الموضوع: Bmw تعبتني خلاص ارجو المساعدة

المشاركة الأصلية كتبت بواسطة mr.abdelhamid

السلام علي اعضاء احسن منتدي سيارة علي الويب انا دي اول مشاركة ليا علي منتداكم العزيز واول مرة امتلك عربية bmw برضو ويمكن دي اللي شجعني علي المشاركة وطلب النصح منكم المهم انا اشتريت عربية bmw e34 موديل 1990 وبجد علي اد ما العربية تحفة وجميلة وكانت كويسة خالص علي اد ما كرهتها ومش عارف ارميها في الزبالة ولا اعمل ايه والعيب مش من العربية بجد العيب من الصنايعية اللي بيشتغلو فيها الخلاصة في عيب ظهر عندي في العربية بعد حوالي شهرين من استخدامها ان طرمبة البنزين فصلت وروحت جبت واحده جديد ماركت بوش ومنصور اللي في جسر السويس اللي ركبها وبعدها بكام يوم العربية ابتدت تبطل ساعة الحر وانا ماشي في الزحمة وهي علي السلانسيه ولما اجي ادورها بعدها تدور ولا كان في حاجة ومؤشر الحرارة بيكون قبل النص بحاجة بسيطة وبعدها الفتيس برضه بقا بيبرجل لما العربية تسخن او ابقا ماشي في الزحمة كتير فروحت لمنصور عشان العيب ده قالي مابشتغلش في القديم انا عملتلك طقم سيرفيس لما جبتهالي اول مرة وغيرتلك طرمبة البنزين تاني مرة عشان انت شكلك طيب انما غير كده انا بتاع الجديد وبس طب ماشي ياسيدي في غيرك بيشتغل فيها يقولي معرفش المهم بعد سؤال ناس كتير والتدوير علي النت لاقيت في واحد الكل بيشكر فيه اسمه الشيخ طارق عند كوبري 4,5 روحت عليه من غير كلام لسه بحكيلو اللي بيحصل قالي لا ده مش عندي انا ميكانيكي والعيب ده عندك في ضفيرة العربية روح لمحمد منصورة في الحرفيين وهو يعملهالك المهم روحت عليه من غير برضو كلام برضو مبشتغلش في القديم انا بتاع الجديد وبس طب ماتعرفش حد بيشتغل فيها يقولي لا معرفش هما حفظين من بعض ولا ايه .. فافي واحد هناك قالي روح لمحمود كهربائي الbmw ده واد عفريت وشغال في كل الموديلات روحت عليه ولسه بقوله علي المشكلة قالي ياباشا ده الفتيس اللي بايظ روح هات واحد وبعدين تعالالي اشوفلك العربية طب ياسيدي ده العربية وهي لسه بارده الفتيس وكل حاجة بتمش تمام وبينقل مرتاح يقولي لا هو بايظ وعشان كده بيبطل العربية لما بيسخن ولا اقولك ممكن يكون حساس الكرنك مش عارف !!!!!!!!!!!
بجد هما دول صنايعية الbmw والله العظيم انا لو اعرف انها هتبقا كده عمري ماكنت ركبتا انا طول عمري بركب عربيات امريكاني وعمرها ما تعبتني ولا ميكانيكي اترسم علي الواحد كده فبعد اذن السادة ملاك العربية الحلوة دي وخصوصاَ لو في حد معاه الموديل ده يفدني في العيب ده ولو يعرف صنايعي ابن (حلال) بيكون بيكشف علي العربية وبيوسخ ايده فيها مش واقف يشم هواء احسن انا تعبت والله بقالي 10 ايام دايخ ومش عارف اعمل ايه وبروح من اي مشوار علي مراحل العربية تبطل لما تبقا سخنة واوقف الشارع كله ورايا دقيقة او اتنين عشان تدور تاني وامشي اللهم لا اعتراض واسف للاطالة بس بجد الواحد علي الاخر بجد عيب والله الواحد يتهان عشان غلط وجاب عربية bmw وانا مش شايف انها قديمة للدرجة دي وشكراً

خير ان شاء الله....مش عايزك تقلق هتتصلح ان شاء الله و هتبقى زي الفل
هتروح لصبري فى شارع الليبيني هرم 01229303836 و هو هيوسخ ايده و يصلحلك كل حاجة
كهرباء هتروح لحسام فى التعاون فيصل و هيظبطلك الكهربا كلها 01229619970