فضيحة جديدة لنيو صني وفراملها اللي بتقلب العربيات

**eng.m7md.ali** · 03-07-2014 02:42 AM

المشاركة الأصلية كتبت بواسطة hatemfox2005

ده حادث تويوتا كامري عشان يثبت كلامي
unbelievable deadly drifting accident ! حادث تفحيط مميت - youtube

دي مش حادثة طبيعية دي مقصودة

صاحب العربية ربنا يرحمه ويسامحه كان بيلعب بالعربية .. العربية كانت بتعوم قبل ماتدخل على الرملة اصلا

ده زحلقة او هاجولة على رأي السعوديين

**hatemfox2005** · 03-07-2014 02:45 AM

لكن الصني فيها abs+ebd يعني المفروض توزع الفرامل صح على الاربع عجلات

الصني فيها abs بس ده نظام مانع الانزلاق عشان اما تيجي تفرمل مره واحده العربيه ما تزحفش بس

**hatemfox2005** · 03-07-2014 02:47 AM

دي مش حادثة طبيعية دي مقصودة

صاحب العربية ربنا يرحمه ويسامحه كان بيلعب بالعربية .. العربية كانت بتعوم قبل ماتدخل على الرملة اصلا

ده زحلقة او هاجولة على رأي السعوديين

هي حصلت عشان داس علي الفرامل في الرمل عشان كده اي حد عربيته تخش في رمله ما يدوسش فرامل خالص ويستني العربيه تقف لوحدها

**amrelsaqqa** · 03-07-2014 11:36 AM

بيتهيالى حتى الـ ebd مالوش علاقة انه يمنع العربية انها تتزحلق هو بيوزع قوة الفرملة بين قدام وورا حسب الحمل ، وماعتقدش انه له علاقة بالـ traction مع الطريق

اللى بيعمل كدة الـ tcs مع الـ abs اللى هو esp

**المنسي** · 03-07-2014 12:33 PM

الحمد لله انك طلعت سليم

**HossamTec** · 03-07-2014 01:11 PM

هل ممكن جروب نيسان اللى على الفيس اللى فيه الحوادث

**awamry** · 03-07-2014 01:30 PM

المشاركة الأصلية كتبت بواسطة a11

الحمد لله ربنا أنعم عليا بأني جبت النيو صني ex auto2014. بس جايبها قسط والحمد لله المهم وانا راجع بيها من القاهرة للاسكندريه حصلي موقف مش مفاجئ ولا حاجه وهو ان العربيه وانا ماشي كانت بتحدف شمال ع الطريق الصحراوي فدخلت كاوتش من العربيه ف الرمله اللي موجوده علي جانب الطريق عادي يعني فقلت افرمل واظبط نفسي ع الاسفلت تاني علما باني كنت ماشي علي 120 بس وده عشان التليين والعربيه لسه معملتش 800كم اول ما ضربت الفرامل وانا كنت ماشي ع الشمال لاقيت العربيه لفت مني يمين للاخر والله العظيم كأني لفيت الدركسيون ليمين للاخر ولاقيتني دخلت ف الهيش الموجود علي يمين الطريق بنفس سرعه العربيه ولاقيت العربيه اتقلبت في مصرف. والحمد لله ان الايرباج فتح والحمد لله ان انا كنت لوحدي عملت محضر بالواقعه وقدمت شكوي في حماية المستهلك وربنا يسهل. للاسف مش مأمن عليها وديتها للتوكيل التوكيل قالي مقايسه ب 88000 ج وقالي توتال لوس

اسمحلى بس الغلط مش من العربية .. الغلط من حضرتك ... اول قواعد السواقة عدم استخدام الفرامل فى حالة وجود رمل او مية او زيت على الطلريق و اللى حصل ده (حسب وصف حضرتك) طبيعي جدا .. العجل اللى على الاسفلت مسك و اللى على الرمل ممسكش بسبب اختلاف معامل الاحتكاك بين الاسفلت و الرمل .. حتى الabs فى الظروف دى و على السرعة دى مش مؤثر .. اللى ممكن يأثر شوية هو esp
لو نيسان شافت البوست بتاع حضرتك حتكسب ضدك اى قضية لان ده اعتراف صريح انه عيب سواق

**mr.moustafa** · 03-07-2014 01:52 PM

أعتقد ان abs+ebd مش هايسعفوك ابدا في حالة زي ديه خصوصا لو السرعة زادت عن 100 كم و ده اللي الناس مش فاهماه
يا جماعة لازم تفهموا ان abs+ebd ديه مميزات مساعدة و ليست اساسية ابدا
مش هتلاقي ليهم فائدة كبيرة غير لما يكون فيه الاساسيات موجودة زي نوع تيل الفرامل و الاقراص و طريقة عملهم ميكانيكيا و كذلك نوع الكاوتش و تصميم نقشاته و كذلك تصميم هيكل السيارة نفسه و توزيع الثقل فيه و تصميم نظام التعليق

يعني مستحيل تلاقي عربية رخيصة فيها نوع تيل فرامل و كاوتش أقل من المتوسط و كذلك تصميم هيكل و نظام تعليق متوسط و بعد كده عايز تحس بمميزات abs+ebd
الـ abs+ebd اكيد موجودين في النيسان بس بسبب قلة جودة تيل الفرامل و الكاوتش يبقى عمرك ماهتحس بيهم

ده بقى غير انك تبقى مجنون لو مشيت بسرعة 120 كم في طريق انت مش حافظه كويس في مصرنا الحبيبة
و معظم الحوادث اللي بشوفها هنا في المنتدى بتبقى بسبب استهتار و اخطاء السائقين
مش معقول ابدا تبقى ماشي بسرعة كبيرة في طرق مصر القذرة ديه و معتمد على abs+ebd حتى لو كانت السيارة الماني

**amrelsaqqa** · 03-07-2014 02:43 PM

طبعا لصاحب الموضوع ربنا يعوض عليك ويصبرك ، وفداك اي شيء

أنا كان هيحصللى موقف مشابه بالـ 301 والحمد لله بفضل ربنا ربنا نجانى من حادثة وموت محقق اما ليا او لشخص ما ربنا يسامحه طلع فجأة قدامى بيعدي على رجله ع الطريق

اللى حصل انى ماشى على طريق صحراوى وعربية راكنة على اليمين وانا ماشى 120-140 وفجأة قبل ما اعديها بحوالى 70 متر ، طلع شخص ما فجأة من قدام العربية وبيجري من غير ما يبص او يدي فرصة انه يكشف نفسه للطريق ، فطبعا لقيته قدامى فجأة ، كل ده مش مشكلة ، قدامى 70 متر مسافة كافية انى اهدي وادى كلاكس وافاديه براحتى .. وحصل فعلا

الشيء الغير متوقع تماما :

مجرد ما فاديته وفي لحظة مانا معدي بمحاذاة العربية اللى واقفة دى ، افاجأ بالفاجعة الكبرى وهى عبور شخص اخر (زميله) بنفس الطريقة ولكن في الوقت القاتل وكان قدامى اقل من ثانية (يمكن اقل من 10 متر وانا على السرعة دى ) وحتى مفيش وقت ادوس فرامل او ادي كلاكس ، ربنا الهمنى لتصرف واحد فقط وهو كسر الدركسيون شمال جامد جدا على السرعة دي ! ومش عارف انا عملت كدة ازاى ، بس انا كنت هتجنن لما لقيتنى هتسبب في موت بنى ادم رغم انه مش غلطى بس بجد لحظة ربنا ما يكتبها على حد ، بالفعل مقدمة العربية تفادته بأعجوبة بس جسمه حك في اخر جنب العربية من ورا لان طبعا العربية بتكسر بسرعة من قدام بس استجابة المؤخرة بتكون ابطأ شوية ، طبعا ما حصلش حاجة الحمد لله لان الحكة بجنب العربية ده مش حاجة خالص بالنسبة للمصير اللى كان منتظره لولا ستر ربنا

المهم لقيتنى طبعا نزلت في الرملة وانا على السرعة دى بنص العربية و طبعا مجرد ما ادركت انى نزلت في الرمل وبدأت اعدل العربية تانى طبعا حسيت بتعويم بس بدأت احاول اسيطر على العربية واحدة واحدة بالدركسيون وفي خلال مسافة حوالى 60 متر تقريبا العربية اتعدلت بفضل الله تانى على الطريق ونجيت من انى اقتل او اتقتل الحمد لله رب العالمين

المهم في القصة دى وده ستر ربنا مش شطارة منى انى ما افتكرش انى دست فرامل ابدا والعربية بتلف او وهى في الرملة الحمد لله ، كل ده كنت بسيطر على العربية بالدركسيون بس وواحدة واحدة ومركز جدا مع الطريق رغم اعصابى المنهارة واول ما حسيت العربية خلاص بتتعهدل دست بنزين عشان اخليها تتعدل في اتجاه الدفع والحمد لله كملت طريقى على خير

طبعا كل ده توفيق من ربنا ، بس العربية النيسان فعلا عليها علامات استفهام ، دى مش اول حادثة بنفس الشكل والمنظر ده واه ده غلطة سواق انه يدوس فرامل في موقف زي ده بس السواق هو الوحيد اللى ممكن يقدر هل الموقف ساعتها كان يستاهل ان العربية تتقلب بيه ولا لا وفي نفس الوقت مش معقول كل الحوادث دى للعربية دى تحديدا وتقريبا نفس الظروف او نفس الاحداث ويكون كل اللى راكبينها ما بيعرفوش يسوقوا ؟

ربنا يسترها انا بجد ما بقتش عايز اعيش في البلد دى والنهاردة نفسيتى زفت وكاره البلد اوى لان لسة امبارح بالليل عم صديقى توفى هو واتنين معاه في العربية بسبب حادثة على كوبري بنها وتقريبا السبب نقل واقف بدون اشارات او اضاءة بالليل وعلى الشمال وكمان في منزل الكوبري (حسبى الله ونعم الوكيل) ، ربنا يرحم الجميع ويتوب علينا من العيشة في البلد دى