الموضوع: تعديل ارتفاع تويوتا كورولا و اول ملاحظة سلبيه على اداء التوكيل

الحمد لله بعد اتصالات و محاولات مضنيه و شكاوى تم تعديل ارتفاع السياره و هى حورولا ٢٠١٤
طوال الفتره الماضيه انطباعى عن التوكيل كان ايجابى وكذلك عن العربيه
المشكله حصلت عند استلام السياره بعد التعديل و اكثر ما استفزنى ردود مهندس الصيانه فى العباسيه واسمه محمد
وانا باستلم العربيه اديته كتيب الضمان علشان يختم انه تم تغيير المساعدين والسوست وكوبلن
فاجاب لا الضمان ما بيتكتبش فيه قلتله ليه فقعد يتفلسف بصفاقه شديده ويقاوح
قلتله تمام طب ادينى جواب بيقول ان الحاجات دى اتغيرت فقال رد خلانى كنت هلطشه على وشه بالقلم
قالى هو انت دفعت حاجه علشان تطلب فاتوره فرديت انا مطلبتش فاتوره وحتى لو طلعت فاتوره هتطلعها بقيمه اجماليه صفر لانى مدفعتش حاجه المهم ابتدا يتفلسف بجهل فقررت اكلم مديره وهو شخص مهذب اسمه المهندس علاء و كرر نفس الكلام لكن بذوق و قاللى انت خايف من ايه طب مش تجرب العربيه فقلت له انا معنديش شك ان العربيه اتعملت كويس وناس كتير عدلت ارتفاع العربيه و معندهمش شكوى انا باتكلم فى ايه الى يثبت ان العربيه دى اتعدلت فى التوكيل فرد احنا عندنا على الكمبيوتر انها اتعدلت عندنا فرديت كويس انا عندى ايه يثبت فابتدى يلف ويدور و بعدين قاللى اطلع اشتكى فطلعت قابلت مدير خدمة العملاء وشرحتله موقفى ورد ان دى حاجه بسيطه بس الساعه دلوقتى خمسه وخد تليفونى على وعد انه يكلمنى و طبعا ولا كلمنى ولا اى حاجه
اللافت للنظر ان الايصال الى انا اخدته عند تسليم السياره ولحسن الحظ انا نسيته عند الاستلام لان المهندس الفلحوص طلب منى اقطعه فرجخت البيت لقيت مكتوب فيه الكشف على العفشه مش تعليتها او تغييرها
طبعا كل الاخوه هيسألوا العربيه فيها حاجه فردى هو بالعكس التعليه تمت باحتراف والفرق واضح و مفيش اى تأثير على الثبات وكأنى مستلمها بالعفشه دى
النقطه هى انى مبحبش الاسلوب المصرى فى محاولة التنصل من المسئوليه وضرب الزبون على قفاه
اللطيف انى حاولت اكلم الرقم المختصر النهارده علشان اعمل شكوى لقيته مرفوع من الخدمه
طب الحل ايه
انا محرج انى اعمل مشكله لانى اعرف ناس فى مناصب عليا فى الشركه وهم ناس محترمين انا شخصيا باقدرهم
بالمناسبه انا سألت لقيت كل الناس الى اتعدلت عربياتهم ما معهمش حاجه تثبت ان عربياتهم اتعدلت و ده شىء فى منتهى الخطوره و يمس حقوق المستهلك
مش عارف اسكت بصراحه على حاجه خطيره زى دى حتى مجاملة لاصدقاء اعزاء فى اعلى المناصب فى شركة تويوتا ايجبت
و عارف انى ممكن اروح اخد الجواب فى خمس دقايق مع فنجال نسكافيه فى التكييف بس دى مش شخصيتى ولا تربيتى
علشان كده قررت اعمل الموضوع ده كنوع من التوعيه
و بافكر ابعت ايميل لتويوتا فى اليابان لان بالرغم من ان الشركه عملت خطوه محترمه و هى التعديل بدون مقابل لكن فى نفس الوقت راوغت فى تحمل مسئولية التعديل الى قامت بيه وده غير مقبول

دى وجهة نظرى برضه علشان كده قررت ما اسكتش و اصعد الموضوع لليابان و بافكر فى شكوى لجهاز حماية المستهلك

العجرفة و قلة الاحترام ده بيكون سببه شخص مش مؤسسة, فكان بمنتهى البساطة كان حضرتك تهزق المهندس وتمسح بكرامته الارض امام الصنايعية و العملاء, واراهنك حيتعدل بعدها فى شغله.

بس سيبك من كل ده , التوكيل بيرفض يخليك تشوف المكونات اللى اتركبت, وده ربنا يستر ان الاجزاء اللى اتركبت عشان تعدل ارتفاع العربية مش هي الاجزاء اللى نازلة فى الكورولا 2015 . يعنى ممكن الاجزاء ديه تكون مسكن لتعلية العربية دون ضمان على كفاءة و جودة العربية عشان كدة التوكيل الغير محترم بيخلع من المسؤولية عن ضمان العربية للاجزاء اللى ركبها, يعنى مش عايز اى ورقة تدينه لا قدر الله لحدوث اى حادث لاحقا, التوكيل المحترم المفروض يصدق على كلام الشركة الأم ويكون فى شهادة رسمية من الشركة تؤكد سلامة العربية بعد التعديل , مش كلام وخلاض ويقولك اطلع جرب العربية , التعامل لازم يكون بأوراق.

يا ريت كدة اعضاء الجروب النشيطة عند ذهابهم للتوكيل يتأكدو ان الاجزاء و قطع الغيار المتعدلة للعربيات المنخفضة هى نفسها اللى نازلة فى الموديلات الجديدة . عشان فى كلام بيتقال ان مش نفسها وان الاجزاء اللى اتغيرت مش بالظبط موجودة فى العربيات الجديدة يعنى فى حاجات تانية.

وممكن بردوا للناس النشيطة تتأكد من كلامى وتشوف ارتفاع العربية المتعدلة من الامام و الخلف و المنتصف و تقارنه بال 2015 و تتاكدوا من كلامى انه مش نفس الارتفاع يعنى ال1/2 سنتى بيفرق طبعا, ووجود الاختلاف بيعنى وجود اختلاف فى اجزاء قطع الغيار و شكرا

المفروض تطلع فاتورة بل الى اتعمل انشالة لو الحساب صفر دا حقق القانونى

الاخ العزيز محمد الولى
من الناحيه دى اتطمن المساعدين اسبانى والاخ الدكتور محمد ابو فندى اتأكد من ده وانا شخصيا مبعتمدش على الرؤيه باعتمد على الاختبار و التعديل مرضى جدا بالنسبه لى و انا اثناء تعديل عربيتى لاحظت ان فيه مهندس يابانى موجود وواضح انه بيشرف على التعديل فمفيش خوف من الناحيه دى
النقطه هى ان رفض التوكيل اعتماد التعديل هو الى يشكك الواحد فى مصداقية البراند لان شركة تويوتا لها اسمها و لها معايير جوده عاليه هى الى خلتنى اشترى العربيه دى فاذا اهتزت هذه الثقه بسبب رفض الشركة تحمل مسئولية تعديل بسيط زى ده تهتز الثقه فى البراند نفسه
اما بالنسبه لانى اهزق المهندس فده تم بدون زعيق ولا شوشره لانى مبحبش الاسلوب ده وصدقنى انى اديته درس بالادب يفتكره طول حياته و صعدت الموضوع لمديره و يعدين لمدير خدمة العملاء و كنت هادخل للمدير التجارى لكن للاسف انه صديق فمحبيتش ان الموضوع يمشى كده

جارى اعداد ايميل لتويوتا باليابان وساقوم غدا بعمل شكوى فى جهاز حماية المستهلك
المره دى هامشيها رسمى بدون وسايط ولا اصدقاء واشوف مصر الدنيا فيها وصلت لايه

المشاركة الأصلية كتبت بواسطة Hany Saad

أسلوب إيجابى جداً من حضرتك بحييك عليه
لو كل واحد فى مصر اتعلم يطالب بحقه و ميضربش على قفاه و يرضى بسياسة الأمر الواقع علشان الأمور تمشى و المراكب السايرة متقوفش و كل الكلام اللى زهقنا منه ده......أعتقد البلد دى هتتقدم للأحسن و هيبقى فيه حقوق مستهلك بجد

تحياتى لحضرتك

اشكرك وتحياتى لحضرتك