سلام عليكم

ياجماعة أنا عندى حاجة قلقانى فى عربيتى..هى ياريس 2008 أتوماتيك...العربية كل ما عدى بيها على مطبات معدنية..فواصل كبارى..عيون قطط أو حتى مطبات عادية بس بسرعة زى فوق الكوبرى مثلا أسمع صوت رجة معدنية جاية بالذات من ورا..ولاحظت حاجتين..ان الصوت ده بيقل لما أبقى فاتح الشبابيك ولما العربية تبقى محملة ..يعنى راكب معايا العيلة...لكن لوحدى وقافل الشباك بيبقى الصوت واضح قوى...رحت للتوكيل طلعوا معايا واحد بيقولوا مهندس-أشك ف كده- ساقها و أنا جنبه فى الكام شارع حوالين التوكيل وسمع صوت بس طبعا ماكانش بالشدة اللى باسمعها ع الكوبرى..المهم قاللى حاجة غريبة قوى ..قاللى الدرج البلاستيك اللى تحت الدركسيون بيتهز مع المطبات و يعمل الصوت...طبعا كلام فاضى لأن الدرج ده ثابت ماتلمسش ..والصوت بييجى من ورا وصوت حديد بيرن..المهم أنا لابطت معاهم لغاية ما جه فنى ابن حلال دخلها لى و ربط العفشة وشحم البيبان وخد تلاتين جنيه..طبعا الكلام ده مش رسمى..ونصحنى ماحطش طفاية الحريق فى الشنطة زى ماكنت عامل

المهم اتظبطت الحكاية أسبوع وبعدين رجعت تانى...علما بانى باظبط الكاوتش على 30 كل أسبوع..ايه السبب ياجماعة فى الأصوات دى؟

معقول أربط عفشة مرتين فى 3500 كيلو؟ وهل ممكن الصوت ده يكون مساعدين..ولا يكون صوت طنابير العجل ولا ايه بالظبط؟

ياريت تدلونى..وهل عفشة الياريس رياضية ولا عادية؟

وشكرا