المشاركة الأصلية كتبت بواسطة محمد يوسف
الى صاحب الموضوع
الحاجة أم الصابرين اللى شالت على راسها حلة الجبنة القديمة وراحت تركب الميكروباص عشان تروح الميدان تبيعهم ماعرفتش تركب عشان الأجرة بقت بجنيه ونص وهى ماحيلتهاش غير الجنيه... باست ايد السواق ياخد حتة جبنة بالباقى مارضيش... فرشت ع الرصيف عشان تبيعهم عدا الباشا الصول بتاع الحى شاط لها الحلة برجله قلبها فى التراب عشان هى موسخة الرصيف اللى بيلمع من نضافة الزبالة اللى مالياه... راحت تشتكيه للظابط بص لها بقرف وزقها وقعت على ضهرها .. ولاد الحلال قوموها وقالولها روحى ياستى...فركت الجنيه اللى ف صدرها وراحت كشك العيش أبو شلن عشان تجيب عيش للعيال ..جابت 10 أرغفة بمساميرهم بنص جنيه والبياع نبه عليها العيش حاينزل على بطاقة التموين خلاص ومالكيش فى اليوم غير 5 أرغفة... طيب وبقية العيال؟ استغفرت ربنا وراحت تجيب قوطة تقطعها على حتة الجبنة اللى فى البيت ..لقيت كيلو القوطة ب4 جنيه عشان البنزين غلى..اشترت بالنص جنيه حباية قوطة وروحت البيت لقت اللمبة الوحيدة اللى حيلتها مطفية وبتاع الكهربا بيقول لها الكهربا زادت من الشهر الجاى....
المهم فى الحدوتة دى كلها ان الست أم الصابرين بتقول لك ترجع بالسلامة ياباشا من تركيا وقبرص وألمانيا ويكتر دولاراتك ويعلى مراتبك ويفرحك كمان وكمان بسعر البنزين .... وبتبوس ايدك وانت جاى من تركيا تجيب لها لتر بنزين من أبو دولارين ده تولع بيه فى روحها وف عيالها .... أصل البنزين أبودولارين نضيف مش وسخ زى بتاع مصر وهى نفسها قبل ماتموت تجرب حاجة واحدة نضيفة فى البلد دى.