الموضوع: نصيحة بخصوص الانفي ٢٠١٤ تجميع محلي

المشاركة الأصلية كتبت بواسطة mohamed_awwad

بسم الله الرحمن الرحيم
احب الاول اقولوكوا كل رمضان وانتوا طيبين
كنت بس حابب انقللكم تجربتى الاولى مع الانفى ... فى البداية هى اول عربية ليا ربنا يحفظهالى ويكفينى شرها يا رب وعقبال كل واحد ان شاء الله يفكر يشتريها
اولا انا شاريها من يومين بس يعنى مقعدتش كتير معايا علشان احكم عليها اوى بس كنت حابب انقلكم الانطباع الاول ليها.....
العربية بسم الله ما شاء الله عاليه عن الارض ونظام التعليق الخلفى متعدد الوصلات حنين على المطبات المصرية مبيحسسنيش ان العربية اتغربلت ولا حاجه مهما كان المطب غبى او متكسر
التابلوه تقفيلة جميل يمكن المشكله الوحيدة زرار فى الكاسيت بيعلق بس انما الشكل الداخلى عصرى .. التكييف انا جربته دقيقتين بس كان سريع فى رفع درجة البروده بدرجه كبيرة زى ما بيقولوا تلاجة
.. الفرش رمادى جلد تقفيلة جميل بس يمكن ناشف شوية فى الكنبة انما كرسى السواق واللى جنبه مريح عن الكنبة ... الموتور صوته هادى وسريع جدا فى الاستجابة انا جربته لحد 100 علشان لسه بليين العربية وال rbm بيكون من 2 ل 2.5 تقريبا لحد 100 والعربية بتسحب معاك على قد ضغطتك على دواسة البنزين يعنى لو عايز تطير هاتدوس زيادة شوية وهى مش هاتقول لا ... بالنسبة للفرامل abs & ebd جميلة جدا ولو ظغط كبس عليها بتهدى بسرعه جدا من غير ماتحس انك هاتلبس فى الدركسيون .. فيها سنتر لوك ووحدة رفع الزجاج بالريموت بس مش عارف ليه جهاز الانذار مش شغال ومش عارف مكان حساس الانذار فين علشان اعليه .. الدركسيون الباور بتاعه خفيف جدا مش عارف ازاى بس ممتع جدا فى التوجيه ... بالنسبة للكاسيت هو معقول يمكن علشان سماعتين بس اللى موجودين بس انا لقيت ورا الكنبة فى مكان يتركب فيه سماعتين كمان وموجود وصلات لحد المكان للسماعات يعنى لو حبيت تزود .. بالنسبة للبنزين انا كنت شاريها عاملة 86 كيلو بعد ما مونت دلوقتى عاملة 168 تقريبا والعداد لسه واقف عند ال f احسبوها انتوا بقى .. السنسور بارك بيحسب بال سم وبيظهر فى الشاشة الزرقا .. وفى النهاية احب اشكركم وارجوا انى اكون افدت الموجودين بتجربتى وانا الحمد لله راضى عن كل شئ فيها وربنا يباركلى فيها ويكفينى شرها

مبروك العربية يا فندم وربنا يباركلك فيها ويكفيك شرها :)

المشاركة الأصلية كتبت بواسطة dr.ahmed 81

السلام عليكم
شباب فى اى نصيحه بخصوص استلام الانفى ٢٠١٤ تجميع محلى عشان هستلمها قريب
وعايز اعرف المفروض اشيك على ايه قبل الاستلام ؟
كمان المفروض بستلم معاها ايه ؟
وهل فى اى حاجه لازم اشيك عليها فى بودى العربيه او الصاج او التقفيل؟

شكرا .......اتمنى النصيحه

ألف مبوك مقدما وربنا يديك خيرها ويكفيك شرها

العربية بيجي معاها ستبن جنوط و كوريك و شنطة عدة (فيها مفك و مفتاح و دراع فك العجل و دراع رفع الكوريك) و أريال راديو خارجي وكتالوج الساوند سيستم (شوية ورق متصورين تصوير تعبان) و ضمان الساوند سيستم و تأكد على المعرض ان الكتالوج بتاع العربيه حيجي مع دفتر الضمان.

وانت بتستلم تتأكد من الأتي:
1- ان الكفر بتاع الماتور متثبت كويس و ان فيشة عداد السرعة و abs و الحرارة متوصلين علشان فيه معارض بيفصلوا الفيش ديه علشان ميبنش ان العربية اتنقلت سواقة من المصنع.
2- ان كل اللمض بتاعت التحزير في العدادات بتنور وانت بتدور و كلها بتطفي بعد متدور.
3- ان مفيش اي خدش أو كحت أو نقرة في الصاج و ان الدهان مش مسييل في أي حته.
4- تجرب كل الانوار و الفوجات و الإشارات شغالة و ان ضبط ز اوية الإضاءة الأمامية شغال.
5- ان الازاز في كل الابواب شغال كويس من باب السواق ومن كل باب و ان الزاز بيطلع وينزل بسلاسة
6- ان المرايات شمال ويمين شغالين كويس
7- الشنطة بتفتح من الريموت ومن التبلوه
8- حتلاقي في الإكسيدام الخلفي عيب بسيط في قفلته مع الفوانيس الشمال مش زي اليمين وده عيب لاحظته في كل العربيات الانفي المصري و الصيني وفعربيات تانيه غير الاسبيرانزا
9- الفرش مفيهوش اي قطع او خياطة مش مظبوطه
10- وطبعا تستلم بالنهار مش بالليل علشان لو في حاجة تبان