*ذاكر ساعتين بتركيز كأنك ذاكرت اليوم كله (الغريب اما تقعد تذاكر ساعتين يقولوا و هي دي مذاكره.)
*مذاكرة ايه دي اللى على السرير.
*بلاش البرفان وانتى نازله.
*يا ابني تعالي اقعد معانا ولا انت مأجر اوضه جوه البيت .
* ابقي نشف الحمام بعد ما تخرج منه.
* يا خويا ياريتك حافظ الدروس اللى عندك زى ما انت حافظ الاغانى كده .
* اعملى حسابك اول ما الدراسه تيجى الرسيفر هيتشال هو والتليفزيون.
*قبل الفجر:ارجع بات في المكان اللي انت جاي منه.
* لو كانت اللي علي التليفون طنط سلوي قوليلها ماما نايمة .
* ابقى قابلني بكرة تاخد بالجزمة وتاكل كل حاجة غصب عنك.
* يابنى حرام عليك هات قناة الناس الشياطين ماليه البيت.
* امشى جاتك مشش فى ركبك .
* جاتها نيلة الى عايزة خلف تيجى تتفرج .
* ماتحطيش الموبايل جنبك و انت نايمه هيجبلك تخلف عقلي .
*ذاكر ياموكوس مش فالح غير فى الهيافه والكلام الفاضى.
* متتأخرش وهات عيش وانت جاى .
* هو ده اللي انت فالح فيه طول اليل والنهار قاعد علي الزفت الكمبيوتر لحد ماهيجيلك تخلف عقلي منه .
* كل يوم هات هات لما ربيتلى الهتهات (الحاج طبعا) مع انى مش عارف اية الهتهات ده بس ماشية مع الجملة.
* هتذااااااااكر هتاخد عنية مش هتذااااااااااكر هتاخد بالجزمه.
*أوعى حد يضحك عليك ويقولك جرب السيجارة دي.
*ابقى ورينى مين حينفعك فى الاخر من شوية الصيع الى انت ماشيلى وراهم .
* قوم اقرالك كلمتين ينفعوك .
* وطي المدعوق ده شويه .
* مش ملاحقه علي التليفون ولا الموبايل عملالي فيها الست المهمه.
*برة البيت بتضحك وجوة البيت لاوى لنا بوزك ... خلي اصحابك الصيع ينفعوك.
*لما ما ترضاش تاكل في البيت:طبعا ماانت اتعودت علي اكل بره .
* عيـــب ... لازم تحترم اللي أكبر منك .
* لو شفت خناقه مالكش دعوة بيها .
* سمير دا عيل بايظ وماتمشيش معاه تاني .
* مين منى دي انتى كل يوم تصاحبي واحدة جديدة ؟.
* هياا الوزيرة معندهاش وزاره النهارده قومى يا حبيبتى الساعه10 .
* انت مابتاكلش جزر ليه .. اجيبلك برتقانه. طب كل سلطه .
* ياابني بأسلوبك ده مش هتعيش معاك واحده .
* قومي ساعدي امك ده اللي هيتجوزك أمه داعية عليه.
* اوعى حد غريب يديلك حاجه تاكلها او تشربها و تاخدها منه .
* يا ابني حرام عليك الي بتعمله فينا ده.
* انا سايبالكوا البيت وماشية ومش حتشوفوا وشي تاني .
* لمى هدومك انتى مش عايشة فى زريبة بكرة اشوف بيتك هيبقى ازاى خرابة طبعا.
* وانت فاكر احنا مستنيين منك حاجه .
* المسلسل مش هينفعك ...قوم .
* ابقي قابليني لو فلحتي ...بس ديما مابيقولوش نقابلهم فينّ ؟؟ غربيه .
*مين اللي ساب باب التلاجة مفتوح.
* كفايه رغي في التليفونات .
* كل على مهلك .. وامضغ كويس ... وما تاكلش وانت واقف .. وكل من قدامك ما تحفش .
* اطفي التلفزيون وقوم ذاكر ولا و خش اوضتك .
* بلاش تمشى حافى البس شبشب وانت داخل الحمام .
* ما فيش مذاكرة على المزيكا .. وازاى بتذاكر و البتاع ده شغال جنبك .
* ماتكلش فى ضوافرك.
*فلوسك بتروح فين يا هبله انتي بتصرفي على الصبيان؟؟.
*(مع ان الواحد كل سنة بينجح و رغم كدة يقولولك ابقى تف على وشى لو نجحت) كل سنة الكلام دة .
كنت فين لحد دلوقتى يا صايع.
* ماتتأخرش علشان عندك كلية بكرة بدرى.
* انا : ياماما بقه ايه ده ؟؟؟
ماما:مووو لمـا يــــــخدك .:D
* ادلعى ياهبة فى ايامك المهببه .
* ده منظر اوضة بني آدم ، انت عايش فيها ازاي؟.
* هو انا الخدامه الى ابوكم جبهالكم .
* الى يطلع من الاوضه يطفى النور وراه .
*أبوك عندك أهو اتصرف معاه .
* اللي بيشيل قربه مخرومة بتخر عليه لوحده ..
* لو مش فاهم حاجه ارفع ايدك و قول للأستاذ مش فاهم .. ماتتكسفش .
* يا أبنى المذاكره مابتخلصش .... نفسى اشوفك مره ماسك كتاب.
* اعمل حسابك مش حندخلك جامعه خاصه.
* قالب ليلك نهارك طول الليل صاحى وطول النهار نايم
طبعاً ما حضرتش ولا محاضرة ولا سكشن , وطول اليوم صايع بره البيت .
* مالكش دعوة بالسياسة .. وماتمشيش في مظاهرات .و امشي جوا الحيط .
* احمد ربنا الاكل الى مش عجبك ده فى ناس مش لاقينه .
*والله لو مانضفتيش الشقه ومسحتيها ما في نزول النهارده .
* قومي سخني الأكل لأخوكي
* ابوكم كان دايم بيطلع الاول على الفصل... " لما كلهم كده امال مين الى بيطلع الاخير '.
* اللي ياكل في طبق او يشرب في كباية يغسلها ما يركنهاش في الحوض.
انت : ماما عاملة ايه مش عارف ليه حاسس انك وحشتيني يا ست الحبايب
مامتك : وحش اما يلهفك كنت فين يا صايع انت ؟ ايه اللى رجعك متأخر امبارح ؟؟ :D
منقول من كتاب لعمر طاهر
طبعا كلنا اتقال لنا الكلام دة وطبعا كل اللي يقراه بيقعد يضحك لما يفتكر مواقف الجمل دي ...
عايزين بقه نقول على المواقف اللي سمعنا فيها الجمل ديه علشان نضحك شويه :D
بس أهم حاجة لازم ماننساش فضل الناس دي علينا ولولاهم ماكناش وصلنا للي احنا فيه .. ربنا يباركلهم يارب ويجعلهم من سعداء الدارين
المفضلات