ارتفاع درجة حرارة السيارة بعد تشغيل التكييف بحوالى 10 دقائق

**ramadan272** · 01-07-2014 12:25 AM

سيارتى لادا 2110 وشاحن التكييف من حوالى شهر ونصف عند احمد حنفى بتاع المعادى
وتم الكشف على التسرب وكل شيء تمام ولكن عندما شغلت التكييف يوم 4-6 وكانت الحراره شديده فى هذا اليوم فوجد ان درجة الحرارة تخطت الـ 100 درجة فأوقفت السيارة وزودت مية القربة ولكن الحرارة مازلت مرتفعه مما إضطرنى لفصل التكييف فى عز الحر
وبعد عدت إلى المنزل عملت دورة غسيل لدورة التبريد - بالخل - ونزلت كمية صدأ لم اكن اتخيل انها موجودة بالسياره وتأكدت ان مروحة التكييف تعمل بكفاءة ومروحة الراديتير ايضا ولاحظت تحسن كبير فى اداء التكييف
ولكن عندما شغلت التكييف اثناء سير السيارة عادت درجة الحرارة للإرتفاع
فهل هذا العيب من الشحن ؟ أم من السربنتيه ؟ ام ماذا ؟
وهل ارجع لاحمد حنفى ؟ أم ابحث عن صنيعى أخر ؟

**Ahmed_Ramadan** · 01-07-2014 09:15 AM

متابع

**أسامه الحسيني** · 01-07-2014 09:59 AM

اتاكد انك اول ما بتشغل التكييف المروحه بتشتغل معاك

**ramadan272** · 01-07-2014 04:52 PM

المشاركة الأصلية كتبت بواسطة أسامه الحسيني

اتاكد انك اول ما بتشغل التكييف المروحه بتشتغل معاك

شكراَ استاذ أسامة
تأكدت من ذلك المروحه بتشتغل تمام

**borio1704** · 02-07-2014 03:02 PM

حضرتك لازم تتأكد إن دايرة التبريد عندك شغالة بكفاءة عالية...

خلينا ماشيين كده بالترتيب:

1- نظف الرادياتير وسربنتينة التكييف بالهوا المضغوط لإخراج أي أتربة عاملة سدد في مسار الهوا

2- اتأكد إن طلمبة المية شغالة كويس وإن التقليب ماشي مظبوط.. اتأكد من شد سير الطلمبة... احتمال تكون محتاج تغير الطلمبة.

3- اعمل دورة تنظيف لدورة التبريد بالكامل.. مش الرادياتير بس... وحط ميه خضرا

4- اتأكد إن حساس المروحة ببيشغل المروحة بدري شوية.. يعني لو المروحة بتشتغل عند 80-90 غيره وهات حساس بيشغلها عند 60-70... بس لازم تتأكد إن ثرموستات الكوعة موجود وشغال كويس.. ولو متشال ركبه.. ده أحسن كتير للموتور.

5- لو المية بتنقص.. يبقى أكيد عندك تسريب... أول حاجة تبص عليها هي غطا الرادياتير.. و غالبا ما بتلاحظش إنه سبب نقص المية لو التسريب من عنده، لإن غالبا التسريب بيبقى في صورة بخار.

6- لو كل اللي فوق ده معندكش فيه مشاكل.. احتمال كبير تكون محتاج رادياتير 3-ماسورة... خلي بالك إن روسيا معندهمش الحرارة العالية بتاعت مصر.

...