الموضوع: ارجوا المساعده في تعليم زوجتي كيفية الركن

خليها تجرب كتير وتفشل وتنجح وتجرب في حته واسعة ومفيش فيها مخاطر وانت انزل من العربية واتفرج عليها وسيبها براحتها خالص تغلط وتتعلم -

طيب بما إني ست فهقولك المشكلة من وجهة نظرنا إحنا :D
أولا أنا بسوق من زمان جدا بس بعترفلك أهو إن السواقة بالنسبة للست مشكلة شوية ،، ليه بقى؟؟ بعيدا طبعاً عن كون الراجل أحسن من الست ف تقدير المسافات والتركيز في عمل شيء واحد و.... إلخ إلخ
مشكلة الست ف السواقة هو "خوفها من حكم الآخرين -اللي هما الرجالة يعني- وتريقتهم عليها"
أنا بعرف أركن كويس جدا الحمد لله بس فضلت فترة عندي مشكله في موضوع الركنة ده ،، عشان أخويا كان بيتريق جدا عليا وهو بيعلمني وبيحسسني اني مفيش مني فايدة وكان حتى لو نزل من العربية يتفرج عليا وأنا بركن في الأول يفضل يضحك عليا ويشاورلي أعمل ايه وماعملش ايه وكمان عمو بتاع الجراج كان ساعات على استحياء يوجهني أو حتى يعرض خدماته انه يركنلي من أساسه!! وكأن بمجرد مانا خدت لقب آنسة فده معناه اني مش هعرف أركن!! وخد من ده أمثلة كتير بقى ف أي حته أقرر إني أقف وأدي انتظار والناس تشم خبر اني نويت أركن بيتحول الشارع لمركب فيها عشرين ريس ومراكبي واحد غلبان اللي هو أنا وطبعا بتلخبط بزيادة وفييييييين بقى عقبال ما بقيت أطنشهم وأركن مع نفسي ،، خلاصة الكلام ،، إن تريقتك على مراتك وإحساسك الداخلي انها ست بقى واستحاله تسوق ده هيخلي الأمور تكون أصعب فعلا عليها،، و على العكس وثوقك فيها وإنك تقولها ان الموضوع سهل وانك وااااااثق انها هتعرفه ولوحدها كمان وبدون مساعدة منك أو من أي حد هيديها دفعه للأمام ،، لااااااازم كمان الحته اللي هتتعلم فيها الركنة تكون ما فيهاش أسطوات رجالة يضفوا على الموضوع ال suspense المعتاد بتاع "هوووبا يميييين ،، لا لمي كله وإرجعي،، أيووووووه كده مانتي بتعرفي تركني أهو دشششششششش " ويفضل كمان إن حضرتك تسيبها تتعلم وتروح تجيبلكو اتنين عصير أو حاجة ساقعه أو تنشغل في أي شيء تاني وليكن إنك تلعب جييم Candy Crush وهتلاقيها ركنت زي الفل ومش بعيد تتعلم الخمسات والغرز والدريفت قبلك كمان

اضرب بوز العربيه ع الشمال لو هتركن يمين وارجع لحد ما تقرب تلزق ف الرصيف لف الطاره ع الاخر عكس الاتجاه و العكس صحيح

ركب لها باركنج سنسور في العربيه هيسهل عليها موضوع الركن كتير سواء من النوع اللي بيصفر و بيقولك فاضل مسافه قد ايه او اللي بكاميرا خلفيه الاتنين كويسين و استخدامهم سهل