل جدا من راكبي هذه السيارات عايز يشتري قطع غيار مستعملة
يعني مافيش طلب و كمان مخاطرة كبيرة للحرامي يبقي حايسرقها ليه؟
هي كلها عرض و طلب و مش فرق تكنولوجيا لأن الأيموبيلايزر هو هو واحد و نفس الفكرة
مفيش اي نظام حماية ملوش ثغرات بس الفكرة ان ال immobilizer هيصعب عملية السرقة جدا وهيقصرها علي العصابات المتخصصة فقط و مش اي حرامي معدي في الشارع كده هيقوم كاسر زجاج العربية و سارقها عشان الكلام ميكونش نظري اوضح اكتر :
http://jdmspares.pairserver.com/CARS...r/P1300855.JPG
اولا هو ايه ال immobilizer و ايه مكوناته ؟
ببساطة و بدون دخول في تفاصيل فنية الايموبلايزر بيتكون من Control unit و sensor و Original key بتاع العربية
الفكرة: لما تحط المفتاح في الكونتاكت تيجي تدور ال ECU بتاع العربية مش هيسمح بحقن البنزين (يعني العربية مش هتدور) الا لما يجيله Signal بقيمة معينة من ال sensor اللي بيكون راكب قريب من الكونتاكت عشان يحس ان المفتاح الاصلي بتاع العربية موجود ... طيب لحد دلوقتي نظريا العربية مستحييييل تدور من غير مفتاحها الاصلي .. مظبوط بس ده نظريا انما في مشكلة ايه هي ؟ دلوقتي تخيل معايا لو المفتاح الاصلي ضاع ايه اللي هيتم ؟ سهلة هجيب ال Spare وهدورها و اروح اعمل عليه مفتاح في التوكيل ... كوييس طب لو ال immobilizer unit نفسها هي اللي باظت ايه الحل ؟ بسيطة برضوا هروح التوكيل اشتري ايموبلايزر unit جديدة و اخليهم يبرمجوا مفتاح جديد و ندورها بس يا سيدي اديك قلت بنفسك المشكلة ... المشكلة انك لو شيلت الايموبلايزر unit وركبت واحدة جديدة متبرمجة علي مفتاح معين ووصلتها و دورت العربية هتدور يعني لو الحرامي جابها بمفتاحها كده وفك القديمة ووصل الجديدة يحط مفتاحة في الكونتاكت الايموبلايزر(بتاعه) زي الشاطر يقري مفتاحه و يconfirm ان ده المفتاح الاصلي ويبعت ال signal لل ECU والعربية هتدور عادي جدا ! ... طب ليه انا قولت انه هيقصر السرقة علي العصابات و هيصعبها جدا ؟ لان اولا ال immobilizer بتاع ال BMW 3 series مثلا ممكن يكون غير ال 5 series غير بتاع الالنترا غير بتاع الكروز غير بتاع الفلوينس بمعني اصح الحرامي عشان يسرق مثلا سيراتو هيشتري ال immobilizer unit الخاص بيها ويبرمج عليه مفتاح و يروح يسرقها .. تاني مشكلة ؟ اليموبلايزر بيكون متخبي عادة في مكان سخيف و مش سهل الوصول اليه و عند الحرامي عامل الوقت شيئ مهم جدا ده غير ان العربيات اللي فيها انذار اول ما تفك فيشة الايموبلايزر الانذار هيشتغل و تفضح الدنيا و لو عمل فيها ذكي وفك فيشة البطارية و ووصل بعدها رجع فيشة البطارية اول مايجي يركب فيشة البطارية العربية هتشغل الانذار برضه و هتفضح الدنيا لو بقي تغلب علي كللل ده هيوصل الunit اللي معاه و يدور :D :D ببساطة شديدة في الظروف العادية شبه مستحيل ان العربية اللي فيها ايموبلايزر تتسرق بس يظل فيه ثغرات للنظام يمكن استغلالها بس صعبة و محتاجة العربية تكون مركونة في منظقة مقطوعة عشان ياخد راحته :D ربنا يحمي عربياتنا و يستر طريقنا ..
في السيراتو و الألنترا بيكون الحرامي معاه كنترول يونيت شغال من غير أيموبيلايزر أساسا و بيفتح الكابوت و يشيل القديم و يركب أللي معاه و ده بيتم بسرعة جدا لأن الكنترول يونيت علي الوش جانب البطارية علي طول و بعدها يدخل العربية يكسر فبرة الدركسيون و بأستعمال مفك صلب يكسر قلب الكونتاكت و يلفه تلاقي العربية دارت و بالسلامة طار بالعربية.
ربنا يسترها علينا و عليكم
الموضوع سهل جدا بدليل سياره صديق لي
النترا 2013 كان في دريم بارك وركن العربيه في الباركنج وسابها لمده 10 دقايق بس لانه افتكر انه نسي السجاير ورجع للعربيه ولم يجدها معني كده انها اتسرقت في اقل من 10 دقايق
ويدل ان اللص كان شايفه وهوا بيركنها
الحمد لله الشرطه رجعتها بعد حوالي 3 شهور وكانت الفبره اللي تحت الدكسيون مخلوعه وفي اسلاك طالعه الباشا الحرامي بيوصل اسلاك معينه بتلغي الانذار والامبوليزر ازاي معرفش وودينا العربيه للتوكيل وظبطها وعلي فكره العربيه اتمسكت في كمين يعني كانت ماشيه موش مركونه
معلش توضيح بسيط
حني لو غير الكونترول لازم يكون معاة المفتاح الاصلي بالكود الاصلي
مينفعش يتغير من غير ما ياخد الاوك من الاصلي
حتي التوكيل عشان يطلع تكويد لمفتاح جديد لازم يبعت للشركة الام وهي اللي بتديلوة الكود.
الكلام دة ثقة.
ومؤكد
حاجة تانية مفيش اسلاك تلغي عمل الايموبيلايزر
وعشان يغير ايموبيلايزر العربية محتاج 3 حاجات
المفتاح الاصلي
الكود الاصلي
كونترول يونيت جديد متكود بالشفرة الجديدة
طيب يا جماعة ايه الحل عشان نحمي العربية من السرقة ﻻن خايف جدا بصراحة ولسة مسروق مني عربية و معرفتش ارجعها
متديش المفتاح الاصلي ابدا لاي حد
و احتياطي غطي رقم ال vin
ومتقلقش ان شاء الله
انا ليا زميل ليا مهندس خبره جداااااااا شغال فى مرسيدس ومعاه شهادات من البرازيل والمانيا فى مرسيدس
المهم قعدت معاه مره بنتكلم فى الايموبلايزر وطريقه عمله
الخلاصه
بالنسبه للعربيات العاديه بتاعتنا التيوتا او البيجو او اللى مثلهم علشان تتخطى الايموبلايزر انت محتاج الاتى
حضرتك حتجيب كنترول يونت مع الفحمه بتاعتها ( الجزء اللى راكب فى الكونتكت ) مع المفتاح المشفر بتاع الكنترول ده
وتركبهم التلاته مع بعض واحتمال برضه ان الموتور ميدورش برضه وارد لاختلاف بعض موديلات الكنترول
العربيات اللى زى مرسيدى او بى ام دبليو
العربيات دى مبيكونش فيها كنترول يونت واحد بس
على سبيل المثال لا الحصر مرسيدس فيها ما يقارب 14 كنترول يونت وعلشان تدور كلهم لازم يأكدوا ان المفتاح ده بتاع العربيه دى وحتى لو غيرت كنترول يونت بتانيه من الوكيل نفسه لسبب مثلا ان الكنترول باظت لازم الكنترول الجديد يتعرف على الكنترولات التانيه
حاجه كده لان كل واحد ليه mac address لوحده وبيتم ده عن طريق جهاز الكمبيوتر
الخلاصه لو عربيتك مرسيدس او بى ام دبيلو او ما شابه حطها فى نص الطريق واجعص اجعص اجعص حرامى مش حيقدر يمشيها الا بمفتاحها او يحملها على ونش
حتى الجر مش حتتجر معاه
لو عربيتك زى الفئه العاديه الموضوع شبه مستحيل ا للحرامى العادى ويكون صعب جدا لو حرامى مثقف
الله ينور هو ده الكلام
اشكركم جميعا على الردود وانا استنتجت من كﻻم حضراتكم ان الموضوع مش سهل والحمد لله
فعلا صعب جدا تتسرق عربيه فيها ايموبليزر وكمان العربيات الالمانى أصعب حاجه تتسرق يعني في الفولكس فاجن ومشتاقتها تزود عليهم أن الباب بتاع العربيه بيعمل لوك ولو اتخن حرامي اتنطط قدام العربيه مش هتفتح اصلا الأبواب ده غير صعب أن حرامي يمشي بمفتاح خريطه زي مفاتيح الألماني
أقولك حل بس متتريقش عليا .... هات عربية ميكونش عليها الطلب فالسرقة وفى نفس الوقت يكون فيها نظام حماية عالى يعنى لو أوروبى يبقى أحسن ... الفلوانس بركنها وأنا مطمن انها مش مطلوبة فالسرقة والكاسيت مش بيتخلع وكمان بيقولوا -والله أعلم- ان فك شفرة السمارت كارد بتاعها محتاج محاولة 3 أيام ... بس انت خليت عندى فضول أسأل فالتوكيل مكان الكنترول فين وبيتفك ازاى
الخلاصة أن موضوع مش سهل سرقة العربية المزودة بأموبيلايزر
لكن أللي عمل كل البلبلة دي أن شفرة الكيا و الهيونداي كانت متاحة علي النت مقابل مبلغ 350 جنيه لكل مفتاح و علي فكرة ده شامل ملف لماكينة قطع المفاتيح حاجة كده زي ماكينات الكام cam يعني ببساطة جدا لو تعرف رقم ال vin حضرتك ترسله لهذا الموقع مع تحويل 350 جنيه يقوم يرسل ليك ملفين أحدهما عبارة عن الشفرة أللي بتتبرمج علي الشيب بتاعه المفتاح و الملف التاني بتدخله علي ماكينة المفاتيح لقص المفتاح
و ده أللي كان بيحصل أن الحرامي لازم يكون عارف المكان أللي بتبات فيه السيارة علشان يجي في يوم يأخد ال vin من علي الزجاج الأمامي و بعدها يجيب الشفرة و يصنع مفتاح و بعدها يرجع يسرقها
الأن علي ما أعتقد أن الموقع ده أتقفل خلاص و كان يقال أنه في سوريا و الحرامية بطلوا خلاص الطريقة دي و أخترعوا طريقة تغيير الكنترول يونيت و تشغيل العربية بمفتاح متبرمج علي الكنترول أللي حايركبه و يكسر الكونتاكت و يدور من السلوك
موضوع الفحمة أو قاريء شيب المفتاح ده مجرد حاجة لقراءة الكود و أرساله للكنترول يونيت طبعا الكلام ده مش في كل العربيات لأن مثلا البي أم مختلفة عن كده لأن الفحمة هي نفسها تتأكد من الكود قبل أرساله للكنترول يونيت.
متابع و موضوع شيق جدا جدا.
ربنا يحفظنا ويحفظ سيارتنا
مع الحرامي المحترف بيأخد الموضوع ده كله أقل من 3 دقائق للأسف لأن الكنترول يونيت في الحوض جانب البطارية و مكانه سهل الوصول أليه جدا جدا
لذا لو أتعمل مفتاح فصل الكهرباء عن موبينات البوجيهات و كان هذا المفتاح في مكان سري و مستخبي كويس يبقي أنسي خالص موضوع السرقة ده